قصيدة “بشوط الكورة” .. بقلم: خالد البسيوني
بشوط الكورة بسن رجلي
وارميها في الزاوية البعيدة
وتيجي جون.. ويقولوا حظ!
اكتب قصيدة يرددوها الناس
وتعدي جدران السجون
وأصحابي يقفوا يكشروا في وشي
ويقولوا كسر!
أجمل بنات الحي تعشقني
وأبوها -كتر خيره-
واقف يبرر سبب رفضه
ويديني عذر!
ايه اللي ينفع في الحياة يجبر بخاطري؟
يمكن قصيدتي الجايه تشهرني؟!
يمكن حبيبتي الجايه تبهرني؟!
يمكن صحابي في حتة تانيه..
هيقولوا عني چاهين
بكتب بسيط.. بس بكتب شعر
لو هي خلطة مين معاه السر؟!
لو هي غلطة مين معاه السير
يجلدني جايز يتعدل حظي..
اضرب مترحمنيش
واتوصى على كتفي
اديله جايز يلتفت ليا
ويشيل همومي مكان هموم الناس
ويحس بيا
مش حمول وخلاص!
لو مهما شوفت الدم على كتفي
أو دم نازل حتى من عيني
إياك توقف ضرب وتعيط
وتسيني تاني لكتفي.. وحداني!
ويشيل هموم الناس وينساني
كمل كمان.. رقدني في سريري
خليني أعرف مين اللي هيزورني
مين اللي هيكررها
مين اللي هيشيلني
مين اللي يمنع رجله من عندي ويبررها
كان نفسي أقدر أبقى زي الناس
أو شخص ساذج بيبيعوله العتبة
كان نفسي مفهمش الحياة حواليا
واسمع كلام الناس ويعحبني
كان نفسي مكتبش النص ده
وافضل كده .. ولا حد يحس بيا
كان نفسي اتفلسف في القصايد
والناس يقولوا في ضهري.. مجنون!
كان نفسي أشوط الكورة بسن رجلي
وارميها في الزاوية البعيدة
ويصدها الجون.
