أنا المكتوب .. بقلم: الشاعرأحمد إبراهيم النجار
بناديكِ وأعيش الحلم
ف عينيكِ
وأسهر طول لياليكِ
وأسمع قلبى جوايه
بهمسة شوق بيحكيكِ
يا روح الروح
يا ساكنة فى عروق دمى
يا مكتوبة على جبينى
وعلى قلبى
بعيش أيامى انا ليكِ
ولو لحظة
يغيب عنى حنين حبك
بعيش غربة لياليكِ
واااااااااااه م الشوق
ومن بُعدك وبتشوّق
حنان قلبك وبشتاقلك
فى كل ثانيه أناديكِ
ده أنا العايم بأشواقى
فى بحر عينيكِ الحلوين
وأنا الساكن ما بين رمشين
وأنا المكتوب على جبينكِ
وأنا الحالم ما بين شطّين
أنا العاشق بقالى سنين
بهمسة حب أناديكِ
يا روح الروح
يا سكنه دمى وكيانى
ده أنا العاشق
وروحك فيا عشقانى
ولا نسيتك ولا بنسى
حنين حبك يا وخدانى
وسكنانى
وحبك كل أوطاني
بعيش دايب أنا فيكِ
بعيش يومك بلهفه وشوق
لا أنا نايم ولا صاحى
ولا دارى
بعيشك حلم فى منامى
بعيشك كل أيامى
على الواقع
وساكنه كل احلامى
ومكتوبه فى أشعاري
بحرف الشوق بغنّيكِ
ومرسومه على قلبى
ولا غيرك فى يوم تانى
أنا المجنون بأشواقى
وأنا المفتون وانا الحاكى
وأنا الواصف بأشواقى
بحبك حب مش هادي
ولا عادى
بعيش أحلامى أنا بيكِ
ولو غبتي فى يوم لحظة
يذيد الشوق ويتحول
فى داخل قلبى بركانى
أنا مسلّم وأنا المهزوم
بسهم عيونك الجارح
وأنا السكران
بعطر هواكِ السارح
أنا بكرة وأنا يومك
وأنا أمبارح
وأنا السهران لياليكِ
أنا المكتوب على جبينك
أنا وردك فى بستانك
أنا شوقك وأنا فرحك
وأنا المكتوب علَشانك
أنا نبضك وأنا روحك
أنا ليكِ
بقلم الشاعر المصري
أحمد إبراهيم النجار
