عفاف رشاد: بكن لمحمد السبكي أبو أبني كل الأحترام والتقدير
إعداد / مايسة عبد الحميد
الفنانة عفاف رشاد تخرجت من “المعهد العالي للكونسير فتوار” شاركت بالعديد من الأعمال التلفزيونية والمسرحية. ومن أبرز أعمالها: المحترفون، لن أغفر أبدا (1981)، نساء خلف القضبان، العذراء والشعر الأبيض. قلب الأسد، عبده موتة، سمير أبو النيل. ومن أبرز أعمالها التليفزيونية : زواج سعيد جدا، نساء في الغربة، آدم وجميلة، عمارة يعقوبيان، أستاذ ورئيس قسم.
تزوجت الفنانة القديرة لفترة من الممثل سامي العدل ثم من محمد السبكي. و أم الدكتور عمر السبكي، جراح مخ وأعصاب في القصر العيني.
في حوار خاص مع الفنانة القديرة عفاف رشاد كان هذا اللقاء في عالم النجوم :
ماهي أهم الأعمال في تاريخ الفنانة عفاف رشاد ؟
أنا عندى أعمال كتير بعتز بها من ساعة ما أبتديت لحد إنهاردة هي كتيرة جدا جدا . بس أنا كل عمل أشتغلت فيه حبيته ومن الأعمال المهمة أيام زمان من أول ما أبتديت كان في مسلسل أمي الحبيبة ومسلسل وأهتزت الأرض وفي مسلسل قصة الأمس وفي مسلسل آدم وجميلة وفي الأرض الطيبة وآدهم الشرقاوي في حاجات كتيرة جدا مش قادرة أتذكر منها حاجة دلوقتي وفي ولد الغلابة وفي الأختيار وفي نساء في الغربة وفي أبدا لم يكن حبا وفي حق ميت .
في أعمال كتيرة جدا تقريبا كل عمل عملته كنت حباه وحبه دورى فيه وكل عمل دورى مختلف عن التاني والحقيقة دى مش أهم الاعمال لكن في اعمال احسن كمان من كدة .
هل ندمتي على طلاقك من المنتج محمد السبكي ؟
ندمت علي طلاقي منه أو مندمتش كل شئ قسمه ونصيب يعني .
انا بكن لمحمد السبكي ابو إبني كل الحب و الأحترام والتقدير إن انفصلنا كزوج وزوجة لكن مانفصلناش كعشرة بينا طيبة لأن بينا ولد وإحنا أصدقاء جدا ومعانا دايما وبيشوف كل احتياجاتنا وإحنا بردوا معاه وفي تواصل بينا مستمر وعلاقتنا به طيبة.
هو حد كويس جدا بنحترمه جدا وهو بيحترمنا جدا وبيحترمني كمان لأني أنا ربيتله إبنه تربية كويسة وتربية يتشرف بها وبكن له كل الحب والأحترام فهو أب حنون وأب طيب جدا ومش مخلي إبنه محتاج حاجة الحمدلله .
هل خضعت الفنانة عفاف رشاد لعملية تجميل ام لا ورأيك في عمليات التجميل؟
انا محافظة علي شكلي محافظة علي نفسي مبعملش عمليات تجميل ما حاولتش العب في خلقة ربنا كل سن وله جماله والحمدلله أنا محافظة علي وشى محافظة علي جسمى محافظة علي شكلي ووزني.
أحدثت اخر صور للفنانة عفاف رشاد على مواقع التواصل الاجتماعي ضجة كبيرة هل تسبب ذلك في مضايقتك ولماذا؟
موضوع الصورة دى جه بالصدفة البحتة وغير مقصودة تماما اني اعمل بها بروباجندة أو أعمل دعاية لنفسي أبدا أنا زي أي حد حب يغير صورة البروفايل بتاعه علي الفيس وغيرت صورتي من إلي .
كل ما في التغيير اللي حصل اني لونت شعرى صبغته بلون معين وحطيت ميكاب خفيف مع إضاءة حلوة اتصورت طلعت صورة حلوة حطتها .
تاني يوم اشوف انها تعمل ضجة أنا إستغربت أنا مش متخيله لان كلنا بنغير الصورة بتاعتنا علي البروفايل بتاعنا علي الفيسبوك ده شئ طبيعي وعادي جدا اللي مش طبيعي إن أنا لقيت الدنيا اتقلبت والصورة ومش الصورة وعشان أنا دايما بقول سني الواحد ممكن يكون عنده 80 سنة بس جواه حاسس انه مكبرش.
انا بقول سني مبخبهوش ابدا لكن انا محافظة علي شكلي محافظة علي نفسي مبعملش عمليات تجميل ما حاولتش العب في خلقة ربنا كل سن وله جماله والحمدلله انا محافظة علي وشى محافظة علي جسمى محافظة علي شكلي ووزني اه أنا كبيرة لكن هي جت كده بالصدفة مش مسألة اضيقت أي حد في الدنيا يتمني صورته تطلع تريند وإن الناس كلها تتكلم عنه ده شئ يبسط بس الشئ اللي ميبسطش ويضايقني إني بلاقي ناس متعرفنيش شخصيا.
