د. وسيم السيسي .. “نصير المرأة”
حوار / دعاء نصر
أستاذ جراحات المسالك البولية بالمستشفيات التعليمية.
حاصل على (F.R.C.S) بإنجلترا وزميل كلية الجراحين الملكية بإنجلترا.
حاصل على (F.A.C.S) بالولايات المتحدة الأمريكية وزميل كلية الجراحين الأمريكية.
كتاب “Medicine in Ancient Egypt” (الطب في مصر القديمة) في مكتبة الكونغرس الأمريكي، قسم الطب.
وكتاب “نظرة طبية فاحصة في الحب والجنس”.
كتاب “مصر التي لا تعرفونها”.
ماهى المرأة فى حياة دكتور وسيم السيسي ؟
يعني اللي جابتني للدنيا دى إمرأة، اللي كبرتني إمرأة، وعلمتني إمرأة. اللي بتسعدني أو تشقيني إمرأة، اللي بتسندني فى الأوقات الصعبة إمرأة، اللي لما بتعب بتمرضني إمرأة. كاتمة أسراري هي إمرأة، فالحياة بدون إمرأة خصوصا المرأة التي أحبها متبقاش حياة ملهاش طعم ابدا.
أنا أرى أن المرأة هى الأصل وان هي المخلوق Biological أقوى . ويكفي إذا اعتمادنا على الأرقام واعتمادنا على العلم نجد أن Respontnus obortion أى فى الإجهاض المحتم بدون تدخل أى عقاقير أو أطباء. كل 100 إجهاض يكون 70 ذكور و 30 إناث . معنى هذا أن الأنثى بيولوجيا أقوى بدليل أن 70 ذكور و 30 إناث.
وعشان كده تحملها للمرض كطفلة، عشان كده الناس عارفة تقولك إيه ( متخفش على البنت، البنت عرقها جامد. الواد نجمه خفيف إلحق وديه للدكتور ) وده صحيح عشان كده متوسط الأعمار فى النساء 6 سنوات أكثر من الرجال.
ودي الدراسة اللي عملتها فرنسا بين 30000 راهب و 30000 راهبة. وهم اختاروا الفئة دى بالذات عشان التشابه والمساواة فى كل شيء لأن مثلاً فى مهنة تشل الأعصاب. لكن إحنا إخترنا المهنة دي على أساس أنتم الاتنين بتحبوا ربنا. وأنتم الاتنين نفس النظام ونفس الأكل.
وبعدين الدراسة بين 30000 لان كل ما تكون الدراسة على عدد أكبر كل لما تكون مصدقيتها أكبر ، فطلع إن متوسط الأعمار فى النساء 6 سنوات أكثر من الرجال.
ونروح بعيد ليه :
أينما حللتي نجد أرملة المرحوم فلان ، نادرا ما نلقى أرمل المرحومة.
والأرقام خير لغة، تعالي لرقم خطير جدا، 4000 ذكر و 4000 أنثي مولودين ودول كبروا ودول بقوا ستات. ودول بقوا رجالة كويس؟ نجد أن فى 4000 إناث، أنثى واحدة عندها تخلف عقلي. وفى 4000 ذكر 2 عندهم تخلف عقلي. التخلف العقلي فى الذكور مرتين أكثر من الإناث يبقي يجب على الذكور أن تتلم بقه وميعدش يقول أنا بفهم أحسن منك وأكتر منك.
جاء العلم يتلو على الرجل مرسوم عزله بس بقه يا عم انت بس عضلات ، تنفع تشتغل شيال Brain not brow ، المخ وليست العضلات.
ده معناه ان دكتور وسيم السيسي نصير المرأة ؟
طبعا ولا يمكن بلد تتقدم إلا إذا كانت المرأة على قدر من المساواة مع الرجل، حين تنتفي عن المجتمع الذكورية إعرف إننا بخير.
تستغربي إذا قلت لك انى انبسطت بفصلها من جوانب إيجابية … يعني مثلا الزواج قَلِت قوي طبعا لعوامل اقتصادية وغيرها.
البنت دلوقتي بتناقش الزوج ساعة ما يقول أى كلام فارغ تقوله لا الكلام ده مش مظبوط !
يعني عصر سي السيد انتهى كان لما يقولها الشمس تطلع من الغرب تقوله من الغرب يا سي السيد.
دلوقتي البنت اتعلمت لكن لازلنا التربية بتاعتنا ذكورية .
من كام سنة صديقة لنا مهندسة كيماوية اسمها ليلي قدور، ولد قريبهم ..ولد بكالوريوس هندسة وكنا فى اجتماع وكانت خطيبته معاه وبعدين ليلي صديقتنا قالت لنا ( فلان ده مجنن خطيبته) ليه لأنه ديما يقولها ( أنا الصح. راجل يعني أنا الصح ولازم تسمعي كلامي) والولد ده واضح أنه كان …. قولتله ده ناشيء من الخلفية والمنصة اللي انت بتعتمد عليها.
إيه رأيك فى الحديث النبوي الشريف
” النساء شقائق الرجال لهن مثل الذى عليهن بالمعروف” أدي حديث بيساوى اهوه.
وإيه رأيك فى الحادثة بتاعة الحديبية لما الرسول طلب منهم أن يعتمروا فرفضوا. زعل ودخل لأم سلمة قالت له متسألش فيهم اذهب واعتمر يقلدوك فكلهم واحد وراء الثاني والثالث. رجع متهلل يقول لها لله أنتي يا أم سلمة نجا المسلمون على يديكي من عذاب أليم.
فإذا كانت المرأة نجا المسلمون علي يديها من عذاب أليم والحديث بيقول النساء شقائق الرجال لهن مثل الذى عليهن بالمعروف، تيجي أنت. وأنت ولا حاجة بالنسبة للنبي صلى الله عليه وسلم وتقول أنا كلامي يمشي وانا وانا وهو منطقش ولا كلمة . فأنا نصير المرأة.
