الفنان محمد محمود لـ عالم النجوم: دوري في مسلسل عبدالبديع الطرشوخي شخصية في كل بيت
إعداد وحوار/ نهى مرسي
فنان مصري مبدع، صاحب التميز بأعماله الفنية، متزوج ولدية أسرة فنية مكونة من زوجة و 3 اولاد ولدين وبنت خريجي أكاديمية الفنون، ظهر في العديد من الأعمال الدرامية التي حازت على إعجاب الجمهور، أشاد له متابعيه بالتميز والظهور الذي يعطي جذب للمشاهد، بدأ مشواره الفني من الصغر، التحق بالعروض المسرحية من خلال مسابقات المدارس، من أبرز أعماله المسرحية: (مراتي زعيمة عصابة، دو ري مي فاصوليا، خلوصي حارس خصوصي”، وفي التليفزيون: (فارس بلا جواد، 7 شارع السعادة، علشان ما ليش غيرك، أرض النفاق”. ومن تلك اللحظات أحب الفن وازداد شغفه وحبه للفنون، بالإضافة إلى قراءة العديد من الكتب والروايات لكل من نجيب محفوظ، إحسان عبد القدوس، ويوسف إدريس، طه حسين، العقاد، وعاشق للقراءة لكل مبدعي القصص والروايات وبدأ العمل بالمسرح.
هو الفنان ” محمد محمود ” الذي أسعد متابعيه بظهوره بين محبية في جميع المناسبات والمحافل.
وكان لـ عالم النجوم الحضور واللقاء المتميز دائما، لتلقي الضوء على أحد نجوم الفن والابداع والتميز من خلال هذا الحوار ليروي لنا الفنان ” محمد محمود ” عن البدايات الفنية واجمل واصعب المواقف التي التي تعرض لها حتي وصل الي النجومية وأصبح النجم المحبوب لمتابعي الدراما المصرية.
الفنان محمد محمود نبذة مختصرة عن حياتك الشخصية؟
متزوج وعندي 3 اولاد ولدين وبنت خريجي أكاديمية الفنون كريم يعمل لدى شركة رديو الأمريكية في كندا، ومحمود ابضًا خريج معهد سينما نفس التخصص Animation نحات ويعمل إعلانات، نهال خريجة فنون مسرحية stylist معروفة جدًا بأسم نهال المصري وزوجتي مدير عام في وزارة الثقافة.
ما هي بداية المشوار الفني للفنان محمد محمود ؟
من أيام ما كان في مسرح فالمدارس الإعدادي والثانوي ، والثانوي بالتحديد كان في كل مدرسة بيحضر مخرج بيعملوا مسرحية بتتعرض أخر العام وبتدخل مسابقة الجمهورية، من هنا بدأت أحب المسرح واشعر ان مكاني هو ده يسبق هذا قرأتي من وانا طالب في إعدادي كان في عندنا مكتبة كبيرة جدًا فقرأت أدب نجيب محفوظ، إحسان عبد القدوس، ويوسف إدريس، طه حسين، العقاد، وكل الكتاب الجميلة هذه، فالقصص والروايات كنت متيم وعاشق للقراءة لهؤلاء الكتاب، وهذه كانت البذرة الأولى، ثم لما التحقت بالثانوي وبدأت أعمل مسرح، وقتها اللي كانت بيدخل مسابقة جمهورية مسرح عالمي، بنعمل رواية لشكسبير ل مولير، جانبستر كل هذا خلاني احس ان دي حاجة مهمة جدًا فعشقتها لحين ما وصلت.
