الفنانة رجاء حسين “الشللية والسهرات” أصبحت تتحكم فى الظهور على الشاشة
حوار: محمد محيي عامر
تتعرّض كل صناعة- على اختلافها – لأزمات ترتبط فى الأغلب بالمنظومة الاجتماعية والاقتصادية والبيئة المحيطة بها من قوانين وانظمة وتاتي على رأس هذه الصناعات صناعة السينما والدراما والإنتاج الفني بشكل عام حيث أنها الأكثر حساسية وتأثرا بما يحدث فى محيطها.. وقد تؤدي هذه البيئة بقوانينها وانظمتها إلى عرقلة هذه الصناعة وتقف عائقا أمام تطورها وانسيابيتها ..
أدار الندوة دعاء نصر
رجاء حسين نجمة وفنانة كبيرة لها من الأعمال ما يفيد طوال العمر والسينما المصرية ويفيد المجتمع المصري فنانة قديرة فنانة محترمة اشتهرت بالصدق والصراحة وأشتهرت بالأعمال الجميلة التي تعيش في أذهاننا حتى هذا اليوم حوارنا مع الفنانة الجميلة رجاء حسين.
س: حوارنا اليوم مع عالم النجوم وعن نجوم كثيرون وفنانين كبار متقاعدين في المنزل عاوزين رأي حضرتك في هذا الموضوع….
اقول اية ارد زي ما بيقولوا ولا مسألة عرض وطلب دا كلام مايمشيش لكن هيا مسألة أن كل واحد عامل لنفسه جروب بيشتغل بيه لو رجعت الحكومة تعمل قطاع الإنتاج مرة آخري كل الفنانين اللي قاعدين في بيتهم هيشتغلوا واحد يعمل سبع مسلسلات وستة قاعدين في البيوت ليه انا مش بتكلم عن نفسي بتكلم عن الزملاء عن الناس اللي تعبوا وشقوا وعملوا أسمائهم ليه يبقوا مركونين على الرف كده المفروض ان الدولة ترجع ان الدولة لو مأنتجتش مش هيستقيم الفن لأن الدولة مش بتدور لا على ربح ولا خسارة الدولة بتقدم شرائح من المجتمع اللي احنا عايشين فيه عملية التنوير والثقافة والدين حط تحت البند ده كل البنود اللي أحنا بنتمتع بيها.
س: ممكن حضرتك تعرفينا بداياتك في السينما والتمثيل؟
البدايات هي المدرسة بعد المدرسة كبرت في دماغي ان لازم أكون ممثلة، والدى كان موظف حكومة وكانوا لما بيعطوه علاوة بينقلوه فكنت في طنطا في مدرسة طنطا الثانوية للبنات انتقلت من مدرسة طنطا الثانوية للبنات لمصر علشان خاطر بابا راح الفيوم علشان تكون المسافة قريبة لوالدي سعيت أن أدخل المعهد العالي للفنون المسرحية ودخلت ونجحت وقعدت سنة اولي تانية ونجحت وأهلي عارفين ان في كلية الحقوق لكن انا لا دخلت ولا اعرفها وعلي فكرة في علاقة ما بين المحامي والممثل لان ده في ترافع الدعوة بيبرز نقاط معينة والفنان نفس الشئ لما بيمثل دور بس جت بدايتي من هنا، كنت شقية جدا ومشاغبة جدا روحت امثل رواية علي مسرح الريحاني شافني بديع خيري ضمني للفرقة بتاعته قعدت سنة المسرح القومي بعتلي فروحت المسرح القومي إلى أن خرجت على المعاش أما بداية السينما فكانت غريبة جدا عملت أدوار صغيرة في عدة افلام مكنش أدوار بطولة الى ان جاء يوسف شاهين وبدء معايا بأفلام.
س: كيف عرفك المخرج يوسف شاهين؟
علشان جوزي سيف عبد الرحمن عمل معاه فجر يوم جديد وبالتالي كنت مرافقة ليه فعرفني عن هذا الطريق فأسند إلى دور في العصفور ثم توالت الأفلام معه ولي الشرف أن اشتغلت مع يوسف شاهين 5 افلام، أنها الممثلة الوحيدة في مصر اللي عملت معاه 5 افلام.
س: ازاي الفنانة رجاء حسين بتقضي يومها؟
زي اي ست بيت بغسل بطبخ بمسح بكنس مع احفادي سعيدة جدا، عاشقة جدا للتنس وكرة القدم وانا بتفرج علي التنس بشوفه بشكل غير طبيعي، وبتفرج علي بعض البرامج اللي فيها بعض الاخبار لا اقترب مطلقا لأي قناة معادية لمصر لو جت السماء على الأرض حذفهم من عندي.
