الرسام أنطون أيمن: هدفي رسم صورة واقعية اللي يشوفها يحتار دي رسم ولا صورة
حوار : أحمد الدخاخني
أنطون أيمن فايز, فنان تشكيلي شاب من مواليد 7 يوليو عام 1997 بسوهاج ويقيم الآن بمحافظة الإسكندرية والذي تخرج من كلية التجارة, بأقلامه يبدع أنطون في رسم لوحات فنية تعبيرية وأيضاً صور العديد من المشاهيرمثل صورة تجمع بين الفنانين الراحلين سمير غانم وزوجته دلال عبد العزيز, بجانب صورة محمد رمضان والإعلامية مي حلمي.
وفي حوار خاص تواصلت ” عالم النجوم” مع الفنان التشكيلي أنطون أيمن للحديث عن بداية اكتشافه موهبة الرسم وعن أنشطته في المعارض والنقاط الأخرى, كما يلي:
متى اكتشفت موهبتك في الرسم ؟
وأنا طفل كنت بحب الرسم لأن والدى عنده نفس الموهبة بس أنا مكنتش حاطط في دماغي أنى أرسم وكده لأني معرفش حاجة عن الرسم بس كنت بحب الرسم اوى فبدأت أرسم أول رسمة تقريبا في 2014 وكملتها في 2016 وده بعد تشجيع من أهلي خلصتها ونزلتها على النت طبعا مكنتش متوقع ان الرسمة هتعجب حد بس الحمد لله عجبتهم ولقيت تشجيع جامد فرحت جداً وحبيت الرسم أكتر فقررت اشتغل على نفسى اكتر فاخدت كورسات رسم علشان أنمى الموهبة أكتر فروحت كورسات في2017 والحمد لله نشكر ربنا أني وصلت لمستوى كويس في سنة وده بفضل ربنا والناس اللى وقفوا جنبى.
ما هي الصعوبات التي تواجهك أثناء ممارسة الرسم ؟
هو كان في البداية طبعا الموضوع صعب وكان فيه إحباط من أغلب الناس بيقولولي مش هتوصل لحاجة وهتضيع وقت على الفاضى والكلام ده بس أنا مسمعتش لحد وأخدت الكلام ده حافز ليا وبصيت للكلام من منظور تاني والحمد لله اللي كان بيضحك عليا في الاول بقى من أول الناس اللي بتشجعني, و شغلي بعرضه على السوشيال ميديا والحمد لله بيجيلي شغل من كل حتة في مصر وبرة مصر, انا مش بشتغل حاجة غير الرسم فربنا بيرزق إن دة دخلي الوحيد وإن شاء الله قريب هعمل معرض وبيع شغلي فيه.
من هم أكثر الناس تشجيعاً لك في حياتك ؟
أهلى وصحابي وكل الناس اللي أعرفها ومعرفهاش واقفين جنبي وبيشجعوني ودي حاجة مفرحاني جدا.
كم من الوقت تستغرق في رسم صورة ؟
كل صورة على حسب الشغل اللي فيها أنا بحب أدي الرسمة حقها في الرسم ومش بستعجل في النتيجة.
ما هي الأدوات التي تستخدمها في الرسم ؟
ألوان زيت وأقلام رصاص وأقلام فحم.
ما هو التكريم التي حصلت عليه ؟
شاركت في عدد من المعارض منهم معرض شادو, ومعرض فنون وإبداع, ومعرض ريشة ولون العالمية, ومعرض ملتقى إبداع الدولي ومعرض مجموعة ألوان للثقافة والفنون, وحصلت على عدد من شهادات تقدير ودرع تميز.
ما هي أحلامك التي تسعى لتجقيقها ؟
هدفي في الرسم أنى أرسم الصورة تكون واقعية جدا لدرجة أن اللي يشوفها يحتار دى رسم ولا صورة, أينعم المستوى دة مش سهل أوصل له بس هييجي يوم وأوصل له.