في الثانوية العامة كنت بشتغل اكثر من مدرسة يعني ما بين ما بمثل هنا او بساعد المخرج هنا فضعت في الثانوية العامة ولقيت نفسي جبت مجموع دخلني معهد خدمة إجتماعية وليه مقدمتش معهد فنون مسرحية لان كنت عارف لو قدمت كنت هسقط، كان بيتقدم ألاف بيتقبل منهم عشرة، وانا معرفش حد ومفيش وسطه فدخلت معهد خدمة إجتماعية واتخرجت منه ومازال الحلم بداخلي فقدمت استعمال حق وكان كنت بقولهم انتم ناس ظلمه وانا رجل مسرح واعرف اكثر من ناس هيتخرجوا من عندكم، ولكن مش هتاخدوني فكانت النتيجة انهم خدوني في السنة دي كان في 4000 شخص متقدمين خدوا 10 انا كنت منهم كان في الدفعة دي إلهام شاهين وأحمد عبد العزيز و ماجدة زكي دول أشهر نجوم دفعتي وبعد ما اتخرجت كنت اتعينت في وزارة التربية والتعليم فتركت الوظيفة لكي أبدأ طالب من جديد في معهد الفنون المسرحية بالإضافة ان كنت كباحث إجتماعي اعطوني جدل لغة إنجليزية لان كنت جيد في اللغة وكان عندهم عجز في المدرسين فحولوني لمدرس انجليزي بالرغم من من كل ده وتركته، ماديًا كنت هكون مستريح جدا وبرستيج كويس كل ده تركته ولا همني وأبدأ من سنة اولى تاني فنون مسرحية ولعشقي لهذا المجال كنت ترتيبي كان جيد جدًا بمرتبة الشرف أربع سنوات اللي قضتهم في المعهد لحين ما اتخرجت وحولت قبل ما اتخرج اتحولت من وزارة التعليم لوزارة الثقافة روحت مسرح السلام اللي هو فرقة المسرح الحديث عملت اول مسرحية فيه بعد تخرجي بعدها بشهرين لحد ما اصبحت مدير عام المسرح الحديث بعني قضيت عمري كله فيه وده اللي اخر شهرتي فضلت ف المسرح من اول تخرجي ثم مدير عام المسرح ثم مدير عام مسرح الطليعة ثم مدير عام المسرح الكوميدي فرحلة طويلة جدًا انما الحمد لله
ما هو أصعب موقف واجهته من خلال مسيرتك الفنية؟
أبرز ما فيها كان الإحباط من وانا كنت ف المعهد كان الكل متوقع ان هتخرج هبقى حسب مقالتهم نجم نجوم مصر بيلاقوني بعمل تراجيدي وكوميدي وفجأة اصطدمت بالواقع لقيت الكل الكوميدي والتراجيدي مش كفاية وفي حاجات تانية ممكن اعملها بس هيا ايه معرفش اعملها مليش فيها انا راجل مؤمن جدا بقدراتي وموهبتي اللي حباني بيها ربنا فـ مينفعش اروح اقول لحد انا عاوز اشتغل وفضلت راضي بطلع طاقتي اللي جوايا المكبوتة على خشبة المسرح بيتفرج عليه العشرات وخلاص الي ان اراد ربنا بعد ذلك والناس بدأت تعرفني كمان اللي عطلني ان انشغلت بالسلك الاداري وكنت مدير عام لـ ثلاث مسارح فدي عطلتني سبع سنوات فهذه أهم الاحباطات او المواقف الصعبة اللي قبلتني انصدامي بالواقع والحقيقة يكفي موهبتك لا في عوامل أخرى تساعدك على بروز هذه الموهبة و انتشارها وظهورها.
ما هو أول عمل قمت به وكيف تم ترشيحك للدور؟
اول عمل بعد ما تخرجت من المعهد مباشرتًا ثم اتعينت انتقلت من التربية والتعليم لوزارة الثقافة في المسرح الحديث اللي انا اصبحت مديرة بعد ذلك عملت مسرحية اسمها 100 حلاوة، المخرج بتاعها الله يرحمه استاذ جلال توفيق والد ياسر جلال و رامز جلال شافني في امتحان البكالوريوس لان امتحان البكالوريوس كان على مسرح السلام كان مخرج في مسرح السلام ف شافني في حفلة التخرج بتاعتى كنت بعمل مسرحية كان اسمها مقالب سكابان لـ موليير فشاب الكوميديا والضحك والصالة كانت مقلوبة على بعضها من الضحك فهو بالصدفة داخل يعمل مسرحية اسمها 100 حلاوة كانت تأليف دكتور محمد. عناني الله يرحمه فمن هنا بدأت خطواتي في المسرح زي ما قولت لحضرتك اتخرجت وتعينت في مسرح الحديث الي ان اصبحت مدير عام المسرح دا كان اول عمل عملته في الفن على المستوى الاحترافي.
هل تتمنى تجسيد دور معين أو شخصية معينة من خلال السينما أو الدراما أو المسرح ؟
اه وكان هيحصل فعلا كنت عايز اعمل دور شيلوك تاجر اليهودي المرابي فى مسرحية ويليام شكسبير الي هي المسرحية المشهورة تاجر البندقية ده دور رهيب جدا جدا التاجر اليهودي المرابى فى كل مسببات الشر وعوامل الشر الي رشحني للدور ده في يوم من الايام الدكتور هاني مطاوع الله يرحمه لما كان رئيس البيت الفني للمسرح وكان عايز يعمل مسرحية تاجر البندقية على المسرح القومي كلمني الكلام ده الاكونت مدير كنت ممثل عادي كان متابعني قالي انا عايزك تجينى البيت قالي عاوز اعمل مسرحية تاجر البندقية ويليام شكسبير.
