زياد الشرقاوي في حوار لـ عالم النجوم … “ذاكرت افلام نجيب الريحاني وسعدت بردود الأفعال”
حوار: مادونا عادل عدلي
موهبة حقيقية في عالم الفن، يبلغ من العمر 14 عام، تألق في أكثر من عمل درامي حيث أبدع في مسلسل ولاد ناس والذي تم عرضه في رمضان 2021 وشارك في بطولته نخبة كبيرة من النجوم منهم ماجد الكدواني وايهاب فهمي وصبري فواز واحمد وفيق وغيرهم
وشارك زياد الشرقاوي في رمضان الماضي في مسلسل دنيا تانية للنجمة ليلى علوي
وأشاد الكثير بزياد في العمل وأمس ظهرت موهبته أكثر في العمل الدرامي والملحمة المنتظرة مسلسل الضاحك الباكي للنجم عمرو عبد الجليل والذي قدم زياد فيه شخصية نجيب الريحاني في مرحلة الصغر
وتواصلت جريدة عالم النجوم مع الطفل زياد الشرقاوي لحوار شيق معه وإليكم نص الحوار
كلمني عن تحضريك لشخصية الضاحك الباكي؟
والله التحضير لشخصية فنان بقيمة نجيب الريحاني ماكنش سهل ابدا وكمان مرحلة طفولته كانت صعبة جدا، وعلى الورق كمان مكثفة جدا في حلقتين فقط فكان مطلوب مني اني أظهر كله في مدة بسيطة، قريت عن حياته و حاولت أشوف بعض أعماله علشان أعرف عنه أكتر، مثل مشاهد ركوب الخيل احتاجت مني اني أتدرب على ركوب الخيل قبل ما نبدأ تصوير علشان تظهر المشاهد طبيعية لانه كان بيحب الخيل جدا و كان لازم ده يبان وانا ما كانش ليا اي علاقة بالخيول قبل كده.
وفيه كمان شكله الخارجي اللي تطلب مني اني البس عدسات سوداء طول المشاهد اللي كان فيها دموع وتأثر و ده طبعا كان تحدي كبير
رغم سنك الا نك اتقنت الدور كلمني عن حد كان معاك في البروفات وقد يكون سبب في تألقك بعد شطارتك كممثل؟
في الأول أحمد ربنا كتير إنه وفقني اني أعمل الشخصية دي لأني كنت خايف جدا في الأول وخصوصا لما أقدم طفولة فنان كبير بحجم نجيب الريحاني..لكن الفضل لربنا ثم للأستاذ محمد فاضل المخرج و الاستاذ محمد الغيطي المؤلف اللي ساعدوني كتير اني اعرف تفاصيل عن الشخصية و ده اكتر حاجة ساعدتني في اداءها
مين رشحك للدور وتحب تقوله ايه؟
الترشيح جه عن طريق كاستنج دايركتور العمل الأستاذ أحمد فرغلي اللي قدمني لشركة عين للإنتاج اللي أتممت التعاقد معايا، طبعا بأشكره جدا على جهده الكبير في العمل
الناس كانت ردود أفعالها قوية وانا من ضمنهم.. فهل تابعت الردود و بتعلق على تعليقاتهم؟
الحمد لله انا مبسوط قوي بردود الأفعال دي اللي فعلا عدت توقعاتي، وعوضتني عن التعب اللي قابلنا في التحضير و التصوير و هي دي المكافأة اللي اي فنان بيستناها بعد اي عمل
واحيانا بأحاول اعلق علي بعض التعليقات الايجابيه بالشكر او التحية، اما التعليقات السلبيه بأتابعها بس وبأحاول أطلع منها اللي أستفيد منه لتطوير نفسي في المستقبل.
والدك فنان وفنان مميز شايف انك بتمثل موهبة ولا ورثت الموضوع ؟
ما أظنش ان مهنة التمثيل ممكن حد يورثها من غير موهبة، لانه حتى لو اشتغل، الجمهور هو اللي هيحكم عليه ولا يمكن حد هيقدر يفرض نفسه علي الجمهور طول الوقت إلا لو عنده موهبة
والحمد لله ان بابا عنده نفس الموهبة دي لانه بيساعدني في اوقات كتير للتحضير للشخصيات اللي بأعملها
أي اللي ممكن يخلي زياد يبطل فن ؟
ما اظنش عمري فكرت في الموضوع ده خالص لأني بحب التمثيل و عارف صعوباته و قادر أتحملها لحد دلوقتي
الفن والتمثيل مش ممكن يعوقك في حياتك الدراسية؟
والله الموضوع ده ماما أكتر حد تعبان معايا فيه ومركزة طول الوقت اني اعمل توازن ما بين هوايتي في التمثيل ودراستي لأنها مهمة جدا بالنسبالي واتمني ربنا يوفقني ويساعدني افضل محافظ على التوازن ده
كلمني شوية عن نجيب الريحاني هل شوفت ليه حاجة حبيته بسببها ولا قدمته كمشاركة عمل وخلاص؟
انا بصراحة ما كنتش عارفه زي اغلب جيلي دلوقتي، لكن لما عرفت إني مترشح للدور حاولت اقرأ معلومات عنه وشفت افلام ليه زي لعبة الست وسي عمر وكنت مبسوط اني هقدم مسلسل يعرف ناس كتير اننا كان عندنا فنان عظيم بالشكل ده
زياد أنت بتعمل دور ويتقدم شخصية بتعمل تريند وتاخد وقت وترجع بشخصية اقوى هل هذا صدفة أم انت قاصد ده ؟
بالتأكيد مش قاصد، لكن الحمد الله إن ربنا بيعوض التعب و الجهد بنجاح ولهدف مش التريند، الهدف إني أشارك في أعمال تعيش و تبسط الجمهور
هل ليك نقط معينة بتختار عليها عملك ولا أي دور بيتعرض عليك توافق عليه ؟
لا طبعا مش أي دور، وبالتأكيد برضه مش حجم الدور لكن المهم هو تأثير الدور في العمل كله و كمان إني أبقي مرتاح مع فريق العمل اللي بأشتغل معاه
أحمد فرغلي راهن عليك وكتب أنه كسب الرهان بأن كان واثق إنك هتبدع تحب تقوله اي؟
طبعا بشكره جدًا وسعيد بكلامه وبقوله راهن كمان وجمد قلبك وهنكسب كل الرهانات القادمة ان شاء الله.
