روڤي الشناط: تعاطفت مع “كاميليا” لأنها ضحية لظروف عائلتها.. الإصرار والمثابرة سبب اختيار محمد صبحي لي
حوار: سناء عطية
“روڤي الشناط” خريجة هندسة إلكترونيات واتصالات اتخرجت بامتياز مع مرتبة الشرف كنت شاطرة، عملت فترة وجيزة في مجال الهندسة، ثم التحقت بمجال الإعلام والميديا بتقديم برامج وبعض الكتابات، ثم التحقت بفرقة ستوديو الممثل وكان أول دخولي مجال التمثيل.
وتألقت “روڤي” خلال تجربتها الأولى على الخشبة المسرح خلال مشاركتها في العرض المسرحي “نجوم الضهر” بطولة الفنان القدير “محمد صبحي“.
وكان لجريدة “عالم النجوم” حوار خاص مع الفنانة الشابة “روڤي الشناط”.
في البداية.. كيف التحقتي بفرقة “استوديو الممثل”؟
زي كل الناس المهتمين بالتقديم في الاختبارات، كنت بسأل على الصفحة لحد ما مليت الاستمارة واتحدد لي ميعاد الامتحان وامتحنت.
ما شعورك عند وقوفك لأول مره أمام الفنان “محمد صبحي”؟
أول مرة في الامتحان على المسرح كانت ركبي بتتهز اهتزاز مش طبيعي من القلق بس كنت سعيدة وأنا بشوفه وكنت عايزة أحاول وأنا بعمل الأداء إن أنا أبص عليه على قد ما أقدر إن أنا أبقى قريبة وشيفاه في حكمه وريأكشناته وهو بيتفرج على المواهب.
حتى وأنا بقدم على المسرح كنت بحاول أملي نظري إن الاستاذ أهو بيبص عليا متكنتش عارفة أنا هشوفه تاني ولا لأ.
ماذا قدمتِ للفنان “محمد صبحي” خلال الاختبار لفرقه “استوديو الممثل”؟
أنا قدمت تمثيل وغنا جهلًا مني إني فاكرة إن لو صوتي معقول أقدر أطلع أغني ولما سمعت المواهب اللي قبلي اعتذرتله مسبقًا على اللي أنا هقدمه وكان جنبه المايسترو “سليم سحاب” فأنا كنت فاكرة الموضوع بس أداء الغنا فقدمت تمثيل وغنا فالغنا طبعًا ماكنش على المستوى اللي يُقيم من الاستاذ و”المايسترو سليم سحاب” وأنا طلعت على المسرح وقولتله بعتذرلك مسبقًا عن الغنا آه صوتي معقول بس مش صوت مطربة يعني وده مش اللي مواهب اللي الأستاذ بيختارها في الغنا بيختار قامات وكل زمايلي في الغنا في حته تانية خالص.
ف التمثيل أعتقد إنه كان كويس، لكن الغنا خسرت درجاته كلها وقدمت مسرح مشهد منى زكي ف مسرحية “كده اوكيه” مشهدها مع شريف منير وهي بتعمله الفقره الراقصة إنها عايزة تقدم استعراض وهو قاطعها ف كان لطيف يعني.
من بين آلاف المتقدمين للالتحاق بفرقة “استوديو الممثل”في رأيك لماذا وقع اختيار الاستاذ لكِ؟
أنا لم أوفق في اختبارات استديو الممثل فموقعش اختيار الاستاذ عليا كقدرات في الاختبار، الاستاذ اختارني لأني كان عندي إصرار ومثابرة وده اللي الاستاذ قالهولي بعد كده، إصراري على إني التحق بالبروڤات والورش بتاعه الاستاذ ف الاستاذ أداهي فرصة حضور البروڤات واصراري بأني اتعلم منه أي حاجة بدون أي خطط مستقبلية أو مسبقه عندي، هو الي حسس الاستاذ إن ممكن يكون الإصرار والالتزام ده سبب يطلع مني حاجة كويسة وده الاستاذ بيهتم بيه أوي المثابرة والالتزام طبعًا مع وجود الموهبة.
ما هي أهم الصفات التي يهتم الأستاذ أن تكون متواجدة في فرفته؟
الالتزام، الانضباط، السلوك الأخلاقي لأعضاء الفرقة والموهبة أكيد.
حدثينا عن شخصية “كاميليا” من وجهه نظر”روڤي الشناط”؟
شخصية “كاميليا” من أول والاستاذ بيقرأ الاسكريبت إحنا لم نكن نعلم مين الشخصيات بتاعتنا وهي خطفتني وحساها جدًا وحباها جدًا، شخصية عندها بُعد إنساني بشكل كبير جدًا بإنسانية البني آدم العادي اللي جواه الخير والشر جواها الغُلب مع الشر، هي مش شريرة شر مطلق عندها خفة ظل حلوة، هي بجهلها بتعمل تصرفات فيها خفة دم وده الكوميديا اللي الاستاذ بيتبناها أكتر وهي “كوميديا الموقف”.
فده اللي حببني فيها الجانب الكوميدي، في نفس الوقت الجانب الشرير فعملت ثراء في الشخصية والبُعد الإنساني بتاعها هي ليه أصلًا شخصية شريرة هي مش شريرة من نفسها لكن بسبب الظروف، هي ضعيفة كمان رغم القوة اللي كانت فيها دي هي في الأخر ضعيفة من جوا وهي ضحية لظروف بقى والدها وعيلتها اللي افسدوا سلوكها ومربوهاش تربيه كويسة ف ليها مبرر
وأنا كنت متعاطفة معاها جدًا بالذات في المشهد الأخير بتبين هي ليه كانت شريرة.
كيف كانت كواليس مسرحية “نجوم الضهر”؟
كواليس الاستاذ أنا أصغر كتير إني أتكلم عن كواليس الاستاذ، كواليس منضبطة كواليس خفيفة، لذيذة وكان فيها طبعًا ضغط في وقت الشغل.
حدثينا عن ردود الفعل حول دور “كاميليا”؟
ردود الفعل حول “كاميليا” أسعدتني جدًا ومتوقعتهاش ومش كلام كليشيه بس فعليًا، خلتني أقلق من الحاجة اللي جاية اللي هعملها إنه لازم تكون مؤثرة؛ لأن الشخصية كانت مؤثرة وأثرت في الناس ولازم لما أشتغل حاجة الدور الجاي لازم يكون على نفس المستوى وأحسن كمان بالنسبة لي كأداء، أكتر كلمة بسطتني أنتي مش أول مرة تمثلي، وهل مثلتي قبل كده ولا لأ والفضل يرجع للاستاذ ف أن الناس متكونش عارفة ده، إني أول مرة أمثل بدور مهم قدرت إني أوصل للناس إحساسهم بالشخصية فده يرجع الفضل فيه للاستاذ؛ لأنه خلى الناس تحس إن أنا بمثل من قبل كده وقلقني من اللي جاي إنه لازم يكون حاجة مستواها كويس وليها تأثير.
رسالة تحبي أن توجهيها للفنان”محمد صبحي”؟
أحب أقوله شكرًا إنك طلعت المسرحية دي للنور شكرًا على تعبك فيها شكرًا على صبرك علينا، شكرًا إنك خلتني أسمع ردود أفعال حلوة عليا والفضل فيها راجع لحضرتك.
وشكرًا إن الجملة اللب “أنتي مش أول مرة تمثيلي ومش أول مرة تقفي على خشبة مسرح” شكرًا إنك خلتني اسمع الكلام الحلو ده.
ما هي أعمالك الفنية القادمة بعد مسرحية “نجوم الضهر”؟
أنا دلوقتي بشتغل سوشيال ميديا، وإن الله الخطوة اللي جايه تكون خطوة كويسة.
