حواراتعالم الفن

إيمان أيوب تفتح قلبها لـ عالم النجوم وتبوح بطقوسها الرمضانية

اقرأ في هذا المقال

  • إيمان أيوب بنتي موهوبة وصوتها جميل لكن نفسها تكون إعلامية ولها برنامج خاص بها
  • إيمان أيوب تفتح قلبها لـ عالم النجوم وتبوح بكل جديد وبطقوسها الرمضانية
  • إيمان أيوب لو عملت برنامج مقالب هعمل في رامز استوينا منه مقالب في حياة الجوهري وماما شعرها ولع بسببه

إيمان أيوب تفتح قلبها لـ عالم النجوم وتبوح بطقوسها الرمضانية

إيمان أيوب تفتح قلبها لـ عالم النجوم وتبوح بطقوسها الرمضانية
إيمان أيوب

 

حوار / دعاء نصر

إيمان أيوب صاحبة الوجه الملائكي والملامح الهادئة. صوتها أيضا عذب ومتميز ، تلقائية في الأداء و موهوبة. ساعدتها ملامحها في الحصول على بطولة فيلم اندونيسي ولعبت فيه دور فتاة منتقبة، وتم تصوير الفيلم في الهرم والمقطم وإندونيسيا، وأكدت أنها لم تجد صعوبة في التصوير، على الرغم من أنها أدت الفيلم باللغة الإنجليزية .

بدأت حياتها الفنية، من خلال خشبة المسرح، بعدما تخرجت في معهد الفنون المسرحية.

انطلقت فنيًا. عام ١٩٩٦، من خلال مسلسل “حياة الجوهري” مع الفنانة يسرا والفنان مصطفى فهمي، وحققت من خلال هذا الدور نجاحًا مدويًا.

إيمان أيوب عملت كمذيعة في قناة النيل للمنوعات؛ حيث قدمت برنامج بعنوان “فاشون” يتحدث عن المرأة وما يخص الأسرة. بدايتها في السينما كانت من خلال فيلم “العشق والدم” مع شريهان. وصورت أول كليب لها بعنوان “أنا رايحة الدرس”.

الفنانة إيمان ايوب

ما الأجواء الخاصة و الطقوس اللي بتداومي عليها في شهر رمضان ؟

والله بصي أول حاجة طبعا أنتي لازم قبلها بيوم تجهزي المشروبات وتدمسي الفول هههههه علشان تأكلي حاجات نضيفة خصوصا ان أحنا في يومين كورونا كده وحاجات عجيبة. و طبعا طقوسي الاساسية ان انا بحب طبعا احافظ علي ان ابقي عاملة جدول مهم للأكل بحث أت كل يوم مانبقاش محتارين هنأكل أية واهم حاجة في ده كله ختم المصحف والتراويح والتهجد.

ما هو الشئ اللي كنتي بتحبيه في رمضان زمان وافتقدتيه في رمضان دلوقتي ؟

والله بصي أنا أفتقدت حتة ان أحنا دلوقتي مابقناش الأسر مابقتش بتجتمع زي زمان و دي حاجة وحشة جدا. دلوقتي بقي كل واحد قافل علي نفسه بيته. حتي بعيدا عن الكورونا التواصل بقي قليل مع الناس واخدة بالك ، يمكن علشان اليوم بقي قصير. يمكن علشان الأعباء بقت كتيرة. يمكن علشان الحياة بقت غالية الله أعلم ، بس تحسي برضه ان مابقاش زي لمة العيلة بتاعة زمان

ايه اكتر اكلة بتحبي تاكليها من وانتي صغيرة اول يوم رمضان والأكلة اللي بتميز رمضان ؟

انتي عارفة ان لازم نلاقي الرقاق ، البشاميل ، الطواجن ، الحمام. مثلا الملوخية والرز والحاجات دية لازم بتلاقيها على كل سفرة اسكالوب ، بانيه ، مش عارفة ايه الحاجات دي تلاقيها متكررة بقي .

إيمان أيوب تفتح قلبها لـ عالم النجوم وتبوح بطقوسها الرمضانية
إيمان أيوب

اكتر حاجة في التليفزيون بتحسسك برمضان ؟

فوازير شيريهان طبعا كانت اكتر حاجة بتحسسني وبتحبيني في رمضان سواء بقي الفوازير او الف ليلة وليلة. أنا نفسي أصلًا تجي لي فرصة ان اعمل ده في يوم من الايام

ايه رايك في اللي بيتقدم في التليفزيون في رمضان دلوقتي ؟

والله انا شايفة ان في تقدم كل شوية في المسلسلات في الكتابة. في الإخراج. يعني انا شايفة ان كل مدي في تطور ، عندنا تطور كمان في التصوير ، في التكنولوجي ، فاهمة قصدي ؟ يعني كل حاجة متطورة و دي حاجة حلوة. أتمني طبعا أن صوت القاهرة والتليفزيون يرجعوا يشتغلوا تاني ويبقوا تحت رعاية الدولة.

