رقم غريب .. بقلم / الشاعر حمادة العسكري
رقم غريب عليا رن
حسيت بشوق وقلبي حن
رديت سمعت سكات حبيبي
كنت من لهفتي هتجن
سيبت السكه مفتوحه
لا بتكلم ولا إتكلم
مع إن مشاعري مجروحه
حبه جوايا معلم
سرحت في عمر كان وياه
سكت وقلبي اللي نداه
حاولت لقيتني صعب أنساه
لهواه قلبي بيسلم
في حضن سكاته بتهنى
سكاته بيلمس إحساسي
وبحكيله وبشكيله
بتنهيدي وأنفاسي
يقولوا نسيكي أقول راجع
يقولوا رماكي في مواجع
أقول هيجيني يداويني
موافقه أقول إيه المانع
واحشني صوتك ماتسلم
إفتح كلام إتصرف
قول بحبك إتكلم
قولها كتير لو تعرف
يومين فاتوا ولا وصلي
ع اللي جرالي وحصلي
رنيت صوت غريب قالي
معجب ونفسي نتعرف
مصدومه مش عارفه أتحرك
إتهز إحساسي من جوه
قفلت السكه وأنا ببكي
وبضحك وبقول مش هو
