عايدة رياض تروي قصة زواجها من المطرب الراحل “محرم فؤاد”
روت الفنانة عايدة رياض قصة زواجها من المطرب الراحل محرم فؤاد، بعد تجربة حب سابقة فشلت بسبب اختلاف الأديان.
وقالت عايدة رياض خلال لقائها مع الإعلامي عمرو الليثي ببرنامج “واحد من الناس” المذاع عبر قناة الحياة: “كنت بعمل عرض في مسرح عبد الوهاب في الإسكندرية، وجاء محرم فؤاد وعمر خورشيد وطلبوا في الاستراحة من مدير المسرح مقابلتي، ومحرم قاللي يا عايدة أنا عاوزك تقدميني فى حفلة بكرا في المسرح هنا، وثاني يوم عمر خورشيد طلب مني أقدمه”.
وأضافت: “محرم طلب مني عدم تقديم عمر خورشيد، وعرفت من مدير المسرح إنه معجب بي جدا، وعزمني أنا وزميلتي في سان جيوفاني”.
وتابعت: “أنا نزلت بعدها مصر و لم أكمل العرض، و هو كل يوم يروح المسرح يسأل عليا، و بعدها بأسبوع كنت بعمل عرض فى مسرح البالون ولقيت تليفون منه وطلب يعزمني على الغداء، ولم أتخيل إنه معجب بيا و عاوز يتزوجني، إزاى ده محرم فؤاد يعني، وطلبت منه مهلة علشان أكلم بابا آخد رأيه”.
وأكملت: “عملت خطوبة علشان أغيظ حبي الأول، وبعد كده حبيت محرم جدا وكان فرق السن بيني وبينه 20 سنة، واستمر الزواج 13 سنة ولم أنجب منه”.
أوضحت عايدة رياض سبب انتهاء زواجها من محرم فؤاد بقولها: “هو فنان عظيم ورجل مصري جدع، لكن مع العشرة اتصدمت في بعض الأشياء ولم أشعر معه بالأمان، ولما تزوجنا قعدت فى البيت، وكان غيور وخايف عليا”.
وحول سبب تعرضها للضرب من محرم فؤاد، قالت: “أخذت علقة سخنة منه أثناء الخطوبة في لندن، بسبب إن الولد اللي كنت بحبه بعت حد من أصحابه لي في لندن لأنه كان داخل الجيش ومش ممكن يسافر، وبعت خطاب على السفارة في لندن بصفته أخويا، وجالي تليفون من صديق بيطلب مني أرجع تاني ليه، و محرم سمع المكالمة وكان في حالة جنون وضربني أمام صديقه اللبناني”.