ده حلم من أحلام حياتي لان ناس كتير اوي فنانين ونجوم قاعدين في البيت طب صوت القاهرة والتليفزيون ومدينة الإنتاج بتفتح المجال ده ان يبقى في شغل. كانت الناس بتشتغل. دلوقتي الناس زي ما انتي شايفة مقتصرة على نفس الأدوار ويعيدوا نفسهم .

لدرجة أن يتهيأ لك انك شوفتي المسلسل ده قبل كده من كتر ما الكات هو هو. بس ، فأتمنى والله مع دخول السنة الجديدة انه صوت القاهرة يارب تشتغل في التليفزيون ومدينة الإنتاج ويبدأوا ينتجوا باكورة أعمال تاني لان ناس كتير قاعدة في البيت و ده حرام. دول مصريين فاتحين بيوت و دارسين ومعاهم بكالوريوس واشتغلوا وتعبوا ونجحوا واجتهدوا يعني وعندهم أسر.

الفنانة إيمان أيوب

تفتكري هيكون في لمة العيلة السنة دي ولا الوضع اللي احنا فيه بسبب كورونا هيستمر ؟

أكيد العائلات هتتلم في بيوتها أكيد ، يعني أنا متاكدة علي الأقل ان اول يوم هتلاقي الأسر مع بعض بعد كده هتلاقي بقي ايه ؟ العادي بتاعنا كل واحد بقي في بيته فاهمة قصدي ؟ لان رمضان بيكر خدي بالك بيجري. ١٠ في ١٠ رمضان أنتهي. يعني فاهمة قصدي بيكر ، فاهتلاقي بقي كله ملهي في بيته ، تعبان ، في مشاكل الاولاد ، خصوصا اليومين دول أحنا في موضوع الكورونا ده والمذاكرة والمذاكرة الأون لاين مخلية وحظر التجول مخلية فيه تحديدات شوية للأمور .

أي رأيك في الناس اللي بتنزل الشوارع وكأن ماعندهمش فكرة اصلا ان فيه كورونا ؟

ده جهل وعشوائية وعدم وعي وانا كنت كاتبة علي صفحتي علي الفيس بوك وقلت يا جماعة هنكثفوا حملات التوعية للناس اللي في الأرياف و الناس اللي هي مش فاهمة يعني ايه كورونا و فاكرينه مكرونة ، مش فاهمين يعني ايه فيرس ، مش فاهمين حجمه ، فاكرين ان هو بروباجندا إعلامية او شوية أنفلونزا انا قريت حاجات أحزنتني ،

يعني الناس في القري و في الريف بيخافوا يقولوا احنا عيانين ، بيخافوا و بيدارو ، وبيعدوا بعض و بيقابلوا بعض ، لما يبقى واحد شاب دفن أبوه مسن وهو الساعة ٢ الناس تدفنه ده يبقي اسمه ايه ؟! ده يبقي اسمه جهل مننا كشعب ، التوعية كل طول النهار في التليفزيون ،

وتوعية طول النهار في إذاعة القرآن الكريم وتوعية من الفنانين وتوعية علي الفيس بوك و توعية علي كل النواحي ، الناس حتى بتحط ستيتيوس علي الواتساب وناس بتطلع لايف ، نعمل ايه تاني توعية ؟ يا جماعة لازم يبقي فيه وعي ، الأردن دلوقتي زيرو حالات لانهم عملوا حظر كامل و قفلوا علي نفسهم ، صفر كورونا ، أحنا عايزين نوصل كده صفر ، باْذن الله

إيمان أيوب تفتح قلبها لـ عالم النجوم وتبوح بطقوسها الرمضانية
النجمة إيمان ايوب

غلق المساجد في شهر رمضان .. مع أم ضد ؟

والله انا مع الهشتاج اللي فعلوا الأزهر واللي فعلته الدولة و أنه بيقول بيتك هو مسجدك ، أنت تقدر تصلي التراويح في بيتك مادام في وباء مش عايزين ناس تموت ولا ناس تبقي ضحايا وبيتك مسجدك ، تأم نفسك وتأم أولادك و تأم أسرتك ، بيتك هو مسجدك انا مع الهاشتاج ده جدا

