- خالد العيسوي الفنان الموهوب والمتميز في حوار خاص مع عالم النجوم
- فيدوهات لبعض المشاهد التليفزيونية
خالد العيسوي : أنا صاحب صوت الشخصية الكرتونية اللي كل الاطفال بتعشقها “سبرنج بوب” بالعربي علي مدار ١٠ سنوات
حوار / دعاء نصر
خالد العيسوي ممثل موهوب ومتمكن في الأداء .. هو إبراهيم حفيد الحاج سردينه في المسلسل الشهير لن اعيش في جلباب أبي ، ودور سامي في مسلسل عائلة الحاج متولي ، ودور المهندس عادل في مسلسل قصة الأمس ، ودور حافظ إبراهيم شاعر النيل في مسلسل قاسم امين والعديد من الأدوار
خـالد العَيسوي .. خريج المعهد العالي للفنون المسرحية عام 1994.. وهو عضو بفرقة المسرح القومى .
قدم العديد من الأعمال التليفزيونية والمسرحية ومن ابرزها غير ماذكرنا من قبل مسلسلات تلال الغضب … أم كلثوم … عفوا حبيبتي.
فهو أيضا صاحب صوت الشخصية الكرتونية “سبرنج بوب” بالعربي علي مدار ١٠ سنوات
ومن أعماله المسرحية : مسرحية مرايا الكترا ، مسرحية وجها لوجه ، مسرحية ليلة مصرع جيفارا ، مسرحية الأميرة تنتظر ، مسرحية نازلين المحطة الجاية .
الفنان خالد العيسوي .. بدايتك في التمثيل كانت منذ الطفولة في المسرح المدرسي .. مين أكتشف موهبتك ؟
أنا ابتديت التمثيل من خلال مسرح ثانوي كنت في مدرسة الخديوية ابتديت أعمل مسرحة صغيرة ، كانت عن صلاح الدين الأيوبي كنت اخذ في الأول دور صغير كده وبعد كده فضلت فى البروفة احفظ كل الادوار ، اتشديت أوي للموضوع لحد مافي يوم المخرج خلاني أقرأ دور صلاح الدين الأيوبي فأعجب بيا جدا ، والناس سقفت اللي كانوا حاضرين البروفة واعطاني الدور من يومها يمكن احنا معملناش المسرحية في الاخر .
بس انا خلاص بقيت موضوع التمثيل ده في دماغي بعد كده دخلت الجامعة كلية الإعلام ، قسم إذاعة وتليفزيون و من أول يوم في الجامعة دورت علي فريق التمثيل واعدنا الاربع سنين في فريق التمثيل ، كنت رئيس الفريق بعد فترة كده يمكن من وانا في اواخر سنة اولي وفضلت أمثل في مسرح الجامعة ، لحد ما دكاترة من المعهد كانوا بيجوا المهرجانات المسرحية اللي في الجامعة هما نصحوني ان أقدم في المعهد فعلا قدمت في المعهد بعد ما خدت بكالوريوس اعلام وكملت الدراسة في المعهد درست في المعهد أربع سنين قسم تمثيل واخراج ف دي كانت البداية
خالد العيسوي خريج المعهد العالي للفنون المسرحية .. لو ماكنتش دخلت المعهد كنت تحب تدرس ايه ولو رجع بيك الزمن هتسلك نفس الطريق ؟
أنا لو مكنتش دخلت المعهد كنت دخلت ايه انا فعلا دخلت أعلام قبل المعهد ، بس برضه بيتهيألي لو مكنتش دخلت المعهد مثلا كان ممكن كان بتستغويني حكاية الطيران ، كان نفسي أبقى طيار ولو مكنتش كملت واتغير الزمن يمكن كنت دخلت حاجة زي كده و بقيت طيار سواء مدني او حربي في الجيش المصري ، جيش بلدي كنت هكون سعيد جدا لو هعمل حاجة في جيش بلدي العظيم.
