بعد واقعة «سيدز الدولية».. نهال طايل تطالب بقانون رادع لحماية الأطفال

علّقت الإعلامية نهال طايل على واقعة الاعتداء التي شهدتها مدرسة سيدز الدولية بمدينة العبور، والتي كشفت عن تعدّي ثلاثة من عمّال المدرسة على ستة تلاميذ، مع تداول معلومات عن وصول العدد إلى عشرة أطفال.

وقالت نهال طايل خلال برنامجها تفاصيل الذي يعرض عبر فضائية صدى البلد 2: “كوني أم، فأنا حاسة بكل مشاعر الأمهات، والواقعة دي مش بس صعبة دي موجعة، أنا مش متخيلة إن أم تكتشف إن طفلها اتعرض لاعتداء داخل مدرسة مفروض تكون مكان أمان وحماية”.

وأضافت: “بقالنا سنتين، كل ما ندخل على شهور 10 و11 و12 نلاقي وقائع مشابهة. ومش فاهمة ليه من أول حادث ما طلعش مشرّع يطلع قانون رادع وواضح يحمي ولادنا؟ ليه لحد النهارده مفيش وقفة حقيقية؟”.

وتابعت طايل حديثها بالإشارة إلى ما ورد في الأعمال الدرامية قائلة: “إحنا شفنا نموذج مشابه في مسلسل لام شمسية طفل اسمه ياسين اتعرض لأذى، والفاعل رغم سنه الكبير واتخاذ كل وسائل الدفاع، اتحكم عليه بـ10 سنين سجن طيب ولادنا اللي عندهم 10 سنين ومش قادرين حتى يعبروا؟ اللي حصل معاهم جريمة مش واقعة عابرة”.

وأشارت الإعلامية نهال طايل إلى خطورة ما جرى داخل المدرسة قائلة: “المدرسة دي مش مؤسسة عادية دي حرم دراسي.. ده المكان اللي الأمهات والآباء بيودّوا ولادهم فيه وهم مطمّنين، إيه اللي خلّى الأمان ده يتهز؟ ومين سمح إن مدارسنا توصل للمرحلة دي؟”.

وشددت نهال طايل على حجم المعاناة النفسية التي قد يعيشها الأطفال قائلة: “إزاي طفل صغير يتحمل تهديد وسكينة واتقال له أوعى تقول إزاي هنعلّم ولادنا يواجهوا أو يبلغوا… وهما مش قادرين يفهموا أصلاً اللي بيحصل لهم؟”.

واختتمت نهال طايل تصريحاتها بأن هذه الواقعة يجب أن تكون “جرس إنذار” للجميع، مؤكدة: “اللي حصل مش حادثة عابرة… ده ناقوس خطر لازم نسمعه. لازم الأهالي والمدارس والدولة يقفوا وقفة واحدة، ولازم قانون واضح وقوي يحمّي أطفالنا من أي تكرار لكارثة بالشكل ده”.