جمال يوسف: حكايتي مع الأستاذ محمد صبحي
حوار / دعاء نصر
الفنان جمال يوسف يكتب: قصتي مع مفهوم الأستاذية ومن هو الأستاذ ؟
الكلمة مثل الإنسان لها تاريخ ميلاد. ولها عمر زمني معين وهذا ما يسمونه علماء اللغة العربية باسم علم الإستعمال، الإستعمال مثلاً لقب الأستاذ هو لقب يطلق على عمالقة أي مجال غير أننا نزلنا باللقب حتى ألبسناه لمعلم أطفال إبتدائي والروضة وعلى جلالة المعلم إلا أن درجة الأستاذية درجة تفوق درجته العلمية. ومكانته الإجتماعية بكثير
الفنان جمال يوسف من هو الأستاذ في نظرك وما علاقته بالفن ؟
” كلمة الأستاذ كلمة كبيرة جدا جدا احنا وصلناها يعني الأستاذ المدرس اللي عندك في المدرسة اللي انت بتقوله يااستاذ. ومش حاسس بقيمته رغم ان هو حاجة كبيرة من علمني حرفا صرت له عبدا، وبرده الدكتور لما بيتقال عليه الأستاذ الدكتور فلقب أستاذ بيتحط لقب قبل الدكتور. واحنا في الوسط الفنى بتاعنا من اول الأستاذ نجيب الريحاني كان بيتقال عليه ايه غير نجيب الريحاني مكنش بيتقال عليه غير الأستاذ، الأستاذ يوسف. وهبي ، الاستاذ فؤاد المهندس، الأستاذ مدبولي ، الاستاذ محمد عوض ، الأستاذ محمد صبحي ، الأستاذ عادل إمام .. كلهم كان اللقب اللي بيلقبوا بيه لقب الأستاذ. ودا لأنهم مش مجرد فنانين دول علامات في الفن أساتذة في المجال ” .
الفنان جمال يوسف من هؤلاء الأساتذة إلتقيته وعملت معه ؟
“انا دخلت المسرح عند الأستاذ محمد صبحي وانا عندي 16 سنة
أول لما دخلت كنت شايف محمد صبحي ده بتاع رحلة المليون. وهيدخل يهزر معايا زي سنبل ونضحك. ونهرج …. الواقع بأة كان عكس كدة تماما – هو فعلا كنا بنضحك وبنهرج بس كان أسمه دايما في المسرح من علي باب مسرح الفردوس أو من على مسرح نيو أوبرا الأستاذ، فكلمة الأستاذ وصل دي تعبر عن. وجود الأستاذ محمد صبحي. وكلمة الأستاذ دي مش مجرد كلمة ولا لقب وبس دي جت بعد رحلة طويلة من الكفاح والعناء كنا بنشوفها ونسمعها ونحسها من الأستاذ محمد صبحي ومن المحيطين بيه “
• الفنان جمال يوسف ذكرت أن كلمة أو لقب أستاذ بالنسبة للأستاذ محمد صبحي كانت إستحقاقاً بعد عناء وكذلك ذكرت أنك دخلت إلى مسرح الأستاذ صبحي وأنت بعمر 16 عاماً فهل يمكنك أن تسرد على قرائنا تلك الرحلة الشيقة ؟
” طبعا ودا شئ يشرفني ..أنا لما دخلت المسرح عند الأستاذ محمد صبحي شفت هو ليه بيتقال عليه أستاذ هو مش أستاذ في التمثيل بس ؛ لا أستاذ في التمثيل والإخراج. والإنتاج ليه بصمته في كل عملية من عمليات إخراج العمل ديكور، ملابس، إضاءته موسيقى، حتى أجور الفنانين، بصي الأستاذ محمد صبحي حدودته كبيرة .
