عصام كاريكا: أنا زعلان جدا من السينما المصرية
كتب المطرب والملحن: عصام كاريكا
أنا زعلان من السينما المصرية جدا ازاي تخلي كل واحد أسمراني زيي كده ياما سفرجي يااما بواب يا جماعة، يا جماعة مش كلنا سفرجية وبوابين ومش كلنا عثمان وإدريس ومش كلنا اقفل الباب اللي فوق، حتى لما عملوا سيرة سيدنا بلال في فيلم جابه الأستاذ يحيي شاهين ابيضاني ودهنوه أسود في كده بقي، النوبة ياجماعة كانت موجودة في جنوب مصر وشمال السودان
وكان أسمها بلاد الدهب واسم النوبة ده فرعوني جاي من النوب يعني الذهب واشتهرت النوبة زمان بمناجم الذهب إللي كان أسمها النوبارية وكانت زمان النوبة ورا خزان أسوان لما ارتفع منسوب المياه غرق القرى دي كلها وابتدت عملية التهجير من سنة 63، عايز اقول في شخصيات نوبية بارزة في المجتمع زي الفنان محمد منير، الفنان حمزة علاء الدين، كان مغني وعالم موسيقي وعلى قبانه عميد ورئيس الفرقة النوبية و بحر أبو جريشة النوبين الموجودين دلوقت في مصر متقسمين جزئين ماتوكي وفادي جي، ماتوكي اللي هيا فيها بلاد جرته وجيرشه وتوشكى دهميد وغرب سهيل، اما الفاديجي، عنيبة وبلانه وحنضل وأبو سمبل بلد محمد منير الحبيب الغالي. لما تيجي تسأل في القاهرة هنا معظم الوبيين عايشين فين اقولك في إمبابة وعبدين وعين شمس. يلا نخش بقى نتكلم عن المطربين النوبين.
محمد منير وعلى قبانه وحسين بشير وبحر ابو جريشة وسيد وعبده ونصر ومنصور وحسن عبد العزيز وحسن عبد المجيد، عاوز اقول ان كان الأستاذ نصيف قزمان شركة صوت الدلتا كان من أهم المنتجين الذين كانوا بينتجوا المطربين النوبيين انتج لبحر ابو جريشة وحسين بشير وعلي قبانه وناصر ومنصور في الفترة من 82 او 83 لغاية 87 مثلا كانت شرائط بحر ابو جريشة يا جماعة في كل حته عاوز أقول من أهم الملحنين والشعراء النوبين الشاعر احمد المستشار ومن الملحنين ابرزهم عبد العزيز زين العابدين واحمد منيب وسيد السمان اغاني كتيرة كسرت الدنيا كلها من التراث النوبي الذي أحياه بشكل عصري متطور الكينج محمد منير يارب اكون جبتلكم معلومات كافية عن النوبة وأهل النوبة.
