عاجلمقالات

حدوتة صندوق الحسنات.. بقلم الكاتبة: شيماء أبو زيد

حدوتة صندوق الحسنات.. بقلم الكاتبة: شيماء أبو زيد

حدوتة صندوق الحسنات.. بقلم الكاتبة: شيماء أبو زيد
شيماء أبو زيد

كان ياما كان ياسادة ياكرام ولا يحلى الكلام إلا بذكر النبي عليه الصلاة والسلام .

كان في ولد جميل وبيحب يفكر في كل حاجة، في مرة كان محتار جدًا وعنده سؤال مش عارف له إجابة.

راح لمامته وسألها: ماما هو مين اللي خلقنا؟

ماما أستغربت السؤال لكن فرحت جدا انه بيفكر وحابب يتعلم ويعرف،

ردت عليه وقالتله: ربنا اللي خلق الكون كله وسخره علشان يخدمنا ويساعدنا وبعدين خلق آدم وباقي البشر.

سأل الولد مامته تاني وقاللها: طيب هو ربنا فين وشكله إيه ؟

ردت ماما وقالت: ربنا سبحانه وتعالى نور على نور مكانه عرش الرحمن فوق السبع سماوات ،والعرش ده هو سقف الجنة هنشوفه لما ندخل الجنة كلنا ان شاء الله…

رد الولد وقال: ماما ممكن اعرف ربنا خلقنا ليه واحنا المفروض نعمل إيه علشان ندخل الجنة ؟!

ردت ماما وقالت: ربنا خلقنا علشان نعبده ونسمع كلامه ونشتغل ونعمر الأرض.

رد الولد وقال: إزاي نعبده وليه!

ردت ماما وقالت: نعبده علشان ربنا سبحانه وتعالى خلقنا وفضلنا على كل المخلوقات التانية .و كرمنا بالعقل والتفكير وكرمنا بالعلم وانا سعيدة بيك جدا إنك بتحب تسأل عن كل حاجة تحتار فيها.

رد الولد وقال: الله ياماما ربنا بيحبنا جدا، طيب ماما انا ساعات بعمل حاجات غلط وانا مش عارف واكيد ربنا بيزعل مني صح؟!

ردت ماما وقالت: ربنا بيحبنا جدا ورحيم بينا جدا كمان عارف ليه؟!.

ربنا خلقنا وخلق لكل واحد فينا ملايكة تحفظه وملايكة تكتب حسناته وسيئاته.

الولد اتفاجئ جدا وقال لماما: يعني ربنا عارف كل الحاجات الغلط اللي عملتها.

ردت ماما وقالت: اتفقنا ان ربنا رحيم بينا وبيحب يعلمنا. ومعانا الملك اللي بيكتب الحسنات بيكتبها على طول أول مابفكر فيها حتى لو متنفذتش وربنا بيضاعف الحسنات.

وعلي شمالي ملك بيكتب السيئات لكن بيديني فرصة مش بيكتبها على طول حتى لو عملتها. بيكتبها وأول ماأنا أعرف إني غلطت استغفر ربنا وأصلي وأطلب من ربنا انه يسامحني وهيا هتتمسح على طول وتتكتب حسنة كمان..

فرح الولد جداً وقال لمامته: انا مكنتش أعرف ان ربنا بيحبنا أوي ياماما،

ممكن تساعديني وتعلميني أعبد ربنا إزاي؟

ردت ماما وقالت: ربنا سبحانه وتعالى أمرنا بحاجات بسيطة جداً وهيا أركان الإسلام وطلب مننا ان أحنا نستعمل عقلنا ونميز الصح من الغلط علشان صندوق الحسنات بتاعنا يكون مليان وكمان احافظ على نفسي من أي شيء يإذي روحي علشان حسناتي تزيد وقلبي يفضل حلو زي ما ربنا خلقه.

الولد قال: طيب انا ياماما المفروض أعمل إيه علشان يكون عندي حسنات كتير؟

ردت ماما وقالت: تنجح في دراستك وتتعلم دايما تكون صاحب أثر جميل عند كل أصحابك وتحافظ على قلبك وعلى أخلاقك الجميلة مهما حصل.

رد الولد وقال: أنا بحب اتكلم معاكي جدا ياماما بحس ان روحي بتنور، حضرتك علمتيني من النهاردة أني أعبد ربنا بقلبي. واذاكر دروسي كويس علشان ربنا يحبني أكتر واكون أد المهمة الجميلة اللي ربنا كلفني بيها .ولازم اتعلم يكون ليا أثر في كل مكان علشان يساعدني أدخل الجنة وأشوف ربنا .

وفعلا الولد الجميل كل حاجة حواليه اتغيرت ومعناها الجميل ظهر بعد ما استخدم عقله في شيء مفيد وسأل مامته.أصبح بيحافظ على كل شيء حواليه لأنه فهم ان الكون ملكه مخلوق علشانه.

وتوتة توتة خلصت الحدوتة…. حلو اوي ياحلوين ان كلنا نسأل في كل شيء حابين نتعلمه والأجمل ان لازم نسأل ماما أو بابا لأنهم بيعلمونا وبيساعدونا أكتر من أي إنسان تاني.

زر الذهاب إلى الأعلى