س: ما هي الأكلة الأقرب للفنانة رجاء حسين الجديرة بعملها؟
انا علي اكمل الاستعداد تقولي علي اكلة عايز تاكلها انا اعملهالك ان شاء 10 آكلات انا ست مطبخ وست بيت شاطرة جدا، بحب كل الاكل، بس بحب الباذنجان المقلي جدا والفلفل وعملهم بخل وتوم المسقعة بعشقها والعدس في الشتا وشوربة العدس بحب الطعمية جدااا، انا شعبية متأكلنيش فرخة آكلني صينية مسقعة اكلني طعمية وسلطة باذنجان مخلل.
س: ما هي آخر أعمالك ومن مدة اد اية؟
أخر أعمالي في السينما مع إلهام شاهين “يوم للستات”
اخر اعمالي في التليفزيون كان “واحة الغروب” 2015 ثم تقاعدت في البيت
س: ما هو السبب لتقاعد الفنانة رجاء حسين في البيت؟
ممكن كبرنا وعجزنا ملناش في الأجواء ملناش في عدة أشياء وبالتالي الاقي ادواري بتتوزع ممثلة بتعمل 7 مسلسلات والاقي ليه فيهم دور، سميرة عبد العزيز ليها دور، عفاف شعيب ليها دور،فردوس عبد الحميد ليها دور، مش عارفه اعدلك مين ولا مين ومع ذلك هيا واحنا قاعدين في البيوت بنقشر بصل
س: ما هو رأي حضرتك في الأعمال الفنية الراهنة المتواجدة في الساحة حاليا؟
أكون صادقة معك وانا طول عمري مشهورة بالصدق مش على المستوى الذي كان على أيامنا في بعض الأفلام حلوة جدا جدا، مش بطالة وفي بعض الأفلام لا وده ينطبق على المسلسلات يطبق في السينما أن الفن نزل عندنا من الكرف من فوق لتحت للاسف الشديد.
س: لو حبنا نلوم المتسبب اللي احنا فيه نلوم مين؟
الدولة، أدت الفرصة ليهم لو كانت الدولة تنتج كان استقام الحال، يرجع الدولة يعني قطاع الإنتاج مع اتحاد الإذاعة والتليفزيون يرجعوا تاني اللي قاعدين في بيوتهم الكتاب منهم يسري الجندي، فيصل ندا، محمد جلال عبد القوي، مجدي صابر مش عايزة انسى حد
المخرجين محمد فاضل، إنعام محمد علي، جمال عبد الحميد مش عايزة انسى أسماء مخرجين كبار جدا قاعدين في بيوتهم وده غلط وفي ناس من الفنين اللي كانوا بيشتغلوا معانا من مصورين لعمال الكاميرا لكل الأشياء قاعدين في بيوتهم انا اعرف ناس باعت عفش بيتها عشان تاكل.
س: هل العلاقات ليها دور في اقتباس بعض الناس لجميع الأدوار؟
اكيد طبعا وده سؤال مهم الشلالية هي الي عملت كده محدش يقول مثلا احمد بدير قاعد في البيت،احمد ماهر قاعد في البيت، احمد عبد العزيز، احمد سلامة، شريف منير دا مصيبة دا كاينة الناس دي كلها في ناس كثيرين جدا، رشوان توفيق، عبد الرحمن أبو زهرة كل دول قاعدين في البيوت حرام.
س: هل هو تقصير من المنجيين أو البحث عن أشياء،أخرى غير الفن الاصيل؟
انا مش مندمجة فيها لكن اكيد في عدة اشياء اخري انا معرفهاش.
س: يعني أسماء كبيرة جدا حضرتك ذكرتيها ومنهم حضرتك مين اللي يقدر يقوم بدور الناس دي؟
المنتج والمخرج بيكون ليهم رؤية، النهاردة المخرج كان بيكون ليه رؤية مع الكاتب النهاردة فين المخرج من الكاتب، الإنتاج لا بيهمه كاتب ولا مخرج وبيفرض رايه وبيفرض سيطرته هتقدر تقوله ايه هو الممول هو اللي بيدفع للكل وبالتالي هي المسالة كده لكن قطاع الانتاج اول الحكومة مش بتبص لده وهيا بتبص للصالح العام ككل ثانيا اين البروفات، المسلسلات كان بيتعملها بروفات كثيرة للغاية وبالتالي بناخد من بعضينا علشان كده المسلسل كان بيطلع منور مزهزه الناس بتطلع تتفرج عليه لكن النهاردة كل واحد في سكة،
س: ما هو شعور الفنان الكبير واللي قدم افلام ومسلسلات يشهد لها التاريخ وهو بيشاهد ما نراه هذه الأيام؟
هو انا مش بتفرج أو اي زميل ليه من اللي ذكرتهم بيكون قاعد للمتعه وبيكون قاعد اسف عدم وجود الكلمة، عدم وجود الكادر الحلو عدم وجود الشخصية وإحساسها وايه قيمتها لعدة الأفراد اللي جانب منه بيكون قاعد اسف وندمان وحزنان وللاسف الشديد احنا مش عاوزين نقول عملنا تقدر تجيب إمبارح لا، تقدر تجيب السنة اللي فاتت لا احنا عاوزين نقول احنا بنعمل ايه زي ما سيادة الريس كده ما مسك البلد بالخراب ده عمل منها دولة جديدة ، لو قولت محمد علي عمل القناطر الخيرية، السيسي عمل قناة السويس، السيسي ربط مصر ببعضها، السيسي لم العشوائيات، السيسي زود الناس، السيسي عمل كرامة للبني آدم في ناس وسامعة ومع ذلك عمي وطرش لان مفيش انتماء للدولة.
