إبراهيم أبو العطا: أبويا جاله جلطة لما دخلت الفن وقالي هتصرف فلوسي على الهشك بشك؟

أكد الفنان إبراهيم أبو العطا، رفض والده التام لدخوله الوسط الفني، حيث أنه كان الولد الوحيد وسط شقيقاته ووالده أعده ليرث تجارته.

وقال إبراهيم أبو العطا، في لقائه مع الإعلامية إنجي هشام، في برنامج “المنسي” المذاع عبر شاشة قناة “هي”: أنا والدي كان رافض التمثيل، ولما عرف طردني من البيت لأن أنا ولد وحيد على 3 بنات، وأبويا كان تاجر كبير في دمياط، وقالي أنت هتضيع فلوسي على بتوع الهشك بشك؟، والدي جاتله جلطة فيها، وأنا قعدت سنة عندي اكتئاب لأني عايز أمثل.

وتابع: أبويا قالي لو عايز تمثل سيب كل الفلوس اللي معاك وروح وريلي الشيخ البتع ينور مقامه، وده مثل عندنا في دمياط، واتحديته وجيت القاهرة، والقاهرة قاسية جدًا على الغريب، أنت جاي متعرفش حد ولا ليك أهل ولا أصحاب، وداخل في دوامة، وفلوسي خلصت كان معايا 1700 جنيه، وأمي وأنا خارج طبقت غويشة وحطتها في إيدي بدون ما أبويا ياخد باله، وقالتلي لو الزمن مال بيك بيعها، وبيعت عربيتي وهي كانت السرير والمكتب والشقة بتاعتي، وبيعت فيها حتة حتة علشان أعيش.

وأضاف: كنت بتحدى نفسي أني مش هرجع دمياط إلا يا إما وأنا ناجح، أو هرمي نفسي في النيل وترجع جثة لـ دمياط، والحمد لله والشكر لله نجحت، والناس كانت بتقول لأبويا اعتبره بنت زي باقي إخواته وقعده في البيت، وأبويا كان بيقولي أنت عايز تمثل ليه ما عندنا فلوس ومعروف في دمياط، قولتله أنا عايز الناس تفتكرني زي إسماعيل ياسين، لما أموت أفضل موجود مش سيرة وماتت واتدفنت في التراب.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.

https://youtu.be/-c6yYkXL1jE?si=tE_RemRsi2eQV10D