أضلاع مثلث الارتباط.. منحنى العلاقات..مؤشرات الانفصال
كتبت الإعلامية: أمل خليل
لو انتوا مرتبطين عن حب وفجأه انفصلتوا مع انكم لسه بتحبوا بعض ايه اللي حصل ادي للانفصال؟!!!
بعد ما نبص للصورة ونركز فيها واحنا هاديين بنشوف تفاصيلها اكتر وبنعرف نشوف نفسنا لو احنا مش فيها.
اول حاجة ادركتها ان الحب شئ عظيم ومصدر قوة وهو اول سبب يخليك تخوض التجربة ومع شوية صمت وانصات لصوتك وانت بتقرا الى انت شايفه بتكتشف ان لواحده الحب مش كافى لازم يكون موازى ليه تفاهم واحترام.
مثلث اضلاعه الثلاثة لازم يكونوا حاضرين.
طيب حبينا بعض وده ضلع هيخلى الدنيا لطيفة فى بدايتها لكن فى النص مش هيكون هو اهم ضلع هيجى قبل الحب التفاهم والاحترام.
لية التفاهم اهم؟
علشان بوجوده هتقدر تفهم ان العلاقة الانسانية لها منحنيات ( اى علاقة على فكرة )
( منحنيات العلاقة )
بتبدأ من فوق اعلى نقطة وتستمر شوية وتنزل وتطلع وتنزل اكتر لحد اوقات بتنزل للصفر وتستمر شوية.
وممكن تطلع تانى او يقرروا الاتنين ينهوها.
بتبتدى اى علاقة بشغفها وحبها وجديدها تنبهر بالحالة بروايحها وتبدأ تظهر مشاكل حياتية بتحصل او اختلافات عادية ضغط نفسى على الطرفين بيزيد وشحن.
اما من العلاقة او خارجى.
ملل وفتور اى كان الى بيحصل من اسباب مختلفة لكن ديمآ النتيجة بتكون ان منحنى العلاقة اخد مجراه ( الطبيعي على فكرة )
وبينزل وممكن ينزل اكتر لحد ما الاتنين يقرروا يطلعوه تانى او ينهوه.
الى هيقدر يعدى الازمات دى هو التفاهم والاحترام المتبادل مش المشاعر.
احنا بنحب بس اوقات بنكون مقتنعين اننا صح وبنعنف اللى بنحبهم ف حاول تفكر بعقلك مش بمشاعرك علشان الدنيا تستمر.
ولازم تكون مدرك ان السمع مهم ده التزام اخلاقى انت بتلتزم بيه تجاه الطرف التانى بكونك وافقت تكون شريك ف العلاقة حتى لو متقالش لفظى.
لازم تسمع شريكك مش بس تسمعه لازم تنصت ليه للكلام الى مبيتقالش حاول تعرفه وتشاركه مخاوفه.
( فى رأى ده اصعب التزام اخلاقى ممكن تاخده فى حياتك فى اى علاقة )
ولازم تكون ناضج كفاية وتكون العلاقة ناضجة علشان ممكن يكون الطرف التانى بيعانى من نفس الازمة انه مش قادر يتكلم ولا يسمع وقتها بيكون لها حلول زى البريك
…
فى 4 حاجات لو لقيتهم موجودين او حاجة معينة بدأت تظهر لازم تركن مشاعرك خالص وتبدأ تتعامل بحرص شديد لان دى مؤشرات الانفصال.
_ الانتقاد الغير بناء المستمر:
وهتلاقى ديمآ بيتم الانتقاد على حاجات فى شخصية الطرف التانى من اساسياته مش من سلوكياته
_ التحقير من الطرف الاخر:
تحقير اهتماماته وتفكيره وشغله والقصد منه التقليل والاهانة.
_ الدفاعية:
وهو انك بتلاقى طرف ديمآ بيبرر اعذار وبيستقبل الشكوى ب شكوى عنده اساليب عظيمة لتغير الموضوع وانه يحولك انت الغلطان .
_ القمع :
إللي هو محدش هيتكلم غيرى وانا بس إللي صح وملكش حق تتكلم وانا هنهى الحوار دلوقتى وبمزاجى
حاول تشوف نفسك قبل اى ارتباط قادر تدخلها ولا لاء؟
فكروا كويس انتوا ناضجين كفاية ولا لاء؟
هتقدروا تتفاهموا ولا لاء؟
هتستحملوا نزول المنحنى وتطلعوه تانى ولا لاء؟
هتحترموا بعض طول الوقت ولا لا؟
