إلهام شاهين رئيس شرفي للدورة الـ 26 لـ مهرجان تري كور الفرنسي للأفلام القصيرة
أعلنت إدارة مهرجان تري كور الفرنسي للأفلام القصيرة جدًا، عن اختيارها لـ إلهام شاهين كرئيس شرفي للدورة الـ 26 اللي هتقام في مصر، في أول أسبوع من شهر يونيو الجاي، وهتستمر لمدة 10 أيام.
تشمل مسابقات المهرجان عروض المسابقة الدولية ومسابقة VS فيلم والندوات والورش السينمائية الخاصة بالأفلام القصيرة جدًا اللي مش بتزيد مدتها عن 4 دقايق.
وقالت “إلهام” إن المهرجان مميز كونه الأول من نوعه اللي بيجمع في مسابقاته بين السينمائيين المحترفين والهواة وإن الشرط الوحيد للمشاركة هو جودة العمل.
وقالت الدكتورة ريم لطفي، الممثل الرسمي للمهرجان، إن دورة السنة دي فيها مفاجآت كتيرة هيتم الإعلان عنها قريبًا، وكمان هيكون في مسابقة دولية خاصة بمصر هيتم الإعلان عن فتح باب المشاركة فيها خلال الأسابيع الجاية، ده غير المسابقة الدولية اللي بتعرض 30 فيلم دولي حول العالم في نفس التوقيت.
مهرجان تري كور هو مهرجان فرنسي دولي للأفلام القصيرة جدًا اللي مش بتتجاوز مدتها 4 دقايق وبيستضيف عروض دولية سنوية عددها حوالي 30 عرض فيلم، وكانت مصر من أوائل الدول اللي بتستضيف عروض المهرجان من 2015.
