الإعلامية إسراء عبد المجيد: وفاء الكيلاني هي مثلي الأعلى..وحلمي أكون مذيعة قناة mbc
حوار: أحمد الدخاخني
إسراء عبد المجيد, إعلامية شابة تحب دائماً تسليط الضوء على كل من يستحق من مبدعين وموهوبين وهذا ما قدمته في برنامجها التليفزيوني ” أنا والضيف ” على قناة MTC , وقدمت الموضوعات الطبية من خلال برنامج ” كشف طبي ” على قناة Mac , كما قدمت برنامج ” سر جمالك” على قناة الصحة والجمال, وتعمل كموديل في المهرجانات بجانب عملها كمذيعة, وحصلت على لقب ميس دلتا فوتوجينيك ومن ضمن 100 شخصية عربية مؤثرة عام 2019 والعديد من التكريمات, وهي عضو مجلس الوحدة الوطنية لدعم رئاسة الجمهورية لحقوق الإنسان و مكافحة الفساد بالدقهلية وعضو في الحملة المصرية للتنمية المهارية و الإعلام السياسي الإجتماعي
وفي حوار خاص تواصلت ” عالم النجوم ” مع الإعلامية إسراء عبد المجيد للحديث عن مشوارها الإعلامي ونشاطها عن أحلامها وأهدافها التي تسعى لتحقيقها, كما يلي:
احكي لنا عن بداية مشوارك في العمل في مجال الإعلام ؟
انا حضرت دبلومات في الإعلام والتنمية البشرية, ونزلت تدريب تسويق و إعداد في برامج علي قناة الحدث اليوم وبرنامج تدريبي في ستار اف ام واشتغلت في مجلة مملكتي و الحدث اليوم و مايسترو و قناة الصحة و الجمال, وأخدت ورشة ورشة خاصة بمخارج الحروف و مهارات كاميرا و مهارات التعليق الصوتى و الاعداد و التقديم البرامجى ومهارات قراءة الأخبار مع الإعلامي جورج رشاد.
هل هناك صعوبات واجهتيها أثناء سعيك نحو عملك كمذيعة ؟
أكيد كتير للأسف محدش وقف جنبي ومازال واتعودت لا أنتظر الدعم من حد, نجاح أي إنسان بيفرض نفسه علي كل الناس, اترفضت في أماكن كتير واستهزأوا بيا أكتر لأن سني صغير و اضٌحك عليا من ناس أكتر انهم هيعملولى واللي عرفته إن محدش هيتمني الخير لغيره أكتر من نفسه, بس أنا دائماً عندي يقين إن لو من كل ١٠٠ شخص ٩٠ شر و مش كويسين, أكيد في ٥ مفيش أحسن منهم , بس أنا عامةً من الناس اللي عندي يقين بحاجة إن الإنسان عليه السعي و يطور من حاله و أكيد ربنا مش هيخذله.
من هو أكثر الناس تشجيعاً لك في حياتك ؟
علي المستوى الشخصي ماما و لكن زي ما ذكرت مش منتظرة دعم غير دعم ربنا اللي فعلا مش بيرافقنى, ومش هنسي كل شخص مد إيده ليا في يوم و آمن بيا مش عايزة أنسى اسم حد بجد بس رؤساء قنوات.
من هي الشخصية الإعلامية التي تعتبريها مثلكِ الأعلى ؟
وفاء الكيلاني بحبها و بتمنى أكون زيها في يوم من الأيام.
هل فكرتي في تقديم محتوى برنامج غير الجمال والمواهب والطب مثل الأخبار والرياضة ؟
للاسف جربت و ماشوفتش نفسي, الجانب اللي بعمله مثلا زي أعمال خيرية و انى كنت بدعم مواهب سلطت عليها الضوء وإن بحب أساعد اى حد متاح المساعدة منى وأقدر أقدمها, المحتوى ده انا بحبه و ممكن مع الوقت أكتشف اني موهوبه فيه وشاطرة أكتر, وفي أعمال نفسي الناس تدعمني فيها عن موضوع أمراض الأورام وأننا نروح عدد كبير من المستشفيات ونفرح الأطفال ونساعد ذوي الإحتياجات لأن ليهم مواهب كبيرة جداً بس ملهمش فرص كبيرة, وكمان رسالتي في المواجهة والتحدي وبحب أتكلم فيها إن الست دايماً ناجحة من غير راجل وإن الأم قادرة تطلع ناس ناجحة بدليل أن أمي ربتني وهي من أعظم حاجة في الدنيا, وبهدي نجاحي اللي وصلت له لروح والدي.
هل حصلتي على جوائز أو تكريم؟
حصلت علي تكريمات عديدة خايفة انسي حاجة, حصلت علي تكريم بمهرجان ايجى فاشون ومن ضمن ١٠٠ شخصية عربية مؤثرة سنة ٢٠١٩ وحصلت على لقب ميس دلتا فوتوجينيك وحلمي أكون ملكة جمال مصر بإذن الله وأطور من نفسي في موضوع ملكات جمال مش فكرة اللقب لكن فكرة المجهود والإنسان اللي يستحق هو اللي هيوصل ودائماً البقاء للأنجح, وكُرمت من مهرجان الشرقية ومهرجان شباب شو واشتغلت في أكتر من مهرجان ومازلت بشتغل موديل,و تكريمات العديد من المجلات, و التكريم الاخير ليا كان في مؤتمر الكوتشينج في المؤسسة القومية لتنمية الأسرة و المجتمع, وعايزة أضيف إن أنا عضو مجلس الوحدة الوطنية لدعم رئاسة الجمهورية لحقوق الإنسان و مكافحة الفساد بالدقهلية وعضو في الحملة المصرية للتنمية المهارية و الإعلام السياسي الإجتماعي.
هل هناك برنامج جديد قادم الفترة المقبلة ؟
آه فيه بس مش هقدر أصرح علي أي حاجة دلوقتي.
ما هي أحلامك التي تسعي لتحقيقها ؟
حلمى أكون مذيعة في قناة mbc ونفسي أوصل لحلمى وأكون مذيعة مشهورة و أثبت ذاتى في مجالى وأشتغل و أعمل البرنامج و الأفكار اللي عايزاه.
