أجرئ تصريحات سمية الخشاب في برنامج “حبر سري”
تقرير: ثريا الصاوي
ظهرت الفنانة سمية الخشاب في برنامج “حبر سري” المذاع على قناة “القاهرة والناس” لـ تذكر اجرئ تصريحاتها الفنية ورأي صادم في موقفها من الزواج وأسباب التغيرات في حياتها.
قالت الفنانة سمية الخشاب، أن شائعات الزواج تلاحقها باستمرار كونها من الفنانات الجميلات، معلقة: “بيقولوا عليا كده عشان لذيذة وجميلة ودمي شربات وأي حد بيعدي يجوزوني له ويطلقوني وفي حالة اضطهاد ليا، والست لما تكون جميلة بتكون معرضة للشائعات”.
وتابعت: “أنا مش عايزة اتجوز تاني وأنا كده ملكة وبالنسبة لي الزواج نظام اجتماعي فاشل، ومش بفكر في اللي فات وأنا عايشة الحاضر، زواجي من عمر كمال إشاعة تافهة وشروطي للجواز يبقى طيب ولطيف و غني وكريم ويكون مش بيشوف غيري يعني اعمى”.
ردت الفنانة سمية الخشاب على سبب عدم نجاحها بالسينما، على الرغم من أن أعمالها مع المخرج خالد يوسف حققت نجاحًا في السابق.
وترد الخشاب على سؤال “ليه ما اشتغلتش سينما بعد أفلامك مع خالد يوسف، وليه أفلامك لم تنجح؟” قائلة: “اشتغلت أفلام كتير مثل ساعة ونصف، لكن أفلام حين ميسرة والريس عمر حرب و خيانة مشروعة لم يتكرروا”.
وأكملت: “البطولات الجماعية هي اللي بتساعد على نجاح الفيلم، مفيش حد بينجح فيلم لوحده، البطل لو طلع عمره ما هينجح لوحده لازم يكون فيه مجموعة عمل متكاملة”.
وأكدت أنها لا تمانع العمل مع المخرج خالد يوسف، معلقة: “لو الورق كويس ليه لأ إيه المشكلة، أي حاجة شخصية مليش علاقة بيها ماليش دعوة باللي حصله، انا بروح الشغل واروح بيتي، مليش دعوة بأزماته الشخصية”.
و عن شعورها بالصدمة حينما شاهدت صور الفنانة شيرين عبد الوهاب وهي حليقة الرأس.
قائلة: “اتصدمت من شكل شيرين بعد حلاقة شعرها، وسألت نفسي الست كانت زمان لما بتحلق شعرها أوتقصه كان بسبب أن جوزها مات في الحرب والتصرف اللي عملته شيرين له تفسير نفسي”.
وتابعت سمية: “شيرين كانت من الممكن أن توصل رسالة بأنها عايزة تنتهي من حياة تعبت منها وأصبحت في طي النسيان لافتة إلى أن هذا رد فعل طبيعي أن تتخلص من شعرها أو ان رد فعلها كان نفسي عنيف بدون تفكير ولخبطة”.
وعلقت: “في كل الأحوال محدش يستاهل أن تتخلى شيرين عن شعرها وشيرين جميلة بشكلها واحساسها وهي هتتخطى المحنة واللي جاي أحلى مليون مرة من اللي فات واحنا بنعشقها”.
الجدير بالذكر أن شاركت سمية الخشاب في الماراثون الرمضاني الماضي بمسلسل “موسى” مع الفنان محمد رمضان، اخراج محمد سلامة، وشارك في بطولته سيد رجب، منذر رياحنة، فريدة سيف النصر، هبة مجدي، رياض الخولي، عبير صبري، محمد ريحان.