طبعا الفنانة الجميلة إيمان أيوب معروفة بخفة دمها ، فلو هتعملي برنامج مقالب تحبي تعملي مقلب في مين ؟

أعمل في رامز ، لان أحنا في حياة الجوهري رامز كان هارينا واحنا شغالين مع يسرا كان هاريني انا وماما الله يرحمها ، ماما أستويت كل الصواريخ و كل المقالب كانت بتحدف علي رأسها وكل حاجة مرة شعرها ولع ، بسبب صاروخ من رامز ، فا احنا استوينا و اتهرينا من رامز

إيمان أيوب تفتح قلبها لـ عالم النجوم وتبوح بطقوسها الرمضانية
إيمان وإبنتها عائشة

شوفنا صورة لبنوتك الجميلة عائشة هل لو حبيت مجال التمثيل هتشجعيها على ده ؟

دي حبيبتي ربنا يحميهالي يارب .. بصي والله هي موهوبة جدا و صوتها حلو بتغني وبتمثل وعندها مواهب كتير يعني بالجينات ، عارفة الجينات عندها بالوراثة بس هي حابة تكون إعلامية ، يعني حابة تكون إعلامية يكون لها بروجرام خاص بتقدم فيه محتوي هي بتحبه ، يعني زي بنت شريف منير كده قدمت محتوى حلو هي نفسها تعمل حاجة يبقي ليها فكرتها وفي نفس الوقت تبقي بتخاطب الناس ، لان هي مش حابة اوي أنها تمثل بس هي موهوبة وصوتها حلو و بتغني وبتمثل بس هي حابة تكون إعلامية ،

ما هي أحب الأعمال إلي قلب إيمان أيوب ؟

بدايتي طبعا حياة الجوهري مع يسرا ، فيلم العشق وهو مع شريهان لان هو ترشيح شريهان شخصيا ليا و ده شئ بعتز به جدا ووسام على صدري ، مسلسل أمشير ، بعد الظلام تشرق الشمس ، طبعا عودتي بالبيت الكبير بال ٣ أجزء ده حاجة انا بعتز بيها جدا و بدين بيها بالفضل للاستاذ محمد النقلي لان هو اللي رجعني بعد انقطاع وغياب فترة طويلة

تحبي تقولي ايه لمحبينك وللشعب المصري بمناسبة قدوم شهر رمضان ؟

أحب أقولهم كل سنة وأنتم طيبين وبخير وبصحة وسعادة وسلام وعايزة أقولهم حبوا بعض وياريت الأزمة اللي تكون جت دي تكون تخلينا نرجع لربنا ، نرجع اننا نحب بعض تاني ، نحب بعض من قلبنا و ننقي قلوبنا و نصفي قلوبنا لان الشر مش مستاهل ، الشر مش مستاهل في النهاية كلنا منتهيين وقصص معادة ومنتهية فأتمنى ان كل الناس تاخد عظة وعبرة لأن الوباء ده مش بعيد عنهم و ده جند من جنود الله بيقول للناس يا جماعة فوقوا واعتدلوا

إيمان أيوب في سؤال كنتي متوقعة أن أنا اسالهولك ماسالتوش ؟

اه أحلامك ؟ نفسك تحقق اية ؟ نفسك أدوار ايه ما عملتهاش تعمليها

“يلا بينا”

أنا نفسي أعمل أدوار نسائية في التاريخ ، نفسي أعمل فوازير زي شيريهان ، نفسي أعمل مسرحيات استعراضية زي علشان خاطر عيونك ، أنا عملت في بدايتي خالص مع سناء يونس و سمير غانم وعلاء ولي الدين ، حاجات استعراضية وغنائية كنت ناجحة فيها الحمدلله ، و أتمني أتمني أن أنا أعمل حاجة فيها أستعراض وغنا وحاجة للطفل ، نفسي في ده ، نفسي المسرح ينهض بأن يقدم حاجات فيها برايتي فيها رسالة

السؤال الأخير ما هو الحصري في حياة الفنانة إيمان أيوب لعالم النجوم ؟

والله انا حاليا بفكر ان احنا بنعمل مشروع ست كوم صعيدي يكون فيه مواقف كتير مضحكة يعني كوميديا الموقف ان شاء الله بنحضر له إن باذن الله

وفي مسلسل البيت الكبير بيتذاع علي النهار حالًا بيجي الساعة ٧ و الإعادة الساعة ١١ وبكرة ان شاء الله أخر حلقة

 

دعاء نصر

رئيس مجلس الإدارة والمشرف العام على التحرير

مقالات ذات صلة

زر الذهاب إلى الأعلى
هذا النص خاضع لحقوق الملكية
إغلاق