الماكير العالمي محمد عشوب: علاقتي كانت قوية بمعمر القذافي والملك حسين وبيل كلينتون
كتبت / مايسة عبد الحميد
أقيم مساء أول أمس ندوة رحلة في وجوه مصرية بحضور كلا من الماكير العالمي والمنتج السينمائي “محمد عشوب” والفنان خالد علي والفنانة سهير رجب وذلك بنادي ليونز ليدرز برعاية حاكم المنطقة الليونزية 352 الدكتور إبراهيم درويش وأدار اللقاء الخبير السياحي أستاذ محمد فخري.
في بداية الحوار توجه الأستاذ محمد فخري بتعريف بسيط عن الماكير العالمي محمد عشوب قائلا: “العالمي دكتور محمد عشوب انت طبعا حفرت أسمك من دهب في مجال العمل السينمائي أصبحت نجما عالميا في مجال فن الماكير وصناعة السينما..
عايز أعرف السادة الحضور كيف كانت البداية ؟
“مساء الخير عليكم جميعا يشرفني اليوم أن أكون في وسط صفوه من المجتمع السكندري بتوجه بالشكر للاستاذ إبراهيم شرف على دعوته لي والحفل الكريم،
اعرفكم بنفسي أنا أسمي محمد عبد العظيم عشوب الشهره محمد عشوب خريج زراعة هتستغربوا ازاي خريج زراعة وليه في الماكير والمكياج بس هي كانت مسألة قدرية كنت محب لشخصية فنانة جميلة بشكل كبير كنت أتمنى اقابلها في يوم من الأيام وهي الفنانة المرحومة مريم فخر الدين كنت مجنون بيها كنت بجيب صورها وألصقها على الكراريس والكتب حتى في المدرسة كانوا يسموني مجنون مريم كنت ساكن في حي المنيل وهي كانت ساكنة في الجيزة كان بيني وبينها كوبري كنت بروح عند بيتها انتظرها وهي خارجه وهي راجعه وفوجئت في يوم ان السواق بتاعها بيقول لي انت كل يوم تيجي قولت له نفسي اشوفها واسلم عليها قال لي ان هي هتصور في قصر محمد علي تعالى وانا هعرفك عليه وتسلم عليها جريت على قصر محمد علي لقيتهم بيصوروا فيلم اسمه “بقايا عذراء” لشكري سرحان وسلمت عليها وتحول الإعجاب للمخرج حسام الدين مصطفى وكنت بروح التصوير واجيب له عصير لحد قبل التصوير مايخلص ونده على ماكير الفيلم وقاله علم محمد الماكياج لانه هيبقى أهم ماكير في العالم العربي .
انا من عائلة دينية والدي كان خطيب وإمام لمسجد سلطان الحلبي بالسيدة زينب وأمي ست أزهرية اروح للناس دي اقول لهم إن أنا بشتغل في المكياج والسينما أزاي؟ قعدت سنتين كنت بقول لهم إن أنا بذاكر عند جماعه أصحابي لحد ما عرفوا أني أشتغلت.
كانت فترة طويلة تعلمت فيها على يد أهم ماكير في العالم العربي وكان يعمل مع فريد شوقي لحد ما اشتغلت مع صديقتي الفنانة ميرفت أمين وكنا بنعمل وقتها فيلم “ابي فوق الشجرة” وبقت تطلبني مساعد ماكير معاها في كل أفلامها لحد ما طلبتني في فيلم كبير اكون ماكير هو كان فيلم “ابناء الصمت”
قالولي انت الماكير بتاع الفيلم اللي طلبتك ميرفت أمين واعتبر هذا الفيلم شهاده ميلاد لي لاني حصلت فيه على جائزة الدولة للمكياج”.
ازاي قدرت تكون ماكير لزعماء وملوك وتوصل مؤسسة الرئاسة والحاجة دي خلتك الماكير المميز في مصر والعالم العربي كله
السادة الحضور يريدون معرفة كيف أصبحت صديق لزعماء الوطن العربي كله من ضمنهم معمر القذافي والملك حسين والرئيس الراحل محمد حسني مبارك ؟
رد “عشوب” قائلا: ” انا كان لي طموح في وسط زملائي الماكير واحنا بنصور فيلم المماليك لعمر الشريف ونبيلة عبيد كنت في غرفة المكياج قدام المراية كنت بفكر ان أنا اعمل حاجة مختلفة عن زملائي بعيد عن عالم السينما وعالم الفن وسبحان الله أستحال وبدأوا يطلبوني في العمليات الاستخباراية لعمل تنكر لبعض الضباط القوات المسلحة وضباط الشرطة لحد ما في يوم جالي تليفون وقالوا لي محمد عشوب عايزينك تتواجد في الاتحادية بكرة 7 صباحا قلت لهم ليه قالوا لي انت مرشح تعمل مكياج لرئيس الجمهورية كنت مش عارف اعمل ايه بس اخذت الشنطة ورحت من الساعة 7:00 صباحا وانتظرت لحد 8:30 جه مسؤول دخلني قاعة كبيرة كلها تصوير وكان موجود فيها الرئيس محمد حسني مبارك وقدمني له المسؤل قال له محمد عشوب أشهر ماكير عندنا فرد الرئيس قاله ده أشهر مني كل ما بشوف فيلم أشوف اسمه رميت الشنطة واخذته بالحضن وجه حد من الأمن الرئاسي وسحب الشنطة مني وفتش في كل شئ موجود وكان في زجاجة ماء ورد بستخدمها مع المكياج بدل الماء فقط اخذها ووضعها على يده ليجربها.
وانا لما بعمل مكياج مش بعمل طبقات عشان ميبنش مكياج وعملت المكياج وقالي متمشيش غير لما تشيل الهباب اللي عملته ده
فكان كل الرؤساء اللي بيجوا القصر لازم يعملوا مكياج فده أداني الفرصه للتعرف على معظم زعماء العالم والناس اللي اتوطدت علاقتي بيهم قوي كان معمر القذافي والسلطان حسين وحافظ الاسد وبيل كلينتون معظم الزعماء في العالم كانوا بيجوا يكون في لقاءات صحفيه كان لازم اعمل لهم المكياج بتاعهم فأقيمت علاقات شخصية بيني وبين الزعماء والرؤساء على سبيل المثال معمر القذافي كان صديقي جدا وكان كل يوم بيحبس حد من الوزراء منهم وزير الاعلام وكان صديقي اسمه عبد الله منصور ولقيتهم بيتصلوا بيا ويقولوا لي خالك قبض على عبد الله منصور ورحت له وكان راجع من مصر من مؤتمر قمة وحصل مشادة كلامية بينه وبين الملك عبد الله”