س: الفنانة رجاء حسين بتابع أيه على شاشات الفضائية؟
نشرات الأخبار والرياضة، انا اهلاوية، علي فكرة انا بلعب كروكية للزمالك، انا بحب الزملكاوية يغلبوا أي حد إلا الأهلي،لكن يشجعهم كلهم بيلعبوا تحت أسم ايه “مصر”.
س: حضرتك الأفلام القديمة مش بتشوفيها خالص؟
بشوفها طبعا دا أنا مستمتعة بيها، ربنا يخلي ماسبيرو زمان، دي ذاكرة التاريخ،.
تعرفي حضرتك امبارح كنت في القاهرة بالصدفة امبارح وجلست في احدى الكافيهات وجدت فيلم جميل اوي اسمه” ياقوت” اول مرة اشوفه للفنان نجيب الريحاني حضرتك شوفتيه قبل كده؟ طبعا لأن انا متابعة كل فيلم ابيض واسود تلاقي كل الناس معظم الشعب المصري بيدور عليه وبيتفرج عليه.
س: ما هي احب الاعمال الي قلبك؟
كلهم اولادي مقدرش أفرق بينهم لانهم كلهم عملتهم باحساسي الحلو بمكونات الشخصية عملتهم بدمي اتفنيت فيهم عشان اطلعهم بالشكل ده، الشخصية دي علي ورق انت بتعملها لحم ودم أنت بتجسدها فده بيكون قطعة من قلبك قطعة منك، كل الادوار انا معتزه بيهم ومعنديش دور أندم عليه.
س: كلمة اخيرة في الحوار مع حضرتك، توجهيها للجمهور ورسالة للمسؤولين عن إنتاج الأفلام والمسلسلات لقطاع الإنتاج بمعنى اصح؟
ياريت الدولة لابد وان الدولة ترجع تاني للانتاج وتلم الفنانين المحترمين يشتغلوا مش معني كده ان باقي الفنانين مش محترمين حشى لله، بقول الكبار اللي كبروا احنا عاملين زي خيل الحكومة لما بنكبربيضربونا بالرصاص وده للأسف يحز في نفسنا اوي، وطالما انت عندك القدرة وتقدر تدي وتعطي بيبقي عندك احساس بالمرارة لنكران اللي انت عملته.
س: لو قولنا مين من الفنانات اليوم اللي ممكن نقول خليفة رجاء حسين؟
لا للاسف هقول لحضرتك احنا بتوع زمان مكناش بنقلد بعض كل واحد مننا كان ليه شخصية مستقلة لكن حاليا بيقلدوا بعض وداخلين لبعض قفشات.
مفيش هو في خليفة لزينات صدقي ولا فردوس محمد لا لـ فاتن حمامة لـ شادية لا لنادية لطفي لسعاد حسني اعدلك مين ولا مين مفيش خليفة، دي الشخصيات المستقلة اللي بتعمل كيانها وبتعمل التوازن مع الشخصية،لكن حاليا متعرفش فيفي من سوسو من محسنة من رجاء لكن مقدرش اقول ف احتفظ بيه لنفسي بس، يعني المعني في بطن الشاعر.
س: كلمة اخيرة من رجاء حسين للجمهور؟
بشكرهم جدا اوعوا تصدقوا ان القرش اللي خدتوا من الشغل ده هو اللي عملني، اللي عملني السادة المشاهدين ده راس مالي هما اللي بيحكموا عليه وهما اللي ادوني اسمي وهما اللي ادوني القيمة والقامة وعلشان كده مش برضي اشتغل اي حاجة لازم احترم العقليات دي ولازم ادم لهم بالشئ اللي يليق بحضرتهم ويليق برجاء حسين،لازم اقدم العمل العظيم،، وبشكر الجمهور العظيم شكرا جزيل علي حبه ليه.، بيسعدني لما فعلا بقابل حد من الجمهور ويشكر عمل من اعمالي.
