أخر شهور .. بقلم / حمادة العسكري
أخر شهور
وجعت قلبي بزياده
أيوا عملت إباده
قطعت سبل النجاه
قل الظهور
والرغبه في الكلام
مابقاش عندي إهتمام
آه بأمور الحياه
عالم ربي شاهد
العين شافت مشاهد
سابت بصمه وعلام
بعافر آه وبقاوح
شايل هم لاوح
قلبي وفلت الزمام
وبقيت
عايش وحدي في ركن بعيد
عايز يومي يفوت بسلام
أغمض عيني وأعرف أنام
مش حاسس بذرة خوف
قسيت
وربي كتبلي عمر جديد
ياعالم بكره جايب إيه
معنديش اللي أبكي عليه
مؤهل آه لأي ظروف
آن الآوان
أعيد تاني حساباتي
وأخرج من حياتي
كل اللي إتخلى عني
الوقت حان
أخد الخطوه وأبدأ
أقوم من تاني وألحق
اللي متبقي مني
عايش دور البطوله
ضحوا بيا بسهوله
خلوني مثال وعبره
صدمه تجر صدمه
شوفت الصبح عتمه
زنقوني في خرم إبره
وبقيت
عايش وحدي في ركن بعيد
عايز يومي يفوت بسلام
أغمض عيني وأعرف أنام
مش حاسس بذرة خوف
قسيت
وربي كتبلي عمر جديد
ياعالم بكره جايب إيه
معنديش اللي أبكي عليه
مؤهل آه لأي ظروف
