الفنان أندرو ميلاد “بودي” هوصل لأوسكار لإن ده حلمي و طموحي
حوار / آيه سالم
مين هو أندرو ميلاد ؟
أندرو ميلاد عياد شهرتي “بودي” مواليد سنة1998 و مواليد محافظة القليوبية و شغال مساعد أول للماكير چينو ،و من هواياتي المفضلة التمثيل و الرقص .
ما هي بدايتك الفنية ؟
البداية كانت من مسرح الكنيسة وكنت 8 سنين و كنت بشارك في مهرجان الكرازة و حصلت على أحسن ممثل 5 سنين علي مستوي الكنايس في شبرا الخيمة و 3 مرات علي مستوي الإدارة التعليمية و مره علي الجمهورية و بدأت إخراج و أنا عندي 15 سنة و كنت أول و أصغر مخرج في المهرجان كله ، و عملت عروض كتير و شاركت في مهرجانات أكتر و بعدين بدأت السعي في الخارج بعيد عن مسرح الكنيسة و شاركت في فرق حرة كتير .
ما هي الأعمال التي قدمتها ؟
بالنسبة للمسرح فاحوالي أكثر من 35 عرض شاركت فيهم كممثل دا غير العروض المقررة و حوالي أكثر من 20 عرض كمخرج أما بالنسبة للميديا شاركت في 3 أفلام قصيرة و فيلم إسموا “توكسك” بطولة راندا البحيري أما و أنا مساعد ماكير فشاركت في العديد من الكليبات و الأفلام القصيرة والمسرحيات و المسلسلات زي الإختيار 2 و خيانة عهد و اللي ملوش كبير و موسي و أمين و شركاه و ضل راجل و البيت بيتي و دايماً عامر و أخيراً الضاحك الباكي .
لماذا تفضل المجال الفني عن أي مجال أخر ؟
عشان أنا مش لاقي نفسي في أي شغل مش عارف أبقي روتيني أصحي أروح أشتغل ترجع أقعد علي القهوة و أنام و كل يوم في نفس التكرار أما مجال الفن أنت بتحب اللي بتعملوا فبتبدع فيبقي مش شغل فحس إني مش روتيني لأن كل يوم في تغير مش مجرد موظف .
إلي ماذا تريد أن تصل ؟
بإذن الله هوصل إني أكون فنان عالمي مش مجرد أكون نجم محلي لإن من صغري بحلم أخد الأوسكار في التمثيل .
ماذا يعني لك الفن ؟
الفن بقا بالنسبالي الأكل و الشرب و الأكسجين لإن فعلاً كل الناس اللي حواليا عارفين ده اللي شجعتني أجري و أسعي و بشكر والدي و والدتي لأنهم موقفوش في طريقي خالص و عمرهم ما عارضوني في أي حاجة بحبها و كانوا دايماً أول الحضور في عروضي و دايماً بيدعموني و بشكر كل اللي علموني و وساعدوني و هما چينو و بولا ماهر لإن دول أكتر ناس ساعدتني أما بقي أخر حاجة ممكن أختم بيها كان بيتقالي يابني الفن ده مش هيأكلك عيش و هو فعلاً مبيأكلنيش عيش بيأكلني بسبوسة .