بس أنا كان كل اللي شاغلني وقتها إزاي وصل للنجومية دي وبقى نجم كده …
الفنان جمال يوسف بحكم قربك من الأستاذ محمد صبحي ممكن تحكي لنا عن أسرار نجوميته وما هي الدروس التي تعلمتها منه. وكذلك تحكي لنا جانباً من الكواليس التي لا يعرفها الجمهور عن الفنان جمال يوسف ؟
بصي هو أنا كنت بقعد أتأمل حياة الراجل دا وبحاول بشتى الطرق اتقمس شخصيته بداية هو شخصية رائعة. ودقيق جدا في شغله مثلاً في مسرحية. وجهة نظر أنا أشتغلت فيها في أول التحية بتاعة المسرحية طلعت انا ومصطفي شعبان ومعايا بنتين تانين اعتزلوا الفن أو مستمروش يعني وكنت أشوف الأستاذ. وهو واقف في الكواليس يشوف دخلات الممثليين وبيشوف التعامل معاهم …
بصي أنا من حلوان يعني من القاهرة مش ريفي بسيط أضواء المدينة بهرته لكن تعرف إحساس الريفي البسيط اللي بتبهره أضواء المدينة هو دا كان إحساسي لما كنت بكون مع الأستاذ صبحي في المسرح .
وكان اللي بيزود جوايا انبهاري بيه وإصراري أكون زيه ان استاذ صبحي كان يحكي لنا مأساته وتعبه أثناء المحاضرات اللي كان بيديها لنا في فن التمثيل وكنت دايما أقول لنفسي عاوز أتعب جامد أنا عاوز يبقي عندي عناء. وشقاء علشان أوصل وأبقي زي الراجل ده. واحقق الطموح اللي هو حققه.
من هنا بدأت متابعتي للاستاذ:
ومن هنا ابتديت ألاحظ عليه كل حاجة هو بيعملها ابتديت اشوف معاملته مع ولاده، بيتعامل معاهم إزاي كنت صغير في السن ومبهور بشخصية الراجل ده جدا فابتديت أشوفه بيتعامل مع كريم ابنه. ومريم بنته إزاي و مع زوجته مدام نيفين الله يرحمها – وهية.
كانت الذراع اليمين بتاعه والمساعدة ليه في المسرح. وكانت ست عظيمة بمعنى الكلمة كانت بتعمل كل حاجة واحنا كنا بنوسطها لما بيكون في حاجة صعبة مابينا. ومابين الأستاذ ومش قادرين نقولها فكنا بنقولها لمدام نيفين رحمة الله عليها – تخيل من شدة إنبهاري. ومحاولتي تقمس شخصية الأستاذ كنت بخاطب صوره اللي كانت في المسرح بكلم الصور كأن بكلم الأستاذ نفسه يعني اي حاجة انا عاوز اقولهاله مكنش بيجيلي الجراءة ان أنا اكلمه في حاجة
مش معنى كده إنه مكانش فيه بينا حوار بالعكس كان بيهز. وكان لطيف جدا. وحنون معانا تحس معاه بنوع من الدفء ويتساهل معاك جدا
في الفترة دي أنا دخلت كلية تربية نوعية شعبة موسيقي. وعايز أدخل المجال ده
من حبي للأستاذ محمد صبحي وما أشعر به معه سواء على المستوى الفني أو المستوى الإنساني كنت لم حد يعزمني علي مسرح تاني اروحه احس ان في فرق عن مسرحنا، كنت دايما اقولهم ( مسرحنا )يعني كنت حاسس ان الفرقة دي فرقتي .
