شريف خير الله من الأرقام إلى الإبداع والإلهام
إعداد وحوار / محمد فخري
الفنان شريف خير الله تخرج من كلية التجارة ثم درس وتخرج بعدها في المعهد العالي للفنون المسرحية بسبب حبه للفن. وكانت بدايته الفنية عام 1989 وشارك في العديد من الأعمال الفنية والتي كانت معظمها من المسلسلات المصرية. تنوعت أدواره فقدم أدوار الشر في العديد من أعماله وقدم أدواراً تاريخية في أعمال أخرى.
حوار / محمد خيري
• الفنان شريف خير الله بدأت حياتك الفنية وسط كم كبير من جيل العمالقة وكبار النجوم ؟
صباح الفل ياباشا ياريس طبعا الحمدلله انا بدأت مع نجوم كبار ذي كمال الشناوى وعمر الحريري ونور الشريف وعزت العلالي.
الحقيقة يعني كمية نجوم أنا كنت يعني ابنهم وكانوا الجيل ده كله بيساعد الشباب لما يلاقي حد موهوب وكويس بيرشحه بعد كدة لأعمال تانية. يعني أنا كنت أشتغلت مع أستاذ عزت في مسلسل أسمه “الظلال”. فاستمر يرشحني بعد كده في كثير من الأعمال اللي هو كان البطل بتاعها.
عزت العلايلي
أستاذ عزت قالي مرة يا شرشر أي مسلسل يجيلك فيه عزت العلايلي لازم تكلمني لو انت عايز تعتذر أو حاجة كدة يعني. طبعا الجيل ده كان يحتضن الوجوه الشابة الجديدة.
كنت أنا لسة طالب في معهد فنون مسرحية والحقيقة أستاذ عبد المنعم مدبولي عملت معاه مسلسل “أولادي”. كان أب وكان بيطبطب عليا ويقولي يا إبني كل مشهد بتعمله ذي اللعيب اللي بيجيب جون. وإنت بتجيب جون بالمشهد اللي بتعمله وكان حاببني والحمدلله.
• سمعت إن حضرتك لك تجربة شخصية مع العبقري أحمد زكي كلمنا عن هذه التجربة ؟
الحقيقة طبعاً أستاذ أحمد زكي ليه معزة خاصة لأنه دايما كان بيقولي إنت شبهي أسمر وشعرك أكرت ذي حالاتي. وإن شاء الله تبقى حاجة كويسة وانا كنت بخده مثل وقدوة. لأنه رجل مكافح يعني بني نجوميته بصعوبة شديدة وإخلاصه في العمل.
وأنا فاكر مرة قالي “بص يا شريف لازم تبقى محدد طريقك وهدفك من الأول.
وأنا أول ما بدأت كان حواليا كل جيل الكوميديانات أنا مفكرتش أضحك من خلال الإفيه والكوميديا والفن.
اضحك من خلال الشخصية
أضحك من خلال الشخصية فكان طريقي يا عم شريف إن أعمل شخصيات مختلفة يكون فيها ضحك فأنت لازم تحدد أهدافك ” . فهو الحقيقي كان مؤثر في حياتي الفنية جدا وفي قرارات كتيرة أنا كنت آخدها ومازلت بمشي عليها لحد النهاردة. وكان هو أخ كبير وصديق مخلص كان يسدي لي النصيحة باستمرار. يعني لما كان يشوف حاجة أنا عملتها لما أقابله كان يقولي إنت كنت كويس أوي يا شريف في فيلم بتاع أجدع ناس كنت عامل دور حلو. بالرغم من إنك رجل ما بتلعبش كونغ فو والفيلم عن لعبة الكونغ فو بس إنت كنت مميز أوي بين الولاد.
بردوا في فيلم سوق النساء مع شريهان قالي إنت عامل دور لطيف ناعم كدة ..
فهو كان رجل له تأثير قوي في حياتي الفنية.
• كنت مرتبط بالمخرج محمد النجار وتجمعكم صداقة قوية هل أثر فيك غيابه ؟
محمد النجار ده طبعاً مخرج كبير وعشرة عمري وأخويا والحقيقة رحيله أثر فيه جدا حسيت إن حتة من جوايا مشيت حتة من روحي راحت مني.
