الفنان التشكيلي علي سمير: حلمي أكون أشهر رسام مصمم في العالم كله
حوار: أحمد الدخاخني
علي سمير, فنان تشكيلي شاب من أبناء قرية نجريج بمدينة بسيون بمحافظة الغربية وهي القرية التي ينتمي إليها اللاعب العالمي محمد صلاح لاعب ليفربول وكابتن المنتخب الوطني, وهو طالب الآن في مدرسة محمد صلاح الثانوية الصناعية العسكرية, والذي يبلغ من العمر 18 عاماً, فمنذ نعومة أظافره وهو يعشق الرسم ويحاول في تطوير مهاراته في الفن الىشكيلي وتصميم صور الديكور, ويبدع ” علي ” في رسم العديد من الصور الفنية مثل رسم صور بعض المشاهير في عالم الفن والتمثيل والرياضة مثل صورة فريد الأطرش وأمير كرارة, وصورة اللاعب محمد صلاح الذي ينتمي لقريته, كما أنه يتفنن في الرسم على الحائط.
وفي حوار خاص تواصلت ” عالم النجوم ” مع الفنان التشكيلي علي سمير, للحديث عن تفاصيل بداية اكتشافه لموهبة الرسم, عن الصعوبات التي واجهها في مشواره الفني, بجانب أحلامه الكبيرة التي يسعى لتحقيقها, كما يلي:
كيف اكتشفت موهبتك في الرسم ؟
من سن 10سنين اكتشفتها لما بدأت أرسم والدي في البيت وقرايبي في الأول مكنش يطلع الشبه قوي بس والدي ووالدتي شجعوني أني استمر في الموضوع وطورت من نفسي وبدأت بالإمكانيات المطلوبة وأشوف الأدوات المطلوبة علشان أقدر أرسم بيها البورتريهات, وفي سن 17 سنة بدأت أرسم جرافيتي على الحيطة زي جرافيتي عصام صاصا كده.
ما هي الصعوبات التي واجهتها في مشوارك الفني ؟
الصعوبات أن في ناس كانت بتقول لي ” انت هتستفاد ايه من الرسم ” واحباط ما فوق احباط والله, وناس كانت تقولي أن الرسم حرام وانت هتخش النار وان عيشتك كلها حرام, بس سألت شيوخ والحمد لله قالولي مش حرام بس الحرام أنك ترسم صور عريانة وكده أو صور فيها فتنة, دا غير المدرسين اللي كانو بيحبطوني وينصحوا أبويا ان مرسمش تاني بس أنا كملت والحمد لله بفضل ربنا وصلت للمستوى اللي شايفه حضرتك.
ما هي الأدوات التي تستخدمها في الرسم ؟
أول ما استخدمت كان قلم رصاص خامة استدلر وورق رسم عادي, بعد كده جبت فرش ميكب, وأقلام فحم خامةmaris وألوان فابر كاستل وورق كانسون وأدوات تانية كتير ملهاش نهاية, وبعد كده جبت فرش كبيرة علشان شغل الجرافيتي على الحيطة, والتركيز حضرتك مش على الأدوات التركيز على الموهبة وانك تطور من نفسك, ممكن يبقي معايا أدوات كتيرة بس معنديش موهبة مش هقدر اعمل بالأدوات حاجة, ممكن تبقي معايا أقل أدوات واطلع بيها أحسن نتيجة.
كم من الوقت تستغرق في رسم صورة ؟
لو أوردر بياخد مني حوالي أربع ساعات أو خمسة بالكتير, إنما لو برسم صورة حد من المشاهير بعملها احترافيه شويه بتاخد من7 لـ 8 ساعات كده, وأكتر رسمة فرقت معايا في شغلي كانت رسمة محمد صلاح وأمير كرارة.
من هو أكثر الناس تشجيعا لك في حياتك ؟
والدي ووالدتي وأصحابي اللي هم قريبين مني أوي.
هل حصلت على جوائز أو تكريم ؟
من المدرسة بتاعتي قبل كده ميداليات وشهادات تقدير من مدرسة محمد صلاح الثانوية الصناعية العسكرية ببسيون, ومن مبادرة رئيس الجمهورية مبادرة بايدينا نجملها في الغربية من محافظ الغربية, وإن شاء الله ناوي بعد امتحاناتي ارسم رسومات جرافيتي كتير في بلدي بلد محمد صلاح وفي بلاد تانية كتير.
ما هي أحلامك الكبيرة التي تسعى لتحقيقها ؟
نفسي أفتح أكاديمية كبيرة لتعليم الرسم لجميع المراحل, وأوصل لمعارض عالمية كبيره بره وده حلمي الكبير, وابقي أشهر رسام وأشهر مصمم في العالم كله إن شاء الله.
