الإعلامية سهير شلبي تتحدث عن الطقوس والعادات الرمضانية واختلافها

الإعلامية سهير شلبي تتحدث عن الطقوس والعادات الرمضانية واختلافها

 

 

حوار / دعاء نصر

الإعلامية سهير شلبي الجميلة والمتألقة ، صاحبة الصوت المتميز والنبرة الدافئة، شخصية تجعلك تصغي لها كلما تحدثت، وتنهل من ثقافتها الكثير، ودودة ومحبة لعملها، وذات إطلالة رائعة، بدأت العمل فى التليفزيون مطلع السبعينات، وتميزت بثقافتها وأسلوبها الذي إذا وصف يقال عليه “السهل الممتنع” قدمت العديد من البرامج المهمة التى حفرت فى ذاكرة المواطن المصرى، مثل “ريبورتاج، دردشة، اليوم المفتوح”، وغيرها من البرامج. تزوجت من المذيع الشهير الراحل أحمد سمير، وأنجبت منه بنتا وولدين.. وتوليت العديد من المناصب المهمة فى ماسبيرو.

ما الأجواء الخاصة والطقوس التي تداومي عليها في شهر رمضان الكريم؟

طبعا الطقوس والصلاة والصوم وصلاة التراويح وبعدين مشاهدة بعض المسلسلات مش كلها طبعا لان العدد بيبقي كبير اوي
مش عارفة زمان كان رمضان له طعم تاني الحقيقة وشهر رمضان شهر فضيل وشهر الخير والبركة وكل حاجة حلوة الحقيقة وشهر الغفران.

ايه الشئ اللي كنتي بتحبيه في رمضان زمان افتقدتيه في رمضان دلوقتي ؟

اكتر حاجة كنت بحبها ومازالت الحقيقة بتحصل علي القناة الاولي نقل صلاة الفجر على الهواء مباشرتا والدعاء اللي عقب صلاة الفجر ده حاجة الحقيقة طقس من الطقوس الجميلة جدا اللي بيعملها التليفزيون المصري، بعد كده طبعا كانت فوازير نيللي وفوازير شيريهان وعمو فؤاد والمسلسلات الكوميدية والمسلسلات التاريخية والمسلسلات الاجتماعية الجميلة كانت ليها طعم تاني الحقيقة

وطبعا قعدت على مدى ١٢ سنة أقدم برنامج سواح و ده كان بيتذاع في شهر رمضان كل رمضان ٣٠ حلقة بين كل مكان جميل في مصر ، شرم الشيخ والعريش والغردقة ، الأقصر ، أسوان ، اسكندرية ، الواحات ، طابا ، راس محمد ، كل مكان جميل في مصر، سواح ده كان كده علامة من علامات البرامج اللي كانت موجودة و على فكرة اخذ كده مرة احسن برنامج في برامج رمضان الحقيقة الحمدلله واخد جوايز كتيرة جدا جدا في استفتاءات كثيرة جدا

إيه أكتر أكلة بتحبي تاكلها من وحضرتك صغيرة أول يوم رمضان ؟ واكتر اكلة بالنسبالك بتميز رمضان ؟

لا بالنسبة للاكل انا على الإفطار بأكل خفيف جدا لاني مقدرش أهاجم معدتي بالأكل الكثير واهم حاجة الشوربة السخنة وقمر الدين وأهم حاجة عندي الحلو. يعني ممكن اكل اكل خفيف كده وبعد كده اكل حاجة حلوة ده الاهم عندي

تفتكري هيكون في تراويح ولمة العيلة السنة دى ولا الوضع اللى احنا في بسبب فيروس كورونا هيستمر ؟

شوفي التراويح ممكن تتصلي في المسجد. و ممكن تتصلي في البيت يعني اللي عايز يصلي التراويح يصليها في أي مكان مفيش مشالغمة.

و أما عن لمة العيلة بقي يا عالم يا رب تكون الغمة تزول و ربنا يفرجها. ويجبر بخاطرنا بحق جاه النبي ونتلم لمة العيلة الحلوة دي اللي كانت علي طول بتحصل يارب ان شاء الله

الإعلامية سهير شلبي تحبي تقولي أيه لمحبينك وللشعب المصري بمناسبة قدوم شهر رمضان؟

بقول لمحبيني كل سنة وانتوا طيبين يا حبايبي ربنا يعيد عليكم الايام بكل خير وبقول لكل مصر والعالم اجمع يارب تزول الغمة ويزول الكرب ويزول البلاء ويزول الوباء يارب يارب بحق جاه النبي يزول كل كرب وترجع الايام الحلوة تاني ويارب الناس بقي تتعظوتراجع نفسها بقى كده يعنى اد ايه كل واحد اتحرم من حاجات كتيرة والعالم كله اتحبس تمامًا واتقفل واغلق تماما، يارب يكون الناس تتعظ بقي وتاخد وتعيد حساباتها مرة تانية وكل سنة وانتم طيبين ويارب تزول الغمة علينا جميعًا يارب يارب والأيام الجاية تكون ايام خير و رخاء يارب وسعادة وربنا يجبر بخاطرنا جميعا