اديني عايش .. بقلم / حمادة العسكري
أنا أكتر واحد شاف وجع
كل ماأقوم من تاني أقع
مش لاقي حضن فيه أترمي
زي اللي من شجره أتقطع
أنا واحد آه ضل الطريق
كل يوم الحال يضيق
أعز حبيب وأقرب صديق
آه منهم شوفت البدع
أنا أكتر واحد إتنسى
وشاف دموع صبح ومسا
حنيتي آه قلبت قسى
من كتر الخذلان والبكى
من كتر ضعفي بقيت قوي
مابقاش ليا دراع يتلوي
جوايا حزن فيه بنكوي
يبكي القلب لو إتحكى
أديني عايش وطول ماأنا عايش هشوف
من كتر خوفي مابقتش حاسس بخوف
مطرح ما المركب هتوديني هروح
حالف أكمل يادنيا رغم الظروف
١٠٠ خاطر ليا إنكسر
مشيوا وسابوا فيا الأثر
أجمل عمر مني إتسرق
عدى قصادي لمح البصر
بضحك وف دمع عيني حايش
ببان جامد وجوايا بايش
واحد ميت في صورة عايش
وده المفيد المختصر
ياقلبي زي ماسابوا سيب
الفراق قسمه ونصيب
الغربه آه في بلد غريب
أرحم من غربه في موطنك
ياقلبي الجرح آه كبير
ذكريات وسنين كتير
ماشافوش مني إلا خير
وهو ده اللي يجننك
أديني عايش وطول ماأنا عايش هشوف
من كتر خوفي مابقتش حاسس بخوف
مطرح ما المركب هتوديني هروح
حالف أكمل يادنيا رغم الظروف
