سارة رجب لـ عالم النجوم : السندريلا عشقي وأتمنى وجود بصمتها في كل أعمالي
إعداد وحوار: سعيد المسلماني
سارة رجب فنانة شابة مميزة صممت على التألق والنجاح حيث أبدعت وتألقت في جميع أعمالها، بين المسرح والسينما والدراما، ولا تقتصر على هذا الحضور المميز فقط ، ولكن قررت أن تقدم المواهب التي لا يراها الكثير أمام عدد مع نجوم الفن والابداع ، عشقت السندريلا وتمنت وجود بصمتها في جميع أعمالها .
حضرت مهرجان صناع السعادة لتحظي بالتكريم ، وكان لـ عالم النجوم البصمة الإبداعية والفنية من خلال اللقاء مع الفنانة سارة رجب لنتعرف عن أهم وأدق مسيرتها الفنية واخر أعمالها.
ما هي رؤية الفنانة سارة رجب عن المهرجان؟
طبعا أولاً أنا برحب بعالم النجوم و برحب بيكم جميعا،طبعا المهرجان فاشون، والمهرجان جميل جدًا وكل شئ فيه جميل ومنظم من حيث الشكل العام او من خلال الفاعليات، والميكب ارتست هايلين جدًا جدًا ، والمود حلو الناس،جميلة ولطيفة، وأنا مبسوطة جدًا بوجودي في المهرجان ، وبشكرك وببارك لكل فريق العمل ولجنة التنظيم على اليوم الجميع هذل ويارب دائما موفقين.
إحساسك لحظة التكريم من خلال مهرجان صناع السعادة؟
مبسوطة وسعيدة جدًا بالتكريم الجميل هذا ودعوة الحضور نفسها اسعدتني ، ومن خلال عالم النجوم بشكر الجميلة “مادونا عادل ” المنسق الإعلامي للمهرجان علي الدعوة وفعلا في قمة السعادة بوجودي مع جمهوري والناس الجميلة دي لحظة التكريم ، بقولهم شكرا ليكم علي المهرجان والتكريم الجميل هذا
رؤية الفنانة سارة رجب للسينما في الوقت الحالي؟
بصراحة أنا مبقتش حابه السينما حاليًا. لأن مش بلاقي فيها طعم زمان ، لأن زمان وانت بتتفرج علي السينما مش انك بتتفرج علي فيلم وخلاص او قصة ، بالعكس انت بتحس انك معاهم عايش إحساسهم شامم ريحتهم، بمعني أوضح متفهم ومتابع ومترقب كل الاحداث علشان متاكد ان هيكون فيها شئ جميل من داخل عمل إبداعي.
والأجمل من كدا كان فيه تواصل صريح ومعرفه وتواصل بين الفنان وجمهوره، مثلا ” هند رستم ” كانت بتستخدم برفيوم ” كوكو شانل ” والكل عارف دا. لكن الآن في عزلة وفواصل بين النجوم والجمهور ودي حاجه ان عن نفسي مش بحبها بصراحة .
ما هو الفرق بين نجوم زمان ونجوم الوقت الحالي؟
نجوم زمان ليهم حضورهم الخاص بين جمهورهم وبين متابعيهم، مفيش حاجه اسمها اكون بعيد عن جمهوري لأن انا من غيرهم ولا حاجة ، والأجمل من كدا كان التواصل بين الفنان وجمهوره عن طريق البريد ” إرسال الجوابات كتابيا.
لكن دلوقتي في غموض في كل شئ ، ممكن فنان تشوفه على الطبيعة تكون مستغرب هو دا فعلا اللي كنت بشوفه في الاعمال كذا وكذا، ودا بيكون من أحد أسباب البعد بين الفنان وجمهوره.
ما هي العلاقة بين الفنانة سارة رجب وجمهورها ؟
أنا و جمهوري شئ واحد في بينا حب، مفيش حواجز بينا نهائي ومفيش حاجه اسمها يكون فيه فوارق بينا أو وساطة ، ومن السلبيات الحالية علي السوشيال ميديا لما تحب تتواصل مع فنان لازم مدير أعماله اولا وحاجات زي كدا كتير ، لكن روح الفنان بتكون بقربه من جمهورة ويكون بينهم خصوصية ، لان مفيش فنان من غير معجبين وجمهور ومتابعين يدعمونه ويشيدو بأعماله ويشاركوه النجاح علشان يكون فعلا نجم شباك ويكون نجم الجمهور، وممكن نعمل يوم نتجمع فيه كلنا ونتصور ونقعد مع بعض وفعلا نكون اسرة واحدة وعائلة واحدة ، ودي مجرد فكرة واتمنى تنفيذها بإذن الله.
لقب كبير وغالي جدا “سندريلا المطرية” ماذا يعني لكي؟
اللقب دا رأي الجمهور وهما اللي لقبوني بيه ، وانا سعيدة جدًا بالأسم واللقب، وطبعا سندريلا المسرح دا لقبت بيه من أ. إسلام سيد المخرج.
