رد مفاجئ من هيدي كرم على منتقدي محمد رمضان
كتبت / مادونا عادل عدلي
كشفت الفنانة هيدي كرم موقفها من العمل مع الفنان محمد رمضان، وردت على الانتقادات التي يواجهها الأخير بسبب لقب «نمبر وان».
وقالت هيدي كرم عبر لقائها في بودكاست «وفيها إيه» على قناة «ستوري بالعربي»: «أحب أشتغل معاه جدًا.. اللي ينكر نجومية وذكاء وإصرار وتطور محمد رمضان يبقى بيضحك على نفسه».
وتابعت: «أنا معنديش مشكلة مع محمد رمضان لا على المستوي الفني أو الشخصي، بشوفه شخص لطيف جدًا في الأماكن العامة وحبوب جدًا بيتصور مع كل الناس وباله طويل ابتسامته دايمًا عريضة وبيتعامل مع كل الناس في الشارع المصري بكل مستوياتهم بحب واحترام، فالحقيقة أنا شخصيًا معنديش مشاكل مع محمد رمضان هو نجم كبير وأي حد يتمنى يشتغل معاه».
حيث استكملت هيدي كرم: «ليه كل الناس اعتبرت أغنية نمبر وان أن محمد رمضان واخدها على نفسه!، ممكن أي حد يغنيها على نفسه ويقول إنه نمبر وان، هو عنده طريقة يقصدها وهي ذكاء منه فيها شويه استفزاز بس تمام، ولكن في الآخر ليه منعتبرش محمد رمضان مثال للنجاح اللي من تحت لفوق».
وانهت: «ليه مشوار محمد رمضان منعتبرش أنه إلهام ليك إن كل شىء ممكن لو الواحد عنده الإصرار والعزيمة، ليه نشوف إن محمد رمضان بيستفزنا؟! ليه منشوفش إنه بيدينا مثل، وكل واحد يشوف الموضوع بنفسيته، وكل نجوم العالم الكبار مستفزين».