محمد النجار علاقتي بيه تمتد أكثر من عشرين سنة اإشتغلت معاه أعمال متميزة جدا ذي صعيدي رايح جاي. مسلسل الظلال إخراج محمد النجار وكنت مرتبط به إنسانياً أكتر كنت بعتبره أخويا الكبير لأنه كان دايماً واقف جنبي ويحبني. وشايف إن أنا – طبعا من وجهة نظره – ممثل كويس وممثل اقدر ألعب كل الأدوار بإختلافاتها الله يرحمه.
• دايما بتحب اللمة في بيتك دة حقيقي؟
هو كان في دايماً ندوات ثقافية وفنية سواء في الأدب أو في الشعر سواء في السينما سواء الأعمال الدرامية. بنتكلم عن رواية فكان دايماً في تجمعات بتحصل عندي في بيتي اللي في مصر الجديدة. بيبقى معظمها من الشعراء والكتاب والفنانين الكبار. وكنا بنتبادل فيها الآراء وحد قارئ كتاب بيقول رأيه فكانت الحقيقة فترة في حياتي ثرية جدا للمعرفة والثقافة. يعني يمكن دلوقتي إحنا مش قادرين نعملها نظراً للأحوال العالمية والكورونا اللي إحنا فيها. ربنا يرجع لنا أيامنا وتبقى حلوة ذي الأول وأحسن إن شاء الله.
• رجعتلنا بمسرحية رائعة مع مجموعة من الشباب الموهوب المتميز مسرحية يوتيرن نجحت وأبدعت فيها ممكن تحكي لينا عن اختيارك لهذا العمل وعناصر الوجوه الجديدة التي اخترتها في هذا العمل؟
يا باشا طبعاً مسرحية يوتيرن من أجمل المسرحيات اللي أنا اشتغلت فيها لأنها بتناقش قضية مهمة جدا وهي قضية العلاقات الإنسانية والأهتمام بالبيئة ونظافة البيئة وتأثير الحاجات المستحدثة ذي المصانع ومراكب النفط على التغير البيئي اللي موجود فكانت مسرحية ممتعة جدا والحمدلله كانت ناجحة بشكل كويس وحضرها معظم نجوم مصر يعني محمود حميدة الله يرحمه فاروق الفيشاوي وخالد زكي ناس كتير وكمال ابو راية ناس كتير اوي جات الرواية.
شباب موهوبين
وكان معاية مجموعة شباب متميزين وموهوبين بجد وكنت فرحان بيهم والحقيقة هما طلبوا مني نمد العرض شوية بس للأسف الشديد أنا مقدرتش كانت ظروفي الصحية إنت عارف إن أنا عملت حادثة وتوقفت المسرحية وإن شاء الله نعمل حاجة أحلى بإذن الله.
• هل بتحس بمتعة وحضرتك بتلعب الأدوار التاريخية في العصر الحديث فترة الأربعينيات ؟
الحقيقة المسلسلات التاريخية والاعمال الفنية اللي كان ليا نصيب فيها متميزة لأنها كانت مع الأستاذة إنعام محمد علي وكاتب كبير الأستاذ محمد السيد عيد فعملت أحمد فتحي زغلول في قاسم امين وعملت مكرم عبيد في مصطفى مشرفة رجل لهذا الزمان والشخصيتين كانوا في منتهى الصعوبة خاصة أحمد فتحي زغلول لأن محدش يعرفه.
أحمد فتحي زغلول ده أخو سعد زغلول ورجل قانون من الدرجة الأولى وأحد قضاة دنشواي وكان شخصية صعبة وأنا طبعا بلاقي متعة وأنا بعرف الأجيال الجديدة ذي ما أنا بعرفها أثناء الشغل للشخصيات دي اللي هي شخصيات موجودة في التاريخ المصرى المعاصر مش واخدة حقها ولها تأثير قوي في تاريخنا تاريخ المصريين فأنا بأستمتع لما أكون مع مخرجة كبيرة ذي الأستاذة إنعام محمد علي.
ومكرم عبيد بالتحديد مخدش حقه كرجل سياسي مخضرم وكان ليه ضلع جامد في حزب الوفد وخلافه مع النحاس دي تفاصيل كلها كانت موجودة في مسلسل مشرفة يمكن الناس ماتعرفهاش فطبعا في متعة إن أنا بعرض مرحلة تاريخية في كتير من الأجيال الجديدة ميعرفوهاش ببقى سعيد جداً إن أنا بوثق للمرحلة دي.