من المشهور عن الأستاذ محمد صبحي الإنضباط الذي يصل لحد النمط العسكري في الإدارة .. هل شاهدت ذلك معه ؟
طبعا طبعاً عند الأستاذ والمسرح مفيش هرج، في انضباط حتى كانوا بيطلقوا علينا برة ه ان أنتم بتوع فرقة الاستاذ صبحي المدرسة الفنية العسكرية فكنت بنبسط بكده يعني كان في ناس من زميلنا مقدروش يستوعبوا الشغل مع الأستاذ ومشيوا اللي هما مش واخدين على الانضباط انا كنت منسجم بالانضباط ده وكنت بحس بارتياح نفسي في هذا الانضباط وابتديت اتعامل مع الأستاذ عن قرب كنت عايز الاقي ليه مدخل وابتديت انكشه في الهزار، اهزر معاه. وابتدى هو يستلطفني. وابتديت اروح كان مثلا ميعادنا في البروفة الساعة خمسة الأستاذ كان بيكون موجود من الساعة اثنين فابتديت اروح زي الأستاذ مابيروح اقعد في آخر كرسي. ورا وأقعد اتابعه.
وهو بيشتغل مع الديكور. ومع الفنانين اللي في المسرح واشوفه بيعمل ايه كانت حياته كلها
طيب هقولك على حاجة خطيرة جداً
مسرحية الزيارة بتاعة فريد دورينمات المؤلف الكبير كانت بطولة سناء جميل وجميل راتب وكان معانا الأستاذ مدبولي وكان معانا الأستاذ رياض الخولي. والأستاذ عبدالله مشرف طبعا والأستاذ محمود ابو زيد مجموعة كبيرة يعني .. المهم الأستاذ وهو بيحكيلنا كان بيحكي – مش وهو بيحكي ليا أنا كان بيحكي للمهندس حسين العزبي رحمة الله عليه بيقوله – انا عاوز ادخل طيارة تنزل علي المسرح كنت بقول ده كلام بيتقال فض مجالس أفاجئ واحنا في البروفات ان الأستاذ بيعمل طيارة فعلا تنزل في المسرح وتنزل مدام سناء جميل وهيا ست كبيرة وقلت هية هتنزل ازاي !…. لا وفعلا عمل الكلام ده تخيلوا !
الأستاذ ده لما بيحلم بحاجة مبيعملهاش ؛ لا ده بيفوق الحلم بتاعه:
وابتديت اخد بالي من الراجل ده زيادة وزيادة وابتدي حبي الشديد ليه يبقي كبير اوي وان انا بقيت متقمس شخصيته حتي في معاملاتي الحياتية مع اصحابي وابتديت ان انا عاوز أبقى زي الراجل ده أشتغل. وابقي فنان زيه كده بالظبط بس كل واحد له قدرات أنا قدراتي مش نفس قدراته هو عنده قدرة إبداع عالية. وبعدين هو يقدر يعمل من الفسيخ شربات حتي لو انت مش ممثل كوميديان يقدر يخليك كوميديان. وأنا شوفت ده بدون ذكر اسماء في حالات من الفنانين هما مش كوميدينات هو عملهم يكونوا كوميدينات. وهنا ابتديت أشوف بني آدم سوبر مان بالنسبالي.
الفنان محمد صبحي بالنسبالي كان سوبر مان مكنتش عاوز اسيبه ف الفن خالص كنت عاوز أكون معاه في المسرح وحصل .
بعد كده خلصت كليتي وطلبت للجيش وكنت اشتغلت معاه روايتي علي بلاطه كنت أنا وأحمد وفيق. ومصطفى برده كان معانا. وكان معانا فنانين تانين مكملوش في الوسط الفني كان معانا أشرف صالح وأمجد عابد كملوا وافترقت عن الأستاذ ورجعت عنده تاني بعد ماخلصت جيشي.
