شريف باهر وحوار من القلب عن عاداته وطقوسه وما أفتقده في رمضان

إعداد وحوار/ دعاء نصر 

شريف باهر فنان أثبت وجوده في الوسط بشكل جديد ومختلف. حيث أستطاع لفت الأنظار له منذ بداية ظهوره ، اشتهر بخفة ظله ومهاراته الفائقة في إثارة الابتسامات وتفجير الضحكات حتى لو ظهر في مشهد واحد فقط. عمل في بداياته في الإنتاج حيث كان يمتلك شركة إنتاج يشاركه فيها الفنان علاء مرسي ، بدء دخول عالم الفن عام 2011 عن طريق برنامج المقالب الشهير ماكنش يومك الذي حقق نجاحا كبيرا وقدم منه موسمين. وقدم في نفس العام مسلسل نونه المأذونه و برنامج كومبارس و توالت أعماله واشترك في العديد من الأعمال الدرامية بعدها. أبرزهم مسلسل اخت تريز فض اشتباك مزاج الخير مدرسة الاحلام فرح ليلى والبيت الكبير. وغيرهم من الاعمال التي شارك فيها و قدم عدة أجزاء من مسلسل يوميات زوجة مفروسة. وكان له تجربه مع الاطفال حيث يقدم المسلسل الكرتوني لوما والمعلم سلومه ومازال شريف باهر مستمر في العطاء الفني والمتميز.

وكان له تجربة في الكتابة هذا العام بمعرض القاهرة الدولي للكتاب في دورته ال51. و حرص على عقد ندوة على هامش توقيع كتابه الجديد “شريف باهر في مصر أم الدنيا” والذي أطلقه في شكل تلوين كاريكاتير للأطفال لتعريفهم بالحضارة المصرية تاريخ مصر العريق وإنجازات مصر في 7000 سنة، وما تملكه من مزارات.

ما الأجواء الخاصة والطقوس التي تداوم عليها في شهر رمضان الكريم؟

أكيد زى كل الناس فى شهر رمضان يركز أكثر على قراءة القرآن الكريم وبحاول بقدر الإمكان إني اختمه. الحمد لله انا ربنا كرمنى ومواظب على الصلاة في الأيام العادية فبنسبالى طقوس رمضان هيا لمة العيلة فى الفطار والسحور وكان اللمة مع الصحاب فى عزومات رمضان قبل الكورونا. وفى حاجة كمان جميلة إن كل مصر بتبقى قاعدة على الفطار فى نفس الوقت

الفنان شريف باهر ايه الشئ اللي كنت بتحبه فى رمضان زمان افتقدته في رمضان دلوقتي ؟

أبويا الله يرحمه ولمة العيلة عند جدتى الله يرحمها وكان لرمضان ريحة مختلفة افتقدناها دلوقتى كانت الشوارع ليها شكل بزينة رمضان. و الفوانيس وكمان أصوات و انوار الجوامع عند سيدنا الحسين والسيدة نفيسة و السيده زينب بجد كان له طعم تاني.

إيه أكتر أكلة بتحب تاكلها من وانت صغير أول يوم رمضان ؟ واكتر اكلة بالنسبالك بتميز رمضان ؟

لا انا معنديش اكله محدده انا بحب كل الأكل ما عدا السبانخ وعموماً أنا الاكل عندى كل يوم فى رمضان ليه ميزة وطعم. كفاية إنى هاكل بعد صيام ساعات كتير بس لازم أول يوم رمضان تكون البطة الحلوة المحمرة منورة السفرة . والأكلة اللى بتميز رمضان الطرشى والمخللات و فول السحور والزبادى.

أكتر حاجة في التلفزيون كانت بتحسسك أن رمضان أما بتتفرج عليها ؟ وايه رأيك في اللي بيتقدم في رمضان دلوقتي ؟

فوازير نيللى وشريهان وفطوطة وبرامج المسابقات ويا تليفزيونى يا ومسلسلات ليالى الحلمية ، المال والبنون كل الحاجات الحلوة دى. رأيى فى اللى بيتقدم دلوقتى والله شغل متعوب عليه وناس بتجتهد عشان تسعد الجمهور وطبعاً فرق التقدم التكنولوجي والتقنيات الحديثة والتنوع فى الإخراج والإنتاج عمل حالة جديدة ومختلفة

تفتكر هيكون في تراويح ولمة العيلة السنة دى ولا الوضع اللى احنا في بسبب كورونا هيستمر ؟

أنا عن رأيي شايف ان اللى بيحصل ده فى صالح المواطن صحيح صلاة التراويح والصلاة فى المساجد عموماً كانت من أهم طقوس رمضان لكن ربنا سبحانه وتعالى قال لا تلقوا بأنفسكم فى التهلكة والدولة حريصة جداً على سلامة المواطنين وعموماً التراويح ممكن نصليها فى البيت وتبقى فرصة للعيلة تتلم أكتر فى تأدية الشعائر الدينية كمان. بما إننا كده ولا كده قاعدين فى البيت

شريف باهر تحب تقول أيه لمحبينك وللشعب المصري بمناسبة قدوم شهر رمضان؟

كل عام وكل الناس بخير وصحة وسلام ويارب إن شاء الله رمضان يكون بداية لانفراج الأزمة إللى بيمر بيها العالم كله. وإن شاء الله نرجع تانى نتجمع ونسهر ونخرج. وترجع كل حاجة أحلى من الأول بس ياريت نصبر شوية. ونلتزم بيوتنا لحد ما ربنا يفرجها علينا وكل سنة وانتم طيبين و متجمعين على الخير ورمضان كريم.