الفنانة عنبر: ليه توقفت عن العمل سؤال مهم جدًا نفسي ألاقي له إجابة

إعداد و حوار / نهى مرسي

الفنانة عنبر ممثلة مصرية، أشتركت في العديد من الأعمال وقامت بعدة أدوار مختلفة تركت بصمة قوية وتعلق بها الجمهور لأتقانها في العمل وأحترافها في التمثيل ، عملت مع كبار النجوم منهم الفنان عادل أمام والفنان أحمد زكي والفنان محمد صبحي، حيث كانت بدايتها مع التمثيل من خلال مسرح الجامعة، حيث شاركت في العديد من المسرحيات، قبل أن تشارك عام 1996 في مسلسل (سر الأرض). ثم شاركت في العام التالي بمسلسل (حكايات مجنونة) وفيلم (صمت الخرفان)، توالت بعدها أعمالها مابين السينما والمسرح والتلفزيون، من أبرز أعمالها أنا وهؤلاء، السندريلا، حاحا وتفاحة، عفاريت عدلي علام، شطرنج، عفاريت محرز، مملكة الجبل، في إيد أمينة، والعديد من الأعمال الأخرى.

وفي لقاء خاص مع الفنانة عنبر في عالم النجوم أجرينا معها هذا الحوار:

– الفنانة المتميزة عنبر متى كانت بدايتك الفنية ؟

بدايتي الفنية كانت سنة اواخر 1996 دخلت الفن وكنت بشتغل في السياحة مجال الفنادق بعد ما اتخرجت من الجامعة، كلية الحقوق جامعة القاهرة.

– تميزتي في مسلسل عدلي علام بطولة النجم عادل إمام كلمينا عن كواليس المسلسل ؟

كواليس مسلسل (عفاريت عدلي علام) مع النجم الكبير “عادل إمام” والمخرج “رامي إمام” أنا لما اترشحت للدور اترشحت من خلال الأستاذ رامي وطبعاً بموافقة النجم الكبير الأستاذ “عادل إمام” ، ولما بعتولي ورق المسلسل عشان أقرأه عايزة أقولك إن كان في مصادفة غريبة جداً إن أنا قبلها الحمد لله ملتزمة بالصلاة. وأنا بصلي قولت يارب بقا هو أنا مش هقف قدام “عادل إمام” في يوم من الأيام يارب تكتبلي نصيب إن أنا أشتغل معاه حتى لو دور صغير.. والله العظيم ده حصل. قبلها بفترة في نفس السيزون إللي انا عملت فيه مع “عادل إمام” عايزة أقولك لم يمر أسبوعين تلاتة لقيت تليفون من الشركة بيقولولي إن أنتي مرشحة معانا في (عفاريت عدلي علام) مع النجم “عادل إمام” عايزة أقولك إن أنا صرخت في التليفون وقولت ايه ده بجد وقولت انت كريم وجميل أوي يارب.. فعلا ربنا جميل.

أكملت عنبر حوارها قائلة:

ربنا سبحانه وتعالى كل شئ مقدر وكل شيء مكتوب فلاقيتهم بيعرضوا عليا قولتلهم طبعا طبعا ابعتولي الورق بعتوا الورق. ولاقيت الدور لطيف والدور جميل. كفاية إن هو مع نجمنا الكبير اللي أي حد بيتمنى إن هو يشتغل معاه فوافقت على طول ورحت واتفقت .. أول يوم دخلت اشتغلت فيه كان نجمنا الكبير مكانش موجود .. أما ابتديت بقا الديكور الرئيسي بتاعي وكده قابلته وسلمت عليه .. عايزة أقولك كنت خائفة جدا جدا ومكنتش برضه أعرف أستاذ رامي لإن كان أول مرة أشتغل معاه .. لكن بأمانة هو حد جميل وعلى خلق وفنان محترم جدا ومهذب. وبجد أنا سعدت وشرفت بالعمل جدا جدا جدا معاه إنسان بمعنى الكلمة وفنان محترم وفنان كبير ربنا يكرمه. وفعلا كنت سعيدة جداً جداً بالتجربة .. بالنسبة لنجمنا الكبير “عادل إمام “أول ما شافني سلمت عليه وقعد يتكلم لاقيته حد لطيف جدا.

– رغم كل النجاح اللي حققتيه علي مدار ٢٢ سنة لماذا توقفني فجأة عن العمل ؟

أيوة جينا للسؤال المهم، بصي أنا هكون صريحة جدا وكويس إنك سألني السؤال ده لإنه أنا متوقفتش ولا حاجة مش أنا اللي توقفت على فكرة .. وفي حالة دهشة من ساعة (عفاريت عدلي علام) رغم الإطراء. ورغم الحمد لله إعجاب الجميع بالدور اللي أنا عملته والتقديرات والتكريمات فيه. وإن كل الناس أثنت عليه. وكل الناس كانت بتتكلم عنه، إلا إنه بجد أنا لغاية دلوقتي مش عارفة ليه بنموت المواهب الكويسة مش هتكلم عن نفسي بس إن أنا موهبة كويسة.

