إنجي شرف: فيلم إسماعيلية رايح جاي مكنش في منتج عايز يكمله

كشفت الفنانة المعتزلة إنجي شرف، تفاصيل دخولها الوسط الفني، مؤكدة أن شخصيتها في فيلم إسماعيلية رايح جاي كان بمثابة تميمة حظها في التمثيل.

وقالت إنجي شرف، في لقائها مع الإعلامية إنجي هشام، في برنامج “المنسي”، المذاع عبر شاشة قناة “هي”: الإعلانات كانت فقرة مش كبيرة في حياتي لكنها كانت مهمة، وأنا أخدت ميس ايجيبت في آخر سنة ليا في المدرسة، وجالي عروض أنزل على غلاف المجلات في الجامعة، وجه مخرج اسمه وطلبني في إعلان والموضوع بدأ.

وتابعت: المؤلف أحمد البيه رشحلني لفيلم إسماعيلية رايح جاي، وأنا كنت صغيرة وبلعب وعيني كانت على التمثيل وقالولي في كاستينج لفيلم لـ محمد فؤاد وهنيدي، ورحت أعمل الكاستينج ودوري كان أكبر من كده، وسبحان الله الفيلم ده على قد النجاح الكبير اللي حققه ولكن مكنش فيه منتج عايز يكمله وصوروا شوية ووقفوا تمامًا، وقصوا جزء علشان الفيلم يتقفل ويتعرض، وأنا مكنتش عارفة أمشي في الشارع بسبب دوري في إسماعيلية رايح جاي، وكانت تجربة مهمة جدًا.

وأضافت: عملت فيلم فتاة من إسرائيل كان دور بطولة مع نجوم كبار، وبعدين الفنان الكبير محمود عبد العزيز الله يرحمه، هو اللي شافني ورشحني في فيلم النمس، ودخلت من فيلم رانديفو على مسلسل رجل من زمن العولمة ومطلعتش من الدراما من وقتها، وكنا وقتها فعلا مش عارفين نمشي في الشارع من نجاحه، وبعد كده مسلسل ريا وسكينة اللي فاق كل التوقعات، وحدائق الشيطان والعندليب، والحمد لله حاجات كتير اتشافت كويس وعلمت.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.

https://youtu.be/Is9DimSWfek?si=UuLgLDPk_prIxSkF