الفنان محمد حسني يكشف عن ماحققه في 2019 ومايتمناه في 2020

الفنان محمد حسني يفتح قلبه لجريدة عالم النجوم ويكشف عن امنياته للعام الجديد

الفنان محمد حسني.. هو ممثل مصري من مواليد مدينة المنصورة حاصل علي بكالوريوس تجارة. ثم التحق بأكاديمية الفنون لدراسة النقد الفني وعمل بالفن ،

قدم خلالها العديد من الأدوار من أشهرها مسلسل “الدالي” الذي أدي فيه دور ضابط أمن دولة.

خفيف الظل وعرفه الجمهور  من خلال قفشاته الكوميدية إلى جانب أدواره في مسلسلات ” سلسال الدم ” مع الفنانة عبلة كامل ورياض الخولي في أجزائه الثلاثة

ومسلسل ” شطرنج -كابتن مصر – الشبح – تك تك بوم – الخواجة عبدالقادر ،بين السرايات، الزئبق).

ممكن نعرف من حضرتك أيه الحاجة الحلوة اللي حصلتلك في 2019، وايه الحاجة الوحشة اللي حصلتلك متتمنيش تحصل لك تاني في 2020 ؟

للاسف كلها كانت سنة كبيسة بالنسبة لي وحشة على المستوى الشخصي والمستوى الاجتماعي والمستوى المهني في الشغل كان فيها كتير اوي تعب

وفقدت ناس كتير اوي حبايبي في السنة دي وفيات كتير فالحمدلله على شئ طبعا ، ما شوفتش منها حاجة كويسة يعني بس الحمدلله علي كل شئ ويارب السنة الجاية احسن 

إيه اللي بيتمناه الفنان محمد حسني  2020 على مستوى العمل والمستوى والاجتماعي ؟ 

  اتمني يارب ان 2019 متتكررش تاني خالص خالص يعني واللي حصل فيها ما يتكررش ، اتمني 2020 تبقي جاية بكل خير لكل الناس

و لكل مصر والوطن العربي نكون فيها احسن على المستوى الشخصي كان عندي شوية هموم وتعب صحي فيارب يختفي في 2020 و ما اشوفهوش تاني 

ايه الجديد بالنسبة  للفنان ” محمد حسني  ” في 2020 ؟

 الجديد في بداية السنة ان شاء الله انا عندي فيلم جديد فيلم سينما مع الفنانة دنيا سمير غانم يعني فيلم كوميدي نجهز له ان شاء الله وداخلين تصويرين اخر الشهر ده او اول الشهر الجديد يناير ان شاء الله ،

برضو ان شاء الله عندي مسرحية في المسرح الكوميدي اخراج الاستاذ ياسر صادق ومعاه الفنان أحمد صيام والفنان ميدو عادل والفنانة ميسرة والفنانة دنيا عبد العزيز ومجموعة بقي من ممثلين المسرح الكوميدي

و ان شاء الله المفروض ان احنا هنفتح اخر الشهر على بداية السنة الجديدة او مع الكريسماس ان شاء الله و لسه بقي في شغل لمسلسلات رمضان 

أما ان شاء الله شغل رمضان في مسلسلات رمضان لسه في كلام و في تعاقدات لكن لسه مفيش حاجة تمت فعلية جادة و ربنا يسهل يارب ان شاء الله

و برضو في نازل يمكن في اجازة نص السنة نازل فيلم شاومينج ده انا عامله مع الاستاذ بيومي فؤاد و الاستاذ سامي مغاوري و انتصار وصلاح عبدالله ومجموعة كبيرة

كده برضو المفروض الفيلم ده نازل في اجازة نص السنة ، في عندي مسلسل كوميدي برضو لسه مخلصه اسمه “اتنين في الصندوق” مع حمدي الميرغني اوسؤس برضو ده مسلسل كوميدي نازل الفترة الجاية ان شاء الله

الفنان  “محمد حسني ” تحب تقول ايه لجمهورك والناس اللي بتحبك   بمناسبة السنة الجديدة ؟

كل سنة والجميع بخير ويارب تكون سنة خير وسعادة على الناس كلها يارب .
ويارب تبقى سنة جميلة علينا كلنا يارب نشوف فيها الخير ونشوف فيها السعد و كل اللي كان نفسه في حاجة يحققها و كل اللي كان بيتمني حاجة يشوفها ،  ويارب تبقى سنة احسن بكتير من اللي فاتت.