انا اخدت ألقاب كتير جدًا في الدنيا بس لقب “سندريلا الطرية” دي حاجة ثانية خالص، انا بحبه وبكون فرحانه جدًا لما حد بيناديني بيه لان أسم أغلى نجمة عندي الفنانة الكبيرة، “سعاد حسني” سندريلا السينما المصرية.
وكنت شاركت جمهوري بمركز شباب المطرية بتواجدي بستايل السندريلا وكان يوم جميل ، وتم توثيقة ونشره من خلال جريدة عالم النجوم.
ما تعني لكي الفنانة الراحلة سعاد حسني؟
انا بحبها جدا، من محبتي لها وحزني عليها في وفاتها ، كانت جنازتها في التليفزيون وأنا عمري 4 سنوات، جبت طقم أسود ولبسته وعياط هستيري من كتر حزني عليها.
ودي من المواقف اللي عمري ما انساها لما ماما دخلت عليه لقيتي لابسه اسود بتقولي ايه دا يا سارة قولتلها وانا بعيط وحزينه جدا “سعاد حسني ماتت يا ماما’، انا من كتر حبي لها وتعلقي بها حافظه كل افلامها كل أغانيها فعلا بعشقها مش بحبها بس،
هل توجد أعمال جاري تصوريها حاليا او اوراق يتم قراءتها؟
في فيلم جديد بصورة حاليًا اسمه “متجيب بوسة” بمشاركة باقة من النجوم منهم: الاعلامي شكري شعبان ، الفنان عمرو منصور. برعاية إسماعيل ميديا برودكشن وبرنامج حوار من قلب مصر، وطبعا للفنانة سعاد حسني جزء في الفيلم علشان فعلا انا حابه حضورها واحياء وجودها دائمًا أمامي وفي كل أعمالي.
هل عرضت عليكي أوراق لأعمال وتم رفضها ؟
ايو طبعًا اتعرض عليه أكثر من حاجه بس بتكون أوفر شوية جريئة شويتين ، للاسف انا مبعملش الشغل دا، لو الموضوع مفهوش قصة ، ومفهوش حاجه انا احسها او اكون حباها اكيد بعتذر.
وفي ناس كتير بتعلق علي النقطة دي وتقول الفنان بيعمل كل حاجه، انا لائه مش كل حاجه اعملها لا اكون مقتنعه بالشغل وبالدور على أقدر أقدمه لجمهوري اللي اتعود عليه بفكر وأسلوب وطريقة معينة ، يعني مخرجش عن النطاق او المالوف واقول الفنان بيعمل كل حاجه.
ما هي وجهة نظر الفنانة سارة رجب في الترند ؟ شئ كويس ولا مرفوض؟
الترند بشكل عام هو كويس ومش كويس ” بمعني “
الكويس فيه ان الناس تقدر تتابع كل جديد على الساحة ويكون الجمهور أقرب ما يكون من النجوم.
ولكن الوحش فيه بيكون الشائعات الاستخدام الخاطئ، كـ شبيه بقضية نيرة الكل متابع بس الوحش فيه الخوض في الأعراض ودي طبعا حاجة مش كويسة، وهو دا الفرق بين زمان ودلوقتي زمان لو في مشكله في الشارع ممكن اقف وأخلص المشكله ، لكن دلوقتي اهم شئ أخرج موبايلي واقعد اصور وانزل علي السوشيال ميديا على الترند.
تقييم سارة رجب للاستخدام السوشيال ميديا ؟
بصراحة احنا بنستخدمها غلط مش بنستخدمها بفكر ووعي، احنا بنستخدمها بدون إدراك للعواقب اللي ممكن تحصل من خلالها، السوشيال ميدا حاليا عاملة زي اللي بيدي لابنه سكينه ومش معرفة فوائدها ايه اضرارها ايه وكيفية استخدامها، بياخد السكينة ويمشي يذبح في الناس مش علشان هو عاوز كدا ، بالعكس علشان معرفش الصح ايه والغلط ايه.
وانا بتمني ورسالتي من خلال ” عالم النجوم ” تحري الدقة في نشر الأخبار والتصريحات، مش لازم تعمل الترند وخلاص، التصريح المأخوذ عن أشخاص وهميين بيعطي تأثير سلبي علي المجتمع كـ كل مش على متابعي السوشيال ميدا فقط
كل الشكر والتقدير لكل متابعي عالم النجوم الجمهور العاشق للإبداع والتميز الذي يرى ويقدر كل ما هو جديد في كل المجالات وخاصة الساحة الفنية، أتمنى لكم التوفيق دائما وبإذن الله انتظروني في أعمالي القادمة.
شكرا جزيلا لكم على وجودي معاكم