ده حلم عمري لان المسرحية دي اخدت فيها احسن ممثل وأنا طالب في الثانوي على مستوى الجمهورية الشخصية دي وانا لسه عيل قالي حلو اوي.
قال كل الي خايف منه أن الناس تحبك والمفروض الشخصية دي تكون مكروه جدا جدا قولتله لا من الناحية دي متخفش انا بكرههم اكتر منك اليهود لأن شخصية اليهود الجبار إلى مسر على أن يقطع قطعه لحم من راجل ادانه بفلوس فمردهاش في معادها فشرط عليه وقال اخد قطعه لحم من جسمك بالفلوس اللي ليه شوفي الشخصية شريرة وقاسية قد ايه فأنا خايف الناس تحبك قولتله لا متخفش لان انا مبحبهاش وده أطلعه على المسرح وبدأنا نستعد لعمل الرواية وفجأه قط
ايه الاخبار دخلنا في منطقة محظورة فهمت كده من كلامه أنها أوامر سيادية عليا طبعا انت عارفه حضرتك معاهدة السلام فمش عايزين ندخل في منطقة شائكة وتوقف ومع ذلك مازالت هذه الشخصية تراودني لحد الان شخصية رهيبة المسرح لدرجة انه كان بيكلمني الدكتور هاني مطاوع الله يرحمه اجبلك بطلة مين ليلى علوي ولا الهام شاهين كان في ضروتهم قولتله بحكم ان انا دفعت الهام شاهين أصدقاء وزملاء لو تحب تبقى الهام شوفي كنا بنتكلم في تفاصيل قد ايه مع ذلك المشروع توقف وفهمت انه أوامر سيادية عليا قالي خلاص نعوضها في حاجه تانيه ومات المشروع دي حاجه تمنيت اعملها ومازلت اتمنى اعملها.
ما هي رؤيتك لما يطرح على الساحة الفنية سواء من خلال الدراما أو السينما ؟
الساحة الفنية مازلنا نبحث عن الأفضل لما نبص على خريطة رمضان السنة دي تلقيها المائدة عامرة بمعنى كوميديا هتلاقي تراجيدي هتلاقي سسبنس هتلاقي اكشن هتلاقي مسلسلات إسلامية كويس انها بدأت ترجع تاني
المسلسل بتاع خالد النبوي رسالة الإمام أطفال هتلاقي إنما مازلنا نبحث على هويتنا ايه الفن ايه الدراما الي تصعدنا للعالمية في مقولة بتقول الأغراق في المحلية يؤدي إلى العالمية علشان كده الهندوه افلامهم لافت عل كله لأنهم عملوا نفسهم عملوا بئتهم بقى ليهم لون متميز متلقيش الشكل الدراما الهندي في اي دراما عالمية وده كان اغراق في المحلية بالتابعية يؤدي للعالمية لكن ده بقلد الغرب هبقي كوبي مش كوبي وان هيبقى اي كلام هي دي المشكلة ان احنا لما اهتمينا البيئة بطبيعه شعبنا طبيعه بلدنا طبيعة جغرافيتنا كلما اغرقنا في المحليات هتوصل للعالمية لكن ما ذلنا ضيعين من كل فيلم اغنية مش عارفين نحط ايدنا فين ايه الي يقدر يعجب الناس وبتالي بتلاقي حاجات بتفلت مش بتعجب الناس مش دي حيات الشعب المصري حياتنا كلها مش قتل وسنج ومطاوي وارهاب لا بدليل لما بنعمل قضايا جاده ومحترمة الناس بتلف حوليها زي ما شوفنا الهرشة السابعه على سبيل المثال وتحت الوصاية شوفي بقى قوه الجمال علشان كده بيقوله ايه احنا مش بنعمل الي زي الناس عوزينة احنا بنعمل ايه الناس عاوزه الأفضل مهما كانت ثقافتهم ومعيشتهم إنما لا الإنسان بفترته بيختار الأفضل وشايف ان ده أفضل وده اي كلام فعلشان كده لازم نحط ايدنا على حاجات زي كده علشان نقدر نحقق المفروض مصر تحققه كرائده في الإعلام والفن وفي العالم العربي كله.
هل وجدت صعوبة خلال تواجدك في الماراثون الرمضاني 2023 ؟
لا بالعكس كان معروض عليه أكثر من مسلسل فكان صعب اوفق كان في عندي مسلسلين “الهرشة السبعة” و”حمد الله على السلامة” وكنت ضيف شرف مع أحمد مكي حوالي 4 حلقات وكنت ضيف مع أحمد أمين في “الصفارة” في حوالي حلقتين فكانت المشكلة عندي في ان انا اقدر اعمل ده دا اللي انا رفضته اد اللي انا عملته مرتين بسبب مكنتش اقدر اعمل اكتر من كده.
ممكن تكلمنا عن مشاركتك لأعمال الدراما الرمضانية 2023 بمسلسلات ” 1000 حمدالله علي السلامة و الهرشة السابعة؟
في حمد الله على السلامة انا اشتغلت مع العدل جروب في أكثر من عمل قبل سابق وكلهم بيحبوني جدا فلما رشحوني في هذا الدور والاستاذ المخرج عمرو صلاح راجل جميل اوي انا شخصيا بعمل معاه حاليا مسلسل ل علي ربيع هيعرض الشهور القادمة بإذن الله على شاهد اسمه “نصي الثاني” فهو كنا بنشتغل في المسلسل ده فقالي انا عاوزك في مسلسل بتاع يسرا، وانا عمري ما اشتغلت مع يسرا قبل سابق إنما كنت حابب اشتغل معاها لانها فنانة محترمة جدا جدا و كل الوسط الفني كله بيحبها فقولتله طبعا انا اتمنى زائد ان كنت شايف إن إطار جديد ليسرا مختلف عن طعم الحاجات اللي قدمتها قبل سابق بشكل جميل وفاني فـ وافقت فورا وتعاقدت معاهم على هذا الأساس
بالنسبة لـ الهرشة السابعة عجبني الورق جدا بتاع مريم نعوم حسيت انها بتطرح القضية مش من وجهة نظر متحيزة للمرأة في إعادة الأدب للمرأة زي ما بيقولوا اذا كان هناك أدب المرأة أن تكون منحازة للمرأة ضد الرجل، لا لقيتها بتطرح القضية بمنتهى الموضوعية والحيادية، عجبني طريقة سردها تركيبة العلاقات الانسانية الموجودة، الدور اللي انا عملته مساحتًا مش كبير انما المخرج كريم الشناوي قالي انا هفكرك الدور ده هيعمل ايه وكان فعلا بفضل الله انا شوفت الكومنتات اللي نزلت بيتكلموا عن لحظات صمت انا عملها وفي مشاهد انا مكنتش بتكلم فيها في ناس كانت بتتكلم عليها ف ده براعة من المخرج وبراعة من المؤلفة الاستاذة مريم نعوم انها توصل الشخصيات للمتفرج في اجمل صورة وبلا تحيز فهو ده اللي نجح الموضوع، العلاقات الانسانية بقى كانت هايلة جدا، انا كنت اول مرة كنت اشتغل مع امينة خليل لقيتها انسانة محترمة جدا وفنانة راقية جدًا، محمد شاهين اشتغلنا مع بعض قبل كده في مسلسل بين “السرايات” وكنت عامل دور حلو جدا وكنا عاملين شغل حلو جدا انما باقي الناس كنت اشتغلت معاهم قبل سابق وانا كسبت الناس دي كويس جدًا
ماذا عن كواليس مسلسل بالطو… وهل وجدت صعوبة في دورك داخل العمل؟
بالعكس من اول ما قرأت الورق انا تحولت الى مستمع أو قارئ بقيت عاوز اقرأ الباقي لان لما بعتولي الحلقات مبعتوهاش كاملة زمان كنا بنعمل مسلسل 30 حلقة كنا بنروح ناخذ ورق الـ 30 حلقة كاملة فبين موقفك من الالف للياء لكن حاليا بناخد حلقتين أو ثلاثة وتتوالى بيكتبوا على الهواء تقريبًا فأنا لما قرأت أول حلقتين تحولت لـ الي قارئ وعندي شغف أعرف ايه اللي هيدور شوفي بقى لما تتحولي فـ ده دليل على نجاح الكاتب فحسيت ان ده حاجة حقيقة مش فيك ان اللي بقرأه حقيقي ودي كانت فعلا كانت حقيقة لأن الكاتب هو دكتور وهو اللي مر بالتجربة دي اصلا يعني تحسي باللي عمله ده Biography
لحياته الشخصية هو اللي كان دكتور وراح اتعين في الأرياف وبالشكل اللي انتي شوفتيه ده في بالطو فهو بالتالي كان صادق جدا ومايخرج من القلب يصل الى القلب فكانت النتيجة كنت شغوف جدا ان اعرف ايه اللي باقي ايه اللي فاضل الموضوع هيوصل لفين فداخل حابب الشخصية من البداية حابب العلاقات الإنسانية الموجودة المواقف اللي بيمر بيها وعشان كده ملقتش صعوبة بعمل الشخصية وانا سايب ايدي زي ما بيقولوا معانا مخرج جميل جدا وكان فاهم جدا عمر المهندس على الرغم انه اول تجربة ليه في الدراما، احمد عاطف البطل الدكتور يعتبر أول بطولة ليه مكنش حد يعرفه قبل كده مريم الجندي برده اول بطولة في من هنا عاوزين نقول ان الموضوع في ورق كويس وفي مخرج كويس مش شرط نجيب نجم كبير علشان يقدر يشيل العمل، لا العمل ده قلب الدنيا ونجومه شباب صغير مش معروف فكانت تجربة هايلة بالنسبالي.
ما هي الشخصية التي أحدثت لك صدى مع الجمهور.. عبدالبديع الطرشوخي / سمير المسيطر / إبراهيم ؟
ممكن علشان عبد البديع الطرشوخي اتعمل لوحده مكنش في حاجه معاه كانت الناس بتشوفه بس قبل رمضان فكان الفيدج بتاعه عالي جدا جدا سمعت وقريت وشوفت كم اعجاب بشخصية الناس بعبد البديع الطرشوخي بقى كل الناس تقول لبعض الشخصية دي عندي في الشغل، الشخصية دي عندي في المكان اللي انا فيه سواء مدرسة سواء، مؤسسة حكومية أو مستشفى شخصية عبد البديع الطرشوخي موجودة في اي مكان يعني لو بتشتغلي ف مدرسة هتلاقيها ف مستشفى هتلاقية في مصنع هتلاقيه زي ما في نماذج شريرة إنما سبحان الله في اي مكان لازم تلاقي عبد البديع الطرشوجي علشان كده أثر في الناس جدًا جدًا.
هل توجد أعمال جديدة حاليًا ؟ أو وجود أوراق تقرأ ؟
بروفات مع إسعاد يونس فيلم اسمه عصابة عظيمة بعمل شخصية حلوة جدا بس مش هحرقها طبعا وإن شاء الله في فيلم محمد هنيدي وادعيلي ان ربنا يوفقني واقدر اجمع بين الاتنين، انا في حالة ضغط عليه كبير قولتلهم نسقوا مع بعض انا تحت امركم بس انا ماضي مع إسعاد يونس الاول فهي لها الاولوية و هنيدي صديق عمري مش عاوز ازعله فرميت الكرة في ملعبهم و قولتلهم لو تقدروا تنسقوا ان معنديش مانع
هل رؤيتك كـ فنان ان الساحة الفنية تمثل أرض الواقع في الشارع المصري أم يوجد أختلاف بين التمثيل والواقع؟
مش كل اللي بيتقدم يعبر عن الواقع في مقولة عالمية بتقول “الدراما ليست محاكاة الواقع ولكن ما يجب أن يكون عليه الواقع” يعني منقدرش كل كل حاجة سلبية منجبش الحارة المصرية كلها فاسدة وبلطجه والسند ومطاوي واغتصاب وزينا محارم والكلام الفظيع ده، لا الدراما الحقيقة ليست محاكاة الواقع ولكن ما ينبغي عليه الواقع، نتجمل مش يقولك انا بعمل الواقع، أنت بتأذي المجتمع بتصدر طاقة سلبية للبشر بتطلع أجيال شايفه ان هو ده الصح ان البطل ينتصر لان هو الاقوى وهو اللي ماسك سنجه هو اللي بيقتل هو اللى بينهب، لا مش هو ده الواقع المصري في فجوة ما بين الدراما وما بين الواقع الذي نعيشه.
ما هي الأمنيات التي تسعى لتحقيقها ؟
الصحة والستر وان اكون لاخر يوم في عمري اشتغل محبش ان اقعد في البيت زي ما قعدت في البيت 30 سنة لحد ما ربنا اذن والناس بدأت تعرفني لمجرد ان كنت مكتفي بالمسرح هو دا اللي بتمناه ان ربنا يديم الصحة والستر وامارس المهنة وأقدم اللي الناس بتحبه
رسالة تحب تقدمها لجمهورك ومتابعينك من خلال جريدة عالم النجوم ؟
بقول لكل الشباب اي حد عنده طموح او موهبة ميقعدش يتفرج على اللي حواليه سواء نظرة حقد أو شايف انه مظلوم لما تكون راضي ربنا يعطيك طلاما مش بتحقد على حقد ومؤمن بقدرك ونصيبك ورزقك و في نفس الوقت بتجتهد لازم هتحقق كل اللي نفسك فيه وهذه نصيحة عامة لكل البشر.
