جينا سليم بستنى الخشاف وقمر الدين طبعا لان دي طقوس رمضانية بحتة

جينا سليم بستنى الخشاف وقمر الدين طبعا لان دي طقوس رمضانية بحتة

 

جينا سليم اسمها الحقيقي .. فنانة موهوبة وطموحة عاشقة للتحدي وطموحاتها بلا سقف تسعى دائما للأفضل .. على درجة عالية من الثقافة .. أسمها الحقيقي ” جورجيت سافيدس “

حصلت جورجيت على العديد من الشهادات في مجال علم النفس ، درست في العديد من الجامعات بالخارج ، تتحدث جينا بخمس لغات ،

بدأت في عالم الفن من خلال عمل ورش لتعليم الأبعاد النفسية الخاصة بشخصيات الأعمال الفنية ،

وهذا من خلال بناء التفاعل بين الأعمال الفنية وعلم النفس. وقد بدأت نشاطها بمسلسل نصيبي وقسمتك ، من بطولة النجوم هاني سلامة ، نيكول سابا ودرة.

ومسلسل 30 يوم للنجوم آسر ياسين ، باسل خياط ، وتوالت تساعد بعد ذلك في مسلسلات عديدة.

من أبرزها .. لدينا أقوال أخرى..وبلا دليل وحواديت الشانزليزيه..وتشارك حالياً في مسلسل طلعت حرب.

جينا سليم ايه الشئ اللي كنتي بتحبيه في رمضان زمان افتقدتيه في رمضان دلوقتي ؟

افتقدت الفوازير جدا جدا بتاعة شيريهان ونيللي فا دي اول حاجة مفتقدها وبوجى وطمطم وفطوطة هي دي الحاجات فعلا اللي أنا مفتقدها جدا

إيه أكتر أكلة بتحب تاكلها من وانتي صغيرة أول يوم رمضان ؟ واكتر اكلة بالنسبالك بتميز رمضان ؟

اكتر اكلة بحب اكلها وببقي مستنياها اللي هي الخشاف ببقي مستنياه طبعا وقمر الدين طبعا لان دي طقوس رمضانية باحتة ، قمر الدين المطبوخ مش بس الشرب ، كركديه وأم علي ، ام علي دي بتتعمل في رمضان اساسي ، ف دي الأكلات اللي اوا مستنياها بفارغ الصبر كلها بتخن الحمدلله

أكتر حاجة في التلفزيون كانت بتحسسك برمضان لما بتتفرج عليها ؟ وايه رأيك في اللي بيتقدم في رمضان دلوقتي ؟

ارجع اقول الفوازير برضه هي كانت دائما علامة مهمة جدا في رمضان و كنا بنستناها من السنة للسنة غير طبعا المسلسلات ،

أو رأيي في اللي بيتقدم دلوقتى ..فى حاجات والله كويسة بتبقي القصة بتاعتها مهمة ومثيرة يعني بتخليكي عايزة تتفرجي على المسلسل بس انا بفضل حاجات زمان

جينا سليم هنشوفك في ايه في شهر رمضان ؟ كلمينا عن مشاركاتك ؟

هتشوفوني ان شاء الله في مسلسل فرصة تانية ده دور شرف انا عملاه صغير مع دكتور مرقص عادل ، نجمة العمل ياسمين صبري ، كان في مسلسل تاني لكن للاسف مالوش حظ رمضان ده ، وهجمة مرتدة للنجم احمد عز و هند صبري ، و ده اللي كان مسلسل مهم بالنسبة لي اوى ان انا أشارك فيه لانه قصة حقيقية و ملحمة من ملاحم المخابرات فا ده كان شرف كبير ليا ان ابقي جزء منه

تفتكري هيكون في تراويح ولمة العيلة السنة دى ولا الوضع اللى احنا في بسبب كورونا هيستمر ؟

ما اظنش السنة دي هيكون فيه لمة عيلة وتراويح وكده انما نتمنى اننا لو التزمنا علي اد ما نقدر جايز نلحق اخر اسبوع ولا حاجة بس لا مااعتقدش بسبب الكورونا أظن كلنا لازم نلتزم القواعد والقوانين نلتزم البيت كل واحد فينا يفطر بقي مع نفسه وممكن يفتح كاميرا ، يفتح حاجة ، ويأكل مع أهله من خلال الكاميرا ، بس أظن ان احنا في فترة عصيبة جدا ومحتاجين نستحملها ونبقي ادها لحد ما نمر من الأزمة دي علي خير و بالطريقة دي نحمي نفسنا ونحمي أهالينا و نحمي شعبنا وبلدنا يعني

تحبي تقولي أيه لمحبينك وللشعب المصري بمناسبة قدوم شهر رمضان؟

احب اقول للناس كلهم رمضان كريم و كل سنة وانتوا طيبين ، بحبكم جدا جدا جدا ، كلامكم دايما على راسي و دايما شهادة انا بعتز بيها ، يارب أفضل دايما عند ظنكم وفي تقدم مستمر وتشوفوا أعمال تحبوهالي وابقى بضيف للمجتمع بشكل إيجابي وشكل مؤثر ومعلش اصبروا السنة دي ان شاء الله هتحلو وتحلي زي ما بيقولوا