بلاش فتنة طائفية… إحنا عندنا وحدة وطنية

كتب / عمرو فراج 

في وقت بقت فيه السوشيال ميديا مصدر كل حاجة—معلومة، خبر، إشاعة، وحتى فتنة—لازم نقف ونفكر شوية. هل إحنا بقينا أداة في إيد منصات بتغذينا باللي يفرقنا بدل ما يجمعنا؟ بلاش فتنة طائفية بجد، لأن اللي بيحصل مش مجرد كلام، ده ممكن يولع نار مفيش حد هيعرف يطفيها.

اللي اتربينا عليه في بيوتنا وفي شوارعنا بيقول إن المسلم والمسيحي جيران، أصحاب، وزمايل في الشغل والمدرسة والجيش. بيحبوا البلد دي وبيخافوا عليها أكتر من أي حد تاني. عمرنا ما كنا شعب متفرق، عمرنا ما كنا طوايف… إحنا شعب واحد بدم واحد.

السوشيال ميديا ساعات بتضحك علينا، تديك إحساس إننا في حالة حرب أهلية، وإن الناس كلها بتكره بعض. بس الواقع غير كده. اللي بيساعدك في الشارع، واللي بيطبطب عليك وقت الأزمة، مش بيسألك عن دينك.

الوحدة الوطنية مش شعار، دي حياة بنعيشها. بلاش نخلي حد يضحك علينا أو يجرّنا لصراعات مش بتاعتنا. خلونا نحافظ على اللي باقي من حبنا لبعض، ونحط إيدينا في إيدين بعض، ونقولها بصوت عالي:

“إحنا شعب واحد… ومفيش فتنة هتفرقنا.”