الفنان حمادة صميدة: أنا مش زعلان من إللي بيتنمروا عليا لأنهم بيدوني طاقة إيجابية عظيمة

حمادة صميدة ممثل مصري، من مواليد 21 فبراير 1982. صميدة ذو موهبة، أشتهر بأدوار البلطجي، على عكس شخصيته، فهو إنسان يحب الخير ويقدر على حد قوله “العيش والملح” وصاحب صاحبه، ظهر صميدة فى أدوار عديدة منها أدوار درامية وسينمائية، كما ظهر فى برامج تليفزيونية عديدة، ومن أبرز أعماله التليفزيونية: مسلسل (الكبير أوي)، ومسلسل (الحارة)، ومسلسل (مسيو رمضان مبروك أبو العلمين حمودة)، ومسلسل (الوالدة باشا)، ومسلسل (فيفا أطاطا)،، ومسلسل (مأمون وشركاه)، اللعبة، ومن أعماله السينمائية فيلم (بوبوس)، وفيلم (واحد صعيدي)، ثانية واحدة، اتنين في الصندوق، ومسرحية صباحية مباركة، والعديد من الأعمال الاخرى.

تلتقي عالم النجوم في حوار خاص مع الفنان حمادة صميدة ..

نشر صميدة على صفحته الرسمية بمواقع التواصل الاجتماعي “فيس بوك”:

“نجاحك بيظهرلك الإنسان الفاشل احترام وتربيه زي مبيظهرلك الشيطان ……….. من التعليقات السلبية

علي فكره انا مش زعلان من ده بالعكس لأنهم بيدوني طاقة إيجابية عظيمة قوة ودفعة جامدة أكمل وأنجح أكتر وأكتر”

وبسؤال الفنان صميدة عن ما تم نشره على صفحته الرسمية بمواقع التواصل الاجتماعي “فيس بوك” عن التعليقات السلبية .. ما الذي أثار غضبك ولماذا ؟

لا الموضوع في الأول كان بيأثر معايا .. دلوقتي مبقاش بيأثر معايا .. دلوقتي بقا بيديني طاقة إيجابية قوية كده .. دافعة للأمام خاصة بمحبة باقي الناس .. ولكن الأشخاص دول بيبقوا عينة كده بيبقى مرض عندهم ..أحنا ممكن بدل ما ندعي عليهم ممكن ندعيلهم إن ربنا يهديهم .. لإن المرض ده وباء ظهر في الناس غريب.. هو موجود من زمان بس الأيام دي بقى غريب جدا .. بس هو بالنسبالي عامل زي ما يكون مرض في جسم البني آدم وبيظهر لقدام .. وإذا كنت أنا برفع لهم الحاجات دي فأنا برفعها عشان خاطر ليهم أصحاب وليهم ناس ياخدوا بالهم منهم .. وليهم أهل يعرفوا إن كده غلط وكده عيب مفيش حد مبقاش عنده دلوقتي سوشيال ميديا .. أكيد الشخص ده له أب وله أخ وله صاحب وله ناس حواليه تعالجه من المرض ده .. المرض ده ممكن لو هو دلوقتي كاتبلي بيتنمر عليا ؛ممكن يتنمر على صحابه ممكن يتنمر على أهله فياخدوا بالهم منه يعني .. ده بالنسبالي مرض غريب ومينفعش ندعي عليه ده ندعيله إن ربنا يشفيه من اللي هو فيه .

إحساسك بعد ان قال عنك الزعيم عادل إمام “أنت مشروع نجم كبير وسيصبح لك مستقبل” ؟

هو مفيش احساس يوصف .. ولا إحساس العالم كله بصراحة يكفي الجملة اللي قالها الأستاذ .

أولا أنا بحبه جدا وبحترمه وهو مثلي الأعلى في الوسط الفني.. وهو نجم كبير وزعيم وهيفضل زعيم طول عمره .. الأستاذ عادل أمام يعني أنا فخور إني كنت في يوم من الأيام واقف قصاده ده رقم واحد.

ما الدور الذي تتمنى أن تقوم به ؟

نفسي أعمل دراما مختلفة .. نفسي أعمل متطوع في الجيش ، متغرب ؛ نفسي أعمل حاجة كده غريبة فيها دراما.. فيها اللمسة بتاعت الناس بسيطة.

ما هي أحب الأعمال إلى قلبك ؟

الإختيار

مين من الفنانين تحب إنك تعمل معاه ؟

الفنان اللي أنا أحب هو فنان جميل أوي وعمل مسلسل ناجح وهو المخرج “تامر محسن” .. يعني ده فنان بجد هو ده الفنان الأصلي.

آخر أعمال الفنان حمادة صميدة ؟

آخر أعمال ليا هو فيلم مشروع تخرج مهرجان رؤى اسمه (يوم بيوم).. اتعرض والحمد لله رب العالمين في ردود أفعال حلوة أوي .. وهو فيلم قصير وبسيط بيحكي عن قصة حياة العامل المصري .. العامل المصري ده خلف الجدران وهو الجندي المجهول.. تحياتي لأي عامل مصري .. يعني مصر هي أساس العمالة بجد هي الحياة .. الناس دي لازم تخرج للنور لإن الناس دي بتخرج نور أحنا بنعيش بيه واحنا بنمشي عليه يعني هما الحياة السكنية والمعمار والطرق وكل حاجة بجد شابو ليهم .

ومنتظر فيلم (الإنس والنمس)مع الأستاذ “محمد هنيدي” إخراج الأستاذ “شريف عرفة”.