على طريقة أحمد عزمي وكريم الحسيني.. راندا البحيري تستنجد بالمتحدة
كتبت / مادونا عادل عدلي
في الفترة الأخيرة قام عدد من الفنانة بالشكوى لشركة المتحدة وشركات الإنتاج بسبب قلة العمل منهم أحمد عزمي وكريم الحسيني ونشوى مصطفى
ومنذ ساعة فقط نشرت راندا البحيري عبر موقع التواصل الاجتماعي فيسبوك وكتبت
الشركه المتحدة للخدمات الإعلامية، السيد نقيب المهن التمثيلية تحية طيبة و بعد هذا ليس بيان شجب و لا شكوي ولا أي شئ آخر، كل ما في الأمر عرض موضوعي علي حضراتكم.
وتابعت: لقد حوربت بداخل شركات الإنتاج المصريه و تم منعي من العمل بدون إبداء أسباب و بالفعل بعد اكتر من بروفه ل لأكتر من عمل و اكتر من محاولات لدخولي أعمال فنيه ((بلاقي نفسي فجاه اتشالت منها و مش فيها و العمل بيكمل من غيري))
الكلام ده بيحصل بالظبط بقاله اكتر من ٧ سنوات و بيحاولوا فيه بقالهم اكتر من ١٣ سنه بمساعدة احد الأشخص خارج المجال الفني.
وإستكملت “و ليس هذا صلب الموضوع أبداً أنا بتعرض بقالي اربع سنين دلوقتي لضغط لا يمكن لواحده ست تقدر تتحمله لوحدها.
أنا مشتكتش و لا خليت شكل الفن و الفنانين وحش و التزمت الصمت و بقالي سنين بحاول اشتغل في مشاريع و فيه منها اللي ربنا كرمني فيه و فيه منه اللي علشان عدم خبرتي الكبيره انذاك أتنصب علي فيه
يعني بسبب ان مفيش عدل في المنظومة أتنصب علي في فلوس كنت شغاله بيها و جايباها ب تعب كبير جدا.
وأكدت: كنت طول عمري شخص ماشي صح جدا فيما يخص الأوراق و حق الدوله و ضرائبي كلها مدفوعه من ٢٠٠٤ يعني بقالي ٢٠ سنه بدفع للضرائب
و اظن لو أنا شخص مش ماشي صح مع الضرائب كان من زمان هتلاقي حد قال راندا مدفعتش او معملتش او كذا و كذا. و محدش أصلا يقدر يشكك في حبي لبلدي الشديد و وطنيتي و في نزاهتي الحمدلله رب العالمين.
اكتشفت من فتره انهم حاطين عليّ ضرائب جزافية بالرغم من اني مبشتغلش في التمثيل أصلا
و كل ما اكلم حد في المبني بيقولي اصل الممثلين كلهم حصل معاهم كده مش انتِ بس !!!
طب أنا بتكلم عن نفسي
اتكلمت مره و اتنين و كلمت نقيبي السيد اشرف ذكي
و هو أعطاني نمرة تليفون الاستاذة مها المختصه عن الممثلين امام الهيئه العامه للضرائب بحيث انها تفهمهم و قالي ان الموضوع ده هيخلص
لان الممثله دي حاليا لا تعمل بالتمثيل
ف مش هينفع اننا ندفعها فلوس قديمه هي أصلا دفعتها قبل كده.
و بالمستندات احنا “أنا و المحاسب الضريبي المحترم اللي شغال معايا” دفعنا الفلوس اللي علينا من قبل ٢٠٠٥
كل سنه بندفعها في سنتها
انما .. هم مره واحده، عايزينك تدفع، ضرائب جزافية هم اللي حسبوها من غير ما يرجعولك
واضطريت في المره الأولي نظراً لحبي لبلدي و احترامي لكيان الفنان المصري و عدم اهتزاز صورته امام المصريين و العرب اني امضي عل رقم كبير جدا مع اني متأكدة ان أنا مش المفروض ادفع الكلام ده.
عل وعد منهم “و السيد احمد عبد الغني” اني هدفع اصل المبلغ و مش هدفع غرامات على المبلغ ده.
و بالفعل وقفوا غرامات و بقالي كذا سنه بقسط المبلغ ده للضرائب لحد الحمدلله ما خلصته كله.
فوجئت بعد ما المبلغ خلص اولاً ب مبني القيمة المضافه بيكلمني عايز يدفعني غرامة بالرغم من انهم وعدوني مفيش غرامات.. و الغرامه دي اكتر من المبلغ نفسه اللي بقسطة بقالي سنتين
ثم اتصال من كذا مأمور ((ضرائب عامه)) طالبين مني فحص كل سنين العمل اللي اشتغلتها.
افحص ٢٠٠٦ اللي ورقها بقي لونه اصفر ؟؟؟؟؟
و طالبين اني ادفع من ٢٠٠٦ لحد ٢٠٢٤ يعني ١٨ سنه ضرايب أنا دافعاهم أصلا قبل كده.
قولتلهم أنا دفعت ده،
قالولي مينفعش، قولتلهم ايه هو اللي مينفعش ، قالولي اصل احنا واخدين تعليمات ان كل الممثلين يدفعوا أزيد من اللي دفعوه.
قولتلهم التعليمات دي منين ؟؟ محدش رد.
قالولي كده كده هتدفعي حتى لو دفعتي قبل كده.
مع الضغط عليّ
اضطريت اني اعمل جلسات مع الضرايب لحد ما كل الناس هناك بقوا يشوