- رامي وحيد الفنان الموهوب بالوراثة يفتح قلبه اليوم لـ عالم النجوم
رامي وحيد : أتمنى العمل مع الزعيم عادل إمام وكراره ورمضان والسقا وبحلم بشخصية تاريخية زي خالد بن الوليد كما أتمني تجسيد شخصية د / مصطفى محمود
إعداد / دعاء سنبل .. حوار / دعاء نصر
رامي وحيد فنان موهوب بالوراثة، أثبت موهبته الفنية في العديد من الأعمال السينمائية، كان أحد لاعبي فريق الناشئين في النادي الأهلي.
اسمه بالكامل رامي سمير محمد وحيد يوسف، ولد في 17 أبريل 1975، والده هو الفنان والمخرج الراحل سمير وحيد، الذي شارك بالكثير من الأعمال السينمائية والمسرحية خلال فترة السبعينيات والثمانينيات من القرن الماضي.
درس سياحة وفنادق، “قسم إرشاد ياباني”؛ لحبه الكبير للتاريخ والآثار المصرية، ولعب في النادي الإهلي في قطاع الناشئين؛ إلا أنه ترك المجال الكروي واتجه إلى عالم الفن، وورث حب الفن عن والده، وشارك معه بالتمثيل في بعض المسرحيات.
كان الظهور السينمائي الأول له في فيلم “الجراج”، عام 1995، مع الفنانة نجلاء فتحي والفنان فاروق الفيشاوي، وهو اليوم في حوار خاص جدا مع جريدة عالم النجوم.
بدأت حياتك كلاعب كرة في قطاع ناشئي الأهلي.. لو رجع بيك الزمن كنت هتختار بردوا التمثيل ولا تكمل في لعب الكرة ؟
والله لو كنت بدأت كلاعب كورة كان أكيد مستقبلي هيتغير
يعني مكنتش همثل في السن دا ، لان أنا بدات أمثل وانا عندي 28 أو 29 سنة ، وقبل كدا كنت بشتغل في البزنس لكن لو كنت لعبت كورة متهيألي كنت هفضل ألعب كوره لحد سنت بعد 30 بشوية ،
لا انا دفعتي محمد بركات فكنت هنكمل مثلا لحد 35 سنة فلو كنت بدأت أمثل بعد كده كان هيبقى موضوع تاني ، أنا بلعب كورة لحد دلوقتي
اعتقد كنت هعمل نفس اللي عملته بالظبط إني أمثل والعب كورك لاني بحب الكورة جدا ، وتقريبا كل أسبوع بلعب يوم واللي بلعب معاهم كلهم لعيبة كورة وفي منهم اللي بيلعب لحد دلوقتي ، وفي فنانين صحابنا كتير
هل حبك للفن كان بسبب والدك ؟ وأيه نصيحة والدك ليك لما حبيت تدخل المجال ده؟
اه طبعا أول حب ليا للفن بسبب أبويا الله يرحمه إنه مثل أعلي ليا في كل حاجه وانه ربانا الحمد لله ، على قيم ومبادئ حلوة وانا كنت بتفرج من خلاله على كل حاجة
أنا أبويا مالحقش يشوفني وأنا بمثل لأنه توفي وأنا في سن صغير قوي وانا عندي 19 سنة ، يعني طبعا كانت حاجة مؤثرة في حياتي ان أبويا توفي بالنسبة ليا في السن دا لانه كان تقريبا كل حياتي ، مثل أعلى وأنا بحبه جدا لانه شخص مؤثر في الحياة مع كل الناس ، اللي عرفوه
الله يرحمه فعلا كان حاجة كبيرة جدا في حياتي.
أول دور لك أمام عمالقة من نجوم الفن في فيلم الجراج كان عندك تقريبا كام سنة ؟ وفاكر الكواليس ولا لا ؟
بابا الله يرحمه مالحقنيش أول ما مثلت التمثيل يعني التمثيل البروفشنال لكن كان فيلم الجراچ
هو اللي الاستاذ علاء كريم المخرج الله يرحمه هو اللي طلبني للتمثيل يعني
فكنت هعمل دور وبابا مكنش عاوزني أمثل بصراحة
ولكن بعد الأستاذ علاء قاله كذا مرة ف روحت له متأخر كان اوردي إختار الأطفال بتوع الفيلم دا يعني
ماحبش أني أبقي مش موجود في الفيلم كان فيه دور مشهد كانت الفنانة نجلاء فتحي كانت خالتي في الفيلم
كان نصيحة بابا ليه قبل ممثل الفيلم دا قالي تعالي أكن الكاميرا أهي موجودة قدامك اهى ماتبصلهاش خالص
وابدا اتكلم عادي واتعامل عادي ، وتقريبا كان دا أو درس تمثيل اتعلمته في حياتي
وأكيد اللي هيشوف الفيلم هيعرف أني بضحك وبهزر أكن عيل صغير لكن مش صغير قوي بس قصدي بالنسبة ليا إنك تكون شخصية ممثل أو يبقي عندك أبعاد مش هو دا الدور اللي يتقال عليه ، لأن ساعتها كنت لسه في 3 إعدادي كنت لسه صغير
ليه بعدت بعد الجراج سنوات عن الفن ؟
علشان كنت بدرس بعدت عن بعد فيلم الجراچ من بعد 3 إعدادي لحد ما خلصت الجامعة كان بالنسبة ليا وقت كبير لازم كنت أركز في الدراسة فيه ، وكمان لعبت كورة في نفس الوقت ومكنش معقول إني أمثل والعب كوره في نفس الوقت
بعد الدراسة بدأت أركز أكثر في البزنس بدأت أشتغل في مجالات التسويق سواء بقي في تنظيم المعارض أو في مجال المبيعات في شركات التأمين
هل فعلا خوفت من البطولة في فيلم الألماني ولا خوفت من أنتقاد الدور نفسه ؟ وشايف محمد رمضان أدى الدور أزاي من وجهة نظرك ورأيك فيه كفنان هل يستحق كل هذا النقد والهجوم؟
يعني بصراحة في الوقت دا في وقت فيلم الألماني كنت بعمل فيلم تاني فيلم اسمه 3112 جروب كبير من نجوم كثيرة ، وكنت برضه دور البطولة يعتبر حواليا نجوم كثيره يعني وكان دور البطولة وكان يعتبر أن حواليا نجوم كتير ، خوفي من فكرة فيلم الألماني أن أنا كنت لسه خايف اتحمل بطولة فيلم لوحدي ، وكان لسه ساعتها حتي الفنان أحمد بدير ضيف مش عامل دور كبير و مدام عايده رياض ف تقريبا اللي هيبقي شايل الفيلم هو أنا
وكل اللي كانو حواليا وجوه جديدة بس انا لما تحمست للفيلم في الاول كانت فكرته جميلة جدا
بس لما قعدت وركزت المنطق اللي احنا بنقدمه في الآخر إنك ضد المجتمع أن الظروف بترغمك انك تبقي بلطجي فدي يعني هو طبعا ممكن تتاخد من كذا وجهه نظر ، النقاش في الموضوع دا كبير وأنه يدق ناقوس خطر في الحتة دي
الأهتمام بالعشوائيات
ولازم نهتم بالعشوائيات بس في نفس الوقت بس مش دي الطريقه ، كان في طرق تانية كتير تتقال رسايل يعني اننا نهتم بحاجة تانية خالص تخلي الشباب تهتم بالتعليم ، وتهتم بانك تنمي العشوائيات دي بإنك تخليهم يحبوا الفن لتنمي ذوقهم ، وان الحل أنك تبقي بلطجي و تجيب حقك بدراعك تضرب مخدرات أو يكون دا الوضع الطبيعي بأنك في الآخر تتحبس أو ماتتحبسش ، أو تتحول حياتك لكدا يعني بس خلتني حبيت و تعاطفت مع البطل اللي بيعمل الكلام دا فدا اللي كان من وجهه نظري مش صح
كان فيه صراع بيني وبين نفسي وفي الاخر كنت بصراحه في الوقت دا
حتى لو كنت عملت الفيلم لاني كنت لسه بردو في مرحلة تكوين شخصية الفنان مكنش بردو هيبقى بالفكره دي يعني ، ف بالنسبالي يعني التردد في فكرة البطولة أولا ثم موضوع الفيلم الجرئ جدا ثانياالشقين مع بعض
الفنان رامي وحيد إيه أكتر عمل شاركت فيه كان قريب لقلبك دورك في سلسال الدم ولا قيد عائلي ولا عمل أخر؟
والله يعني أكثر الادوار إللي أنا حبتها كان فيلم “حلم العمر” ، ويجي بعده على طول مسلسل “سلسال الدم” ودور فراج والتنوع بقي والاختلاف تماما في مسلسل “الطوفان” رغم صغر حجم الدور إلا إني حبيته جدا وكان تحدي كبير جدا بإني أظهر 160 درجة عكس كل الناس إللي شافتني بيه
لكن الحمد لله المسلسل نجح نجاح كبير والدور ده الناس اتكلمت عنه كلام كويس جدا جدا ، ف بقيت فرحان قوي
وجه بعد كدا يجي آخرهم “قيد عائلي” فيه كل كونكلوچن يعني من العنف شوية والطيبة شوية والرومانسية والكوميديا في قيد عائلي ، هشام الخولي وتمثيل أمام نجوم كبار وعظماء زي الأستاذ عزت العلايلي ومدام ميرڤت أمين ومدام بوسي و الاستاذ صلاح عبدالله والاستاذ صبري فواز ، وسيمون يعني كان فيه حتي الشباب الصغيرين كان فيه نجوم كثيرة جدا جدا مليان مش عاوز اقول علشان منساش حد ، لكن كلهم نجوم كبار والحمد لله المسلسل كان فاتحة خير ونجح نجاح كبير جدا
هل في مسلسل سلسال الدم أصيبت الفنانة نرمين ماهر فيه بدمها بالسكين فعلا ؟
فعلا نرمين أتعورت وفعلا دي كانت غلطة من ان أحنا نستخدم سكين حقيقية دي كانت غلطة بصراحة، يعني انا مركزتش فيها أنا المفروض لما كنت ماسك السكينة دي
كانت لازم متبقاش حقيقية ، وهو طول الوقت أنا ماسك السكينة بطريقة بعيد عنها بس للاسف هي أتحركت حركة كدا خلت السكينة خبطت فيها، أتحركت حركة غلط ، فجأتني بيها هي دي بسبب إنها أتعورت يعني
ولكن هي غلطة أتعلمت منها كتير جدا ان ماينفعش ، لازم تفكر في تفاصيل ممكن تأذي الممثل اللي قدامك حتى لو انت مش قاصد ، ممكن هو إللي يأذي نفسه فأنت لازم تخاف على اللي قدامك أكثر مما هو خايف علي نفسه ، لان هو ممكن يبقي مندمج بيحصل زي ماحصل كدا وتتعور وهي كانت شكك بسيطة ، بس هي عشان دلوعة شوية فقالت أنا اتعورت وعملنا فيديو ساعتها وقولتلها حقك عليا ، وقولتها مكنش فيه حاجة نقطة صغيرة وخدشة مش حاجة كبيرة
وانا ياما اتعورت في الأفلام والمسلسلات وكانت تعاوير فظيعة يعني
الفنان رامي وحيد
أيهما أقرب لقلبك العمل الدرامي أم السينمائي ؟
السينما طبعا ، السينما أقرب لقلبي بشكل كبير السينما تاريخ بيفضل موجود العمر كله
المسلسل للاسف بيتشاف مرة أو مرتين أو لما بيكون مسلسل عظيم زي العلامات اللي اتعملت في الدراما بيتشاف مرتين او ثلاثة
السوشيال ميديا خلت المشاهد تفضل موجوده علي طول وتسترجع تاريخ الدراما كله بقينا نشوف مشاهد من سوق العصر للاستاذ أحمد عبد العزيز وتتاخد والناس تعمل عليها كوميكس وكدا ، فعاشت بسبب السوشيال ميديا الدراما
ولكن هيفضل موضوع السينما علشان بيقوم بتلخيص وايجاز في ساعة ساعة ونص بالكتير اللي هي مدة الفيلم ، ف الموضوع كله بتقوله في ساعة ونص ف بيبقي سهل علي الفرجة وايقاع السينما عند الناس محبب عند جهة عريضة
تخيل نفس التركيز اللي بيتعمل في 20 ساعة اللي هي مدة المسلسل بيتعمل في ساعة ونص
فبيبقي الكادر شكله مختلف التمثيل حتي بيبقي شكله مختلف
الموضوع وطريقه عرضه في السينما بيبقي شكله مختلف عن الدراما فبتخلي كل جملة مكثفة أكثر ومهمة أكثر وموضعها سري بكل الاشكال من ناحية الصورة والإخراج والدراما والتمثيل في كل الاشكال يعني
والدراما ليها ميزيتها وجمالها للناس اللي بتحب وتتعايش أكثر من الممثل وتحبه يعني كل حاجه ليها متعتها
ولكن بالنسبة ليا أنا المتعة الأكثر علي الاطلاق هي متعة السينما
متعة عظيمة، وربنا يوعدنا بفيلم زي حلم العمر علي نفس المستوي ودور بنفس التأثير في الدراما وأنا بصراحة بقالي كتير ماعملتش حاجة في السينما ، ونفسي لما أرجع أعمل حاجة تكون بنفس المستوى
لو هتقدم شخصية فنان أو شخصية تاريخية تختار مين من الشخصيات ؟
أنا من زمان كنت بحلم بتقديم شخصية دكتور مصطفي محمود في الأمانة ، لأني حبيت هذا الرجل العظيم وتاريخه كان بالنسبالي ثري جدًا ، وبرنامج العلم والايمان كان له تأثير عليا فظيع من طفولتي ، وكان أبويا الله يرحمه يقولنا حتي لو بتذاكر حتي لو بتعمل أي حاجة وقت برنامج العلم والايمان ،
لازم تتفرج عليه هو وبرنامج جولة الكاميرا زمان البرنامجين دول علشان كان فيهم كمية معلومات وثقافة كبيرة ، فكان دائما بابا بيوصي علي أننا نتفرج علي البرنامجين دول تحديدًا يعني ، وحبي لدكتور مصطفي وقرأتي لبعض كتبه خلتني حابب جدًا أقدم الشخصية دي
ولكن العظيم الفنان خالد النبوي لما قدم الشخصية دي فرحت لانه فنان عظيم بحجم خالد النبوي بيعمل الشخصية دي
وبعد كدا حلمت بفكرة أعمل شخصية تاريخية عظيمة زي شخصية خالد بن الوليد لتأثيره في التاريخ الاسلامي وعظمه التاريخ في الوقت دا ، فعرفت بعد كدا أن عمرو يوسف بيعمل الدور وبعد كدا الأستاذ ياسر جلال وبعد كدا أعتذر ، وبحلم طبعا بتقديم سيف الله المسلول خالد بن الوليد ، ولكن ماعرفش مصير المسلسل إيه
ومش عاوز اقول شخصية تاريخية تانية أو حاجة أنا بحبها تاني ألاقي حد بيعملها تاني
هخليها في سري ، وان شاء الله ربنا يجيب اللي فيه الخير ، ان شاء الله .
مين من الفنانين التي لم يحالفك الحظ وتحب تتعامل معاهم ؟ ومين أشتغلت معاه وتحب تكرر التجربة تانى ؟
والله انا لحد دلوقتي ماشتغلتش مع الزعيم عادل إمام وكانت الفرصة الوحيدة اللي كانت جاتلي قدامه ، كانت في مسلسل وللأسف ماحصلش نصيب والدور معملتهوش في الأخر.
فأتنمي ان أشتغل مع الأستاذ عادل إمام طبعا ، دا راجل قيمة كبيرة ومن أهم الممثلين علي الإطلاق
أنا أعتبر محظوظ بإن أخر عمل للفنان الأستاذ محمود عبد العزيز الله يرحمه والعمل الوحيد اللي أشتغلته معاه هو “رأس الغول” فأنا محظوظ باني أشغلت مع الأستاذ محمود عبد العزيز في أخر حاجة ، كان راجل عظيم وكانت كواليسه عظيمة الله يرحمه كان قيمة عظيمة أفتقدناها بشكل كبير ، كان نفسي أمثل طبعا قدام الفنان الأستاذ أحمد زكي دا عشقي طبعا الله يرحمه برضه من الاساتذة الكبار طبعًا
نفسي أشتغل مع أحمد السقا أنا عمري ما أشتغلت معاه للأسف ماعملناش غير إعلان شيبسي زمان منتج لو هنعرف نقوله ، نفسي أشتغل مع أمير كرارة صديقي ، بس للأسف ماحصلش نصيب بالذات بعد ربنا ما كرمه كرم كبير ونجح نجاحات عظيمة في حاجات كثيرة يعني ، فأتمني إن أشتغل مع أمير كرارة لانه ما شاء الله له شعبية عظيمة
وطبعا أحب اشتغل مع محمد رمضان جدا ، أحب أشتغل مع كل الأساتذه .
وأحب أشتغل مع العظيم محمد سامي ، مخرج كبير وعظيم ومهم جدا علي كل المستويات ، ومع دكتور بيتر راجل محترم وكبير ومهم ، وأحب أشتغل مع كل مخرجين الشباب اللي شغالين احمد خالد موسي وكل المخرجين اللي ليهم تاريخ ، بصمة مهمة حاليا في السينما وفي الدراما وطبعا الاستاذ الكبير الاستاذ شريف عرفة طبعا ، حلم لأي ممثل أنه يشتغل معاه وأنا لسه في ناس كتير جدا ما أشتغلتش معاها ، لا أنا الحمد لله اشتغلت عدد أعمال مش كبيرة ، ولكن الحمد لله تأثيرها هو اللي كان كبير. الحمد لله
مسلسل الطوفان ل رامي وحيد
أيه الجديد اللي هتقدمه خلال الفترة الجاية ؟ وأيه اللي تتمنى يتحقق قبل أنتهاء 2020 ؟
والله لسه الجديد وأنا بسعي لدور كويس بدور عليه يعني دي فترة أنا ببحث فيها عن دور كويس في عمل كبير ومهم ودا شغلي الشاغل دلوقتي يعني .
أتمني ان ربنا يكرمني بالدور دا بعد الواحد حقق نجاحات الفترة اللي فاتت أتمني أني أفضل علي نفس المستوي
فربنا يكرمني وألاقي الدور دا والحجم دا من الدراما سواء كان في السينما أو التليفزيون ربنا يبعت حاجة كويسة يا رب ان شاء الله
أتمني إن قبل ماتخلص 2020 أن يكون في رادع لفكرة التخريب عموما ، ويكون فيه رادع للشر اللي بيحصل في العالم كله علي كل المستويات .
إللي يبقي سبب في انه يخلق مشكلة أو يخلق مرض أو ڤيروس أو تعجيز لحد او اللي يفكر يأذي شخص ، يكون فيه رد رادع علي كل المستويات علي المستوي الدولي وعلي المستوي المحلي ، طول ما اللي بيعمل الشر عارف انه هيتحاسب سواء حساب دولي حساب كبير أو حساب يتوقع عليه عقوبات معينة وتتنفذ علي انها تأثير عالمي .
التأثير المحلي
وفي نفس الوقت التأثير المحلي وأنا شايف أننا محليا بناخد خطوات كبيرة
والناس اللي بتعمل حاجات غلط بتعملها بس بتعملها وهي خايفة انها تتحاسب
واتمني قبل متخلص 2020 نكون حطينا حجر الاساس في الموضوع دي علي أي مستوى من المستويات
انا شايف اننا محليا بدأنا نحط الحجر دا يعني بدليل أن في ناس كتير مابقاش عندها البجاحة في أنها تجاهر بالغلط .
ربنا يسهل باننا رايحين في حتة ان شاء الله كويسة جدا جدا انا متفائل بالخطوات اللي بلدنا بتاخدها ، مصر بتاخدها بشكل كويس تحت قيادة السيد الرئيس عبد الفتاح السيسي
وانا مع البلد ومع خطواتها علي كل المستويات الدولية والمحلية .
النجم رامي وحيد تقول أيه لجمهورك بمناسبة حلول عيد الأضحى المبارك ؟
العيد بالنسبة ليا بجد الواحد بيستني الأيام الحلوة دي وأنا بفرح لفرحة الناس وانا نفسي الأيام الجاية دي كلها فيها فرحة
والله أنا بفرح لما بنزل الشارع ألاقي الناس فرحانة ومبسوطة ومش مكتئبة ومهمومة ودي بالنسالي هي الفرحة أني أشوفها في وش حد ، دي تخلي مودي مبسوط كتير في حياتي ، فأتمني ان أيامنا تكون أعياد وخير
وكل سنة وانتوا كل مصر طيبة وكل الأشقاء العرب وكل المسلمين في العالم طيبين وبخير وبصحة وسعادة ، ويبعد عننا اي شر ممكن نشوفه من اي حد
نعيش حياتنا بأسعد ما يكون من استغلال للوقت بشكل جيد وحلو وباستفادة ، والواحد يحاول يبسط نفسه ويبسط كل اللي حواليه ، ربنا يسعد قلوبنا كلنا ان شاء الله .
مشهد من مسلسل شط VIP للنجم رامي وحيد