الكلمة الطيبة
تقول كلام او تلميحات أو بتشتم عندك كلمة طيبة قولها ماعندكيش كلمة ماتقوليهاش فالحقيقة الحاجات دي ضيقتني إن هي إن الناس بتتكلم وبتشتم وبتقولني حاجات مقولتهاش لكن اضيقت في ساعتها وخلاص بس محطتش في دماغي ومردتش علي حد بيشتمني او بيتكلم كلمة تضايقني كل واحد حر في رأيه ومهما تعملي الناس كدة كدة بتتكلم محدش بيسيب حد في حاله وكويس بيشتموا فيه حسنات بخدها وانا قاعدة في بيتي مرتاحة ربنا يكرمهم ومسير اي حد قال في حقي كلمة مش حلوة انا مسمحه ومتصلحة مع نفسي متسمحه جدا مع كل الناس ومفيش اي مشاكل او اي مضايقات ولا اي حاجة .
ما رأيك في التنمر؟
التنمر ده شئ وحش جدا إزاى تتنمر علي حد وإنت متعرفهوش مجرد إن انت بتشوفه في الشاشة بيمثل ادوار أمهات مثلا أو أدوار معينة وحبني. انا شايفة الناس بتحبني لمجرد ان شكلي جه كدة في الصورة بالمصادفة فلقيت بعض الناس متنمرين ليه. وبعدين انا حرة حلوة لنفسي وحشة لنفسي انا مستغربة. وعايزة احط مائة علامة استفهام ومادة علامة تعجب وليه شتيمة وليه متضيقين أنا بنى آدمه زي أي بني آدم عادي وأقل من العادي كمان. وكنت احب دايما الكلمة الطيبة حسنة وجبر الخواطر ده مهم جدا كنت احب ان الناس كلنا نطبطب علي بعض. كلنا نحب بعض كلنا نحب الخير لبعض كلنا نبقي مبسوطين لبعض لو كلنا عملنا كدة. كانت الناس كلها ترتاح وتبقي مبسوطة ومش هيبقي في لاحقد ولا طغينة. لكن معلش مش لاقيه كلام اقوله الا الله يسامحهم.
ما رأيك وشعورك بالحدث الفريد من نوعه وهو موكب نقل المومياوات الملكية المصرية ؟
طبعا ده شئ مشرف جدا جدا جدا فرحت جدا سعيدة إن أنا مصرية يعني إنهاردة الموضوع ده حدث رائع وجميل. سمع في العالم كله هي دي الحاجات اللي نقول فيها ياسلام مصر دى الواحد يتشرف ويفتخر انه مصرى. هي دي الحاجات اللي الواحد يتكلم فيها هي دي الحاجات المهمة اللي نتكلم فيها مش تريند صورة.
نتكلم عن بلدي وتطورات بلدي وتطورات الرئيس السيسي في إنه بيجدد البلد وبيحلي الأماكن بيخلي مصر جميلة ونفتخر بها مهتم بالصحة والعلم. ومهتم بأصحاب المعاشات مهتم بأقتصاد البلد. عايز مصر تبقي أجمل بلد في العالم إحنا بنشكره جدا وبنقول الحمدلله إن ربنا بعت لنا رئيس زي السيسي. بنفتخر به ونفرح به وننام كدة علي مخدتنا وإحنا في طمأنينة وفي سعادة وأرياحية. مرتاحين ومبسوطين إن عندنا رئيس جميل زي ده ربنا يخليه لنا ويبارك لنا في صحته يارب. ومصر دي جميلة وهتفضل جميلة غصب عن أي حد. هتفضل جميلة ودايما في القمة والصدارة إن شاء الله.
ماذا عن آخر أعمال الفنانة عفاف رشاد؟
الحقيقة أنا كان عندي مسلسل إسمه ” ورد ” كان بتاع حنان مطاوع إحنا صورنا تقريبا ربعه. وإنتظرنا شويه عشان هي بتعمل مسلسل عرضه في رمضان اللي هو ” كابل”. منتظرين بعد رمضان نكمل التصوير في المسلسل.
تأليف الأستاذ فتحي الهندي وإخراج الأستاذ شادي. ابو شادي يعني من المخرجين الجميلة اللي أتمنى إنه إن شاء الله يوصل ويبقي من المخرجين اللي معدودين علي الصوابع. حد كويس جدا حد محترم جدا مخرج جميل جدا. ومتنبأه له إن شاء الله انه يبقي من المخرجين اللي ليه علامة في مجال الإخراج .
كان في مسلسل تاني كنت هشتغل فيه بس جيت في الاخر لقيت نفسي مش هقدر اعمله لظروف خاصة بيه.
