انغام في سهرانين.. “شنطة سفر ماكنتش اغنيتي وصممت عليها وابويا لحنها”
كتبت/ مادونا عادل عدلي
كانت النجمة أنغام في ضيافة برنامج “سهرانين” تقديم النجم والإعلامى أمير كرارة، والمذاع على قناة ON
وتحدثت أنغام خلال الحلقة عن علاقتها بالفنان عماد عبد الحليم، قائلة: “عماد عبد الحليم، كان بيحبنى جدا واتربى معايا في البيت وهو مش أكبر منى بكتير وتحسه إنه شبهى وكأنه أخويا الكبير”
تحدثت انغام عن أغنية شنطة سفر وقالت: “أغنية حلوة وكانت مهمة في وقتها، لأنها كانت في فترة الشباب بدأوا يهاجروا لخارج مصر، والشاعرة اللى كتبتها اسمها فاطمة جعفر وهى إسكندرانية زيى وكانت مرتبطة بأخوها جدا وهو كان مسافر وكتبت الأغنية وأنا غنيتها وأبويا لحنها، وللعلم ماكنتش بتاعتى في الأول وكانت أغنية بتاعة مطربة تانية، وقلت لوالدى أنا عاوزاها واتكسف واتحرج من المطربة ولكن أنا كنت متمسكة بيها جدا”.
وقالت أنغام: “عماد كان شقى جدا وخجول جدا وشخصيته غريبة، بس كان فاكهة العيلة، ولما ييجى ضيوف كان بياخد بالطو والدتي ويلبس شراب على وشه ويحط الإيشارب ويربطه وبيلبس جزمة حريمى وينط من أى بلكونة ويخبط على باب البيت أكنه ضيفة واسمها أم صباح ويعمل الفيلم على أي حد”.
واستكملت أنغام: “غنيت أنا وعماد أغنية والدى عملها ليها اسمها (يا طيب)، وجاتله فكرة إن كل أعمامى يغنوها معايا وكمان هو كان معانا، وكمان غنيت أنا ترر مسلسل (المراية)، وهو بالنسبة ليا كان نجمى المفضل وروحت فيلم له كان مع الفنانة نجوى إبراهيم واتفرجت عليه وهو بيصوره وكان وقتها بيصوروا في الإسكندرية”.