بعدت عن الفن لسنوات طويلة إيه سبب بعدك؟
الحقيقة مابعدتش عن الفن ولا حاجة بس يعني أنا بتعامل شوية مع الفن بروح الهواية أنا آه محترف ، ودرست واتخرجت من المعهد ولكن انا جوايا روح الهواية زي ما أنا حبيت روح التمثيل يعني حبا في التمثيل نفسه فجوايا روح الهواية دي ، بحب أعمل الحاجة وانا مقتنع بيها وحاسس بيها وده مبيبقاش موجود كتير اوي مبيبقاش متوفر اوي ، ف ليا بعض الأعمال الخاصة اللي انشغلت بها لفترات لكن لما بيتعرض عليه حاجة بلاقيها مناسبة متترددش ان اعملها ، واقبلها وابقي موجود بس بحب أحترم الناس ، شيفاني بشكل كويس والحمد لله انطباع جميل ومحترم ف عاوز احافظ على ده .
إيه العمل اللي شاركت فيه وبتعتبره علامة فارقة في مشوارك ؟ وأيه الشخصية اللى نفسك تجسدها ؟
العمل اللي شاركت فيه وبعتبره علامة في حياتي في شوية أعمال بس انا بحب شخصية انا عملتها ، أسمها “لمن تترك كل هذا” قصة إحسان عبد القدوس وإخراج الأستاذ باسم محفوظ وسيناريو وحوار الاستاذ مصطفي محرم ، كنت عامل شخصية قريبة أوي لقلبي وكان فيها صمود للشخصية و انتقال من مرحلة لمرحلة تانية ، فمن الاعمال المحببة ليه أوي ويمكن متعرضش كتير ولكن بحب العمل ده بشكل خاص كان يشاركني البطولة الله يرحمه ، الاستاذ ممدوح عبد العليم والأستاذة سمية الالفي ومجموعة كبيرة من الفنانين.
الشخصية اللي نفسي اجسدها في شخصيات إسلامية أثرت في حياتنا شخصية خالد ابن الوليد ، شخصية عمرو بن العاص برضه أعمال وليم شكسبير ، أعمال كتيرة ليا أحب ان أنا أجسدها أتمنى ان تيجي الفرصة ، ان اعمل شخصيات زي دي في التليفزيون أو في المسرح.
مسرحية كوبري الناموس للفنان خالد العيسوي
شايف الفن حاليا زى ما كان في بداياتك ولا لا و أيه الفرق ؟
الحقيقة الفن أختلف شويتين من بداياتي لحد دلوقتي كانت المسألة أكثر صدقا واكثر احترامًا ، الأعمال كانت أكثر مصداقية شركات الإنتاج أيام وجود قطاع الإنتاج كان في هدف كان في رؤية واضحة ، المسالة اختلفت شويتين بقي السعي وراء الربح والشهرة واللي اكتر كتير ، ف لا الوضع دلوقت غير الوضع من أيام بداياتي كان الوضع ساعتها كان أفضل بكتير للفن اكتر من حاجات تانية ، دلوقتي القيم أختلفت شويتين
وزي مابقول لحضرتك انا محظوظ أشتغلت مع ناس كمان زي المخرجة القديرة إنعام محمد علي عملت معاها اكثر من عمل الحقيقة لما الواحد بيتعامل مع الناس دي بيتعلم كتير اوي ، وبرضه استكمالا للحديث فنانة بالحجم ده مخرجة بالاحساس والرقي ده ممكن شركات الانتاج حاليا تحجم عن أنها تتعامل معها وتتعامل مع ناس اقل بكتير إحساسا وموهبة ، علشان نظرية الربح ويلا بسرعة إنما دي هتقعد لسه وهتفكر تدرس وتجيب سيناريو وتقعد فترة طويلة في التصوير ، وده طبعا من أجل دقة العمل ولكن شركات الإنتاج بتستسهل شوية وميقدروش يجيبوا وحده زي مدام انعام مثلا
مين من النجوم حاليا تحب تشتغل معاه ولم يحافك الحظ حتى الأن للعمل معه ؟
الحقيقة كان نفسي جدا اشتغل مع الفنان الراحل أحمد زكي لكن ما حالفنيش الحظ يعني ، ولكن طبعا الزعيم أحب أوي ان أشتغل مع الزعيم عادل امام ربنا يعطيه الصحة وكل فنان يقدر عمله ويحترمه ، أحب ان أشتغل معاه وأتعامل معاه .
من أبرز أعمالك كانت دور إبراهيم سردينه في لن اعيش في جلباب أبي و سامي في عائلة الحاج متولي و المهندس عادل في مسلسل قصة الأمس و حافظ إبراهيم شاعر النيل في مسلسل قاسم امين إيهما أحب إلى قلبك ؟
طبعا أقرب الأعمال لقلبي طبعا برضه سردينة أقرب الشخصيات لان من الشخصيات اللي عرفت الناس بيا وقربتني منهم وبقي في بينا حب وكده الشخصية دى من أجمل الشخصيات وألطفها برضه .
بما أن الفنان خالد العيسوي عضو بفرقه المسرح القومى ومثل العديد من المسرحيات مثل مسرحية وجها لوجه و ليلة مصرع جيفارا ، ونازلين المحطة الجاية، مرايا الكترا والأميرة تنتظر ، هل تفضل العمل بالتليفزيون أم المسرح ؟
طبعا المسرح والتليفزيون، التليفزيون مهم جدا وواسع الأنتشار ف بيقدر يوصلك لقدر أكبر من المشاهدين ، ولكن المسرح متعة فعلا ، المتعة الحقيقة للفنان هيا المسرح الفنان يحس بوجوده وهو واقف على خشبة المسرح ، ف طبعا المسرح بالنسبالي حاجة مهمة جدا يعني هو الأقرب الاكيد لقلبي من اي حاجة تانية من أي وسائل تانية لان اللقاء فيه مباشر ما بين الممثل والجمهور
أيه الأمنية اللي نفسك تحققها قبل أنتهاء هذا العام ؟
والله الأمنية اللي نفسه أحققها الامنية العامة طبعا ، ان فيروس كورونا ده يلقوا له حل في الدنيا ويلاقوا مصل اي حاجة تخلي الناس تفوق شوية وتخلي الناس تخلص من المشكلة اللي في العالم كله .
الامنية الثانية ان أشوف بلدي دايما في احسن حال وشعبها في احسن حال ، وبلدنا تتقدم للأمام دايما وتبقي من أحسن البلاد واحسن الأمم بجيشها وشعبها ورئيسها يعني
والأمنية الشخصية اللي بتمناها السنة دي وكل سنة أشوف بنتي وزوجتي وأسرتي الصغيرة واهلي في احسن حال واسعد حال ، وأطمن عليهم دايما واحاول دائما ان اكون مصدر سعادة في حياتهم
العيسوي في مسلسل “من زمن فات”
في جديد الفترة القادمة وهنرجع نشوفك تانى على الشاشة ؟
بالنسبة للأعمال الفترة القادمة ان شاء تشوفوني قريب اتمنى ذلك ، وطبعا الحقيقة ارتباطاتي دلوقتي معظمها بالدوبلاج بعمل أصوات متعددة في أعمال متعددة اشهرهم طبعا شخصية سبونج بوب انا اللي بعمل شخصيته بالعربي من 10 سنوات
خالد العيسوي صاحب صوت الشخصية الكرتونية سبونج بوب
عشر سنوات او اكتر معرفش برده حضرتك تعرفي المعلومة دي ولا لا ان انا اللي بعمل صوت اسبونش بوب الشخصية الكارتونية الشهيرة دي ، واللي الاطفال بيحبوها جدا وانا بحب جدا أعمل الشخصية دي بخرج خالص عن اطاري الفني المعتاد اللي الناس بتشوفني فيه في التليفزيون حاجة تانية خالص ، والفنان كده المفروض ان يعمل أكتر من حاجة ويعمل ادوار متعددة ومختلفة وده من احب الاعمال.
تحب تقول للناس اللي بتحبك بمناسبة عيد الأضحى المبارك ؟
طبعا احب بشكل شخصي اقول لحضرتك كل سنة وانتي طيبة
واحب اقول للناس بمناسبة عيد الاضحى كل سنة وهما يارب طيبين وبخير دايما في احسن حال ويارب يشفي كل مريض وبلدنا تكون في احسن الاحوال يارب ، ومتشكر جدا لحضرتك ويارب مكونش طولت عليكي انا حاولت بس اجاوب على الأسئلة بالتفصيل وان شاء الله نلتقي دايما علي خير.
الفنان خالد العيسوي في مشهد من مسلسل “لمن أترك كل هذا”
