الخرس الزوجي.. بقلم الشاعر: علاء عامر
أول ما يدخل البيت
يقول يا ريتنى ماجيت
مليت انا وأتهديت
ويبدأ يغير في هدومه
اللي شايله كل همومه
من الصبح لآخر يومه
ويعلق على شماعته
نرفزته ويا مشاكله
وزعيقه مع زمايله
بخلقه الضيق وضيقته
من العيشه وقلة حيلته
ودماغه توديه وتجيبه
في مليون حاجة ماتسيبه
يهرب منها في موبايله
وشوية على تليفزيونه
يمسك بايده ريموته
يقلب فى قنواته
سرحان وقاعد في هدوءه
ومراته غضبانه منه
تحكى وتزود همه
عن ابنه التلفان في دروسه
وبنته اللاعبيه الخايبة
وأمه وعمته وخالته
وأخوها الفاشل بسلامته
والعيشه واللى فيها..
من نار أسعارها وجنونها
الكاوية الكل بنارها
ولسة بتعاتب جوزها.
لابينطق بكلمة وياها
ولاحتى بيضحك معاها
ولا بيتغزل فى جمالها
وفي لبسها وقوامها..
وتقول دا سكتم بكتم
لا بينطق ولا بيتكلم
اخرس ومعايا مبلم
وبرة بيته برابنت
يغازل كل ست
صوته تسمعه كروان
تقولشى موسيقار كمان
وضحكه مع اصحابه
هو انا من اعداؤه
يرضيكوا دا الحال.؟
هو الخرس الزوجى دا حلال
ولا انا اللى بختى مال.؟!
