الفنان الصغير أدم وهدان “الطفل المعجزة”
إعداد وحوار / محمد محيي عامر
يسر جريدة عالم النجوم أن تلتقى بالنجم الصغير سنا والكبير فنيا والذى يتمتع بموهبة كبيرة فى فن التمثيل كما ان له قبول وحضور ينبئ بمستقبل فنى باهر ليكون من فنانين المستقبل الواعد.
معنا ومع حضراتكم اليوم آدم وهدان الطفل المعجزة .
اهلا وسهلا بك يا آدم
اهلا وسهلا بحضرتك وبجريدة عالم النجوم وانا سعيد جدا انى ضيف معكم بهذه الجريدة الجميلة واتمنى انى اكون عند حسن ظن السادة القراء.
اولا يا أدم ياريت تعرفنا بنفسك وعندك كم سنة ؟
أنا اسمى أدم وهدان وعندى 8 سنوات وبالصف الثالث وفى مدرسة اكسفورد مودرن وماما دخلتنى المدرسة بدرى وانا سنى صغير.
مين اكتشف موهبتك ومين شجعك على الدخول فى مجال الفن والتمثيل؟
ماما وجدو هم اللى اكتشفوا موهبتى وكنت دايما أمثل أدامهم بعض الأعمال اللى بشوفها فى التلفزيون وهم اللى بيدعمونى دايما وبيشجعوني.
كلمنا عن أول عمل لك هل كان بالسنيما او بالتلفزيون ومثلت أمام مين وكان شعورك ايه؟
أول عمل مثلته كان بالسنيما فيلم اسمه “خلاويص” مع الفنان أحمد عيد والفنانة أيتن عامر وكان عمرى وقتها أربع سنوات وكنت بحب كل الناس هناك وبعد كده الأستاذ خالد الحلفاوي أخدني فى حاجة تانية أمثل معه فيها.
كلمنى شوية عن مدرستك ومدرسينك وزملاءك بالمدرسة وكيف يتعاملون معك؟
أنا طبعا الحمد لله كويس جدا فى مدرستى ودايما بكون حريص أنى أكون متفوق فى دراستى ومش بركز فقط فى موهبتى ومش بخليها تعطلنى عن مذاكرتى وكل المدرسين بيحبونى وانا بحب كل اصحابي واعز اصدقائي أحمد ومصطفى وهم دائماً بيشجعوني .
لما بتمشى فى الشارع أو فى النادى بتحس ان فى ناس كتير تعرفك وبتعمل ايه لو عرفوك وطلبوا ان يتصوروا معك؟
الحمد لله فى ناس كتير لما بيشفوني بيعرفونى وبكون فرحان ومبسوط جداً لما بيطلبوا يتصوروا معى.
هل فى أعمال جديدة حتكون فيها قريبا ومع من من الفنانين؟
ان شاء الله فيلم الانس والنمس مع الأستاذ محمد هنيدي والأستاذة شريف عرفة ومسلسل الآنسة فرح مع الاستاذة ياسمين عبد العزيز .
أكيد انت مثلت مع فنانين كتير وأكيد برضه كلهم بيحبوك فهل فى فنانين بتحبهم ونفسك تشتغل معهم فى الاعمال الفنية القادمه؟
أنا طبعا بحب كل الفنانين والفنانات بس نفسى اشتغل وأمثل مع الفنان الكبير الزعيم عادل إمام ربنا يشفيه. والفنان أحمد عز والفنان تامر حسني والاستاذ الفنان محمد هنيدي.
لما تكبر وتبقى فنان كبير نفسك تكون زي مين من الفنانين الكبار؟
طبعا فى فنانين كتير عملوا أدوار واعمال رائعه نفسى اتعلم منهم كل شئ ولكن اتمنى أن أكون شخصية مختلفة. وأقدم شئ جيد وجديد يعبر عما بداخلى وبما يتناسب مع الذوق العام ونفسى أقدم أعمال تفيد المجتمع وتكون هادفة.
أدم أكيد انت بتحب الغناء وبتسمع أغانى مين من المطربين بتحب تسمع وبيعجبك غناءه؟
انا طبعا بحب اسمع الأغاني وبحب أسمع الفنان تامر حسني والفنان حماقي والفنان عمرو دياب.
ادم هل انت بتحب الكورة وبتشجع مين واوعى تقول أهلاوي ؟
انا بحب الكورة جدا وبشجع منتخب مصر بلدى اللى بعشقها واحبها وانا اهلاااوي وبحب الأهلي .
نفسك تطلع ايه لما تكبر بجانب التمثيل طبعا؟
نفسى أطلع طيار طبعا بجانب التمثيل.
كلمه أخيرة تحب توجهها لمين؟
أحب أوجه كلمة لماما ولجدو واقول لماما ربنا مايحرمها منى ولا يحرمني منها وجدو ربنا مايحرمنى منه ولا يحرمه منى واكيد بشكر حضرتك جدا جدا على انك عملت معى هذا اللقاء وانا بحبك جدا جدا وان شاء الله نكون مع بعض دائما.
وتمنياتى لجريدة عالم النجوم بالتوفيق والنجاح دائما.