الفنان جمال يوسف لحضرتك تجربة في الإنتاج الفني ممكن تكلمنا عنها ؟
أنا لما خرجت من الجيش رجعت للأستاذ محمد صبحي. واشتغلت معاه في الإنتاج قولتله يا استاذ انا لسه مخلص الجيش وعاوز أشتغل فقالي إنت ممكن تشتغل في الإنتاج قولتله اه أشتغل في الإنتاج. واشتغلت في الإنتاج مع الأستاذ محمد عمارة والمنتج الفني الأستاذ عمرو الصيفي. وبقيت أشوف ونيس. ونفسي أمثل بس مش قادر أقوله أمثل بسبب الإتفاق اللي بيني وبينه إن أنا جاي اشتغل في الإنتاج علشان اخد فلوس أقدر اعيش بيها. وبقيت اشوف يوميات ونيس. وهي بتتمثل كل يوم شخصيات الأستاذ بيجبها وجوايا كممثل كنت متضايق بس خدت عهد بيني وبين نفسي ان انا خدت عهد مع الراجل ان انا هاجي اشتغل إنتاج ، واشتغلت إنتاج وكملنا. ونيس وكنت مبسوط برده وانا مع الأستاذ .
لكن أستاذ جمال حلمك بالتمثيل مع الأستاذ تحقق بعد كده في مسلسل علامة من علامات الأستاذ محمد صبحي وهو فارس بلا جواد !
حصل فعلا هقولك إزاي
” أعتقد إنه بشعور الأستاذ وبعد ماخلصنا ونيس لقيت الأستاذ طلبني في فارس بلا جواد كممثل. وكانت قمة سعادتي إني هشتغل وهمثل أدام الأستاذ لكن لما جيت قرأت السيناريو لقيت مشاهدي مع الأستاذ. وهو صغير وانا كان نفسي امثل معاه. وجها لوجه نفسي ابقي مع الاستاذ صبحي – هتبقي سعادة جامدة حتى ساعات أثناء تفكيري في الحاجات دي لما كنت بشوف ماما أمريكا كنت بحلم. والله كنت بحلم إن أنا أدام الأستاذ في دور معين. وكان الحلم ده بيراودني بأستمرار المهم دي كانت خطوة إن أشتغل معاه إخراج. واخرجلي المشاهد بتاعتي لكن هبقى أمثل ادامه يعني انا ابتديت الخطوة. واشتغلت معاه وكنت سعيد جدا جدا ، دور كان صغير بس اد ايه كنت فرحان بالدور ده .
الفنان جمال يوسف ممكن تكلمنا عن أظرف المواقف اللي حصلت بينك وبين الأستاذ محمد صبحي ؟
ومواقف كتير لكن كان فيه موقف يبين أد إيه الراجل دا متواضع وحبوب
كنا بنصور في بلاتوه في العزبة في شبرامنت وأنا كان معايا عربية 28. والأستاذ معاه عربية مرسيدس فكان الأستاذ يركن العربية. وكانوا ييجوا يقولوا لي الأستاذ هيركن هنا أركن بعيد علشان ماتقفلش عليه فكنت بقفل ب 28 بتاعتي علي عربية الأستاذ. وكان يطلع يشوف الحقير اللي بيعمل كده، فأقله نعم يا أستاذ انا قافل بعربيتي إنت مستقل بيها فكنا نقعد نضحك كان جو ظريف جدا.
٠الفنان جمال يوسف شرفنا بحضرتك في جريدة عالم النجوم. وفي ختام حوارنا الممتع دا نسمع من حضرتك شئ تحب تختم بيه :
” أحب أقول إن معني كلمة الأستاذ هو اللي يعرف يتعامل مع الناس إزاي، يعرف بتعامل مع الفنانين ازاي. ويعرف إن الفنان له تركيبة نفسية سيكولوجية. ،و يعرف يتعامل مع الفنانين إزاي. ويعرف يتعامل مع بتوع الإنتاج إزاي فالأستاذ دي كلمة كبيرة أوي. ومفهومي دا هو اللي كان سبب تغيري. وإن انا نضجت بدري واتعلمت حاجات كتيرة من الأستاذ محمد صبحي. وكل ما قلته لكم اليوم كان جزء من حكايتي مع الأستاذ، الجزء الباقي هحكيلكم فيه حكايتي مع الأستاذ. ودعمه النفسي ليه في مرضي. وللحديث بقية.