لأ في أساتذة كبار نجمات ونجوم رجالة وستات فنانين وفنانات محترمين جدا وأستاذة كبار للأسف هما مش موجودين خالص على الساحة دلوقتي ، مش عارفة لحساب مين، لإنه زي ما انتي قولتي أنا عملت أعمال كبيرة جدا ووقفت قدام كبار النجوم وكبار المخرجين ، والمفروض إنك لما بتحققي شئ كويس وبتقفي قدام نجوم كبار وبيثنوا عليكي المفروض إن انتي بتكبري .. المفروض إن انتي بتاخدي حقك.. لكن ليه توقفت بجد سؤال مهم جدا ونفسي الاقي إجابة ليه.. اتعرض عليا أكتر من حاجة بعدها مش أعمال كتير بس مكنتش على نفس المستوى كانت أعمال كويسة بس كان بيبقى في اختلافات..

هل عرض عليكي دور الأم من قبل؟

اتعرض عليا أكتر من دور أم والغريب إنه كل مخرج يقولك لا لا شكلها مينفعش أم لفلان أم لفلانة رغم إن هو لو اتعرض عليا إن انتي تقبلي إنك تطلعي أم لفلان أم لفلانة أنا مش هرفض أبدا لإن فاهمة إن الممثل الكويس أو الممثلة الكويسة تعمل اي دور.. وأنا عملت أدوار الأم قبل كده بس هما مش عارفة مش شايفيني في أدوار الأم ليه.. طب لو مش شايفيني في أدوار الأم مش شايفيني في أدوار تانية ؟!

في علامة استفهام كبيرة جدا أنا نفسي مش فاهماها.. بس أنا مش بفرض نفسي على حد؛ لإني عندي ثقة في الله ده رقم واحد. وإن أنا تعبت وعملت اسمي ده بتعب بأمانة وراضية واشتغلت كتير ..لكن مش عارفة في ايه ؟!

وأدوار الأم أنا ممكن أعمل دور أم وأعمل أي دور على فكرة .. لكن شكلها مش مناسب إنها تطلع أم مش عارفة ايه طب غير أدوار الأم في حاجات كتيرة جدا،

تلاقي ناس كتيرة جداً جداً جداً شغالين ربنا طبعا يباركلهم وألف مبروك عليهم وربنا يوفقهم جميعا.. بس زي ما بقولك الحكاية بقت مش فاهمة ماشية ازاي بأمانة نفسي أقول لكل المنتجين وكل المخرجين اللي شغالين في أساتذة كبار بغض النظر عني أنا تماماً على فكرة أنا بتكلم بجد لإن في ناس زمايلنا وأنا أعرفهم شخصيا كتير جدا قاعدين في البيت وكتير جدا عندهم معاناة ؛ لإنه حرام تموتوا الأمل وتموتوا الحلم بتاع كل واحد اللي تعب فيه عشان يعمل بذرة وتطلع وتظهر للناس وتحقق وبعد كده تموتوها .. لحساب مين بتموتوا المواهب الكبيرة والفنانين اللي بجد الملتزمين والمحترمين واللي عملوا اسمهم بتعب وجهد .. لحساب مين إن هما يقعدوا في البيت وميشتغلوش .. وإكيد دوام الحال من المحال وانا واثقة إن أكيد الحق هو اللي هيكون.

0 Shares

نهى مرسيالإثنين, 24 مايو 2021, 6:04 مساءً

الفنانة عنبر: ليه توقفت عن العمل سؤال مهم جدًا نفسي ألاقي له إجابة

وفي لقاء خاص مع الفنانة عنبر في عالم النجوم أجرينا معها هذا الحوار:

– تميزتي في مسلسل عدلي علام بطولة النجم عادل إمام كلمينا عن كواليس المسلسل ؟

أكملت عنبر حوارها قائلة:

– رغم كل النجاح اللي حققتيه علي مدار ٢٢ سنة لماذا توقفني فجأة عن العمل ؟

هل عرض عليكي دور الأم من قبل؟

نهى مرسي

مقالات ذات صلة

الشريف يشارك قنصلية الصين بالإسكندرية في الاحتفال بالعيد الوطني الـ74 لجمهورية الصين الشعبية

مي سليم مع أحمد الفيشاوى في فيلم “بنقدر ظروفك”

وزيرة الثقافة تهنيء فريق عمل فيلم “رفعت عيني للسماء” بفوزه بجائزة العين الذهبية في مهرجان كان

الصحة: فحص 267 ألف طفل حديث الولادة ضمن مبادرة رئيس الجمهورية للكشف المبكر عن الأمراض الوراثية