“البركات”… ميرنا زكري تحتفل بعيد ميلادها بطريقة مختلفة
كتبت/ مادونا عادل عدلي
قامت الفنانة الشابة ميرنا زكري بنشر صور من أعمالها عبر حسابها الشخصي على موقع التواصل الاجتماعي فيسبوك وعلقت عليها قائلة
متعودتش اكتب اوى عن تفاصيل حياتي لكن حبيت انه ومع سنة جديدة
اشكر ربنا و افتكر خيره اللى مهما كنت فكرت ودبرت ليالى كتير مكنتش هاحقق ابدا جزء من خطته العظيمة ليا
السنة دى بوجود ربنا معايا قدرت احقق :
مسرحية نجوم الضهر، واللى بعد سند ربنا حققت فيها نجاح “لو اقدر اسميه نجاح” على مستوى إللى شافها سواء جمهور او مخرجين او نقاد او فنانين ف “شكرا يارب”
حصل كمان السنة دى حاجة بعتز بيها جدا وهي انتمائى لكيان محترم زى نقابة المهن الموسيقية، بعد إشادة من الاغلى على قلبى النقيب والفنان العظيم هانى شاكر والمايستر محمد ابو اليزيد والفنانة نادية مصطفي وباقى استاذة وفنانين اللجنة ف “شكرا يارب”
واستكملت الفنانة… “قررت ابدأ طريق مختلف بعد 6 سنين مسرح ( 3 روايات ) وكنت متأكدة انه هاياخد سنين طويلة تاني، لكن بسرعة وفى وقت قصير جدا ربنا يبعت مسلسل ( مكنتش بخطط لده ومعرفش ازاى حصل) والاقى نفسى بشتغل مع اساتذة كبار ودور حبيته ومع مخرج احلى من المارشميللو، ولسة فيه مشاريع بتتحضر إن ربنا اراد .. يبقى اكيد اكيد شكرا يارب”
اه المسلسل اسمه ” بالطو” هاينزل قريب على watchit ابقوا شوفوه بقى
البركات مش شغل بس، ولادى وبيتى واهلى دول اعظم نعمة، ولو هما بخير يبقى كل الدنيا بخير
والسنادى كمان اكتشفت ان خلاص البنات كبرت و بقى عندى اختين، مش اخت واحدة اللى طول عمرى كنت بتمناها “بناتى اللى كانوا لسة مولودين دول” ف “شكرا جدا جدا يارب”
وقالت ميرنا… “اما الانجاز الاكبر السنة دى، هو انى اتعلمت ابعد عن علاقات سامة و مؤذية خدت من روحى ووقتى ونفسيتى وطاقتى اكتر من اللازم، اتعلمت ان سلام نفسى اغلى من اى حاجة، كسبت راحة نفسية وهدوء عظيم، كمان كسبت فيها ناس جميلة وحقيقية مخليينى كل يوم اصحى اقوله شكرا يارب
بشكر ربنا على السنة اللى عدت اولا، وكل اساتذتى اللى دعموني وعلمونى ولسة بتعلم وبتعلم منهم ثانيا .
وشكرا لكل اللى افتكرنى وعيد عليا بكلام مليان حب وطاقة جميلة انتوا غاليين اوى و بحبكم جدا جدا.
اتركها هذه السنة ايضًا.
والجدير بالذكر أن شاركت الفنانة ميرنا زكري في مسرحية نجوم الضهر مع الفنان محمد صبحي.
