- جربت في يوم تسجن نفسك .. بقلم / جيهان عكاشة
جربت في يوم تسجن نفسك .. أو إنك تزهد كل الناس .. وتساند كل إللي يقابلك…؟
رغم إنك عايش محتاس
جربت في يوم تسجن نفسك…؟
أو إنك تزهد كل الناس؟
وتساند كل إللي يقابلك…؟
رغم إنك عايش محتاس؟
جربت توارب باب قلبك…
مع إنك قافله بترباس؟
جربت إنك مثلا يعني..
تتحمل وتعيش وخلاص؟
جربت في مرة إنك تقسي..
والقسوة تكون ملو الكاس؟
جربت في يوم طعم الغربة؟
جربت من الوحدة تخاف.؟
يتقطع قلبك 100 حتة..
ولاحدش دري بيك ولا شاف؟
جربت تثور ولا تغير ؟
جربت تموت من التفكير؟؟
بسهولة تزيف في مشاعرك…
وتعيش أستاذ في التزوير؟
فكرت في مرة إنك تكسر…
كل القوانين والمعايير؟
لما لقيتها كده بصراحة…
وبجد ماهيش فارقة كتير؟
جربت من النور تتهرب؟؟
وتعيش عن ذاتك متغرب؟؟؟
وتشوف بعينيك كده أحلامك …
من إيدك قاعدة بتتسرب؟؟
طب إن كنت لسه ماجربتش…
باللللللللله عليك إوعي تجرب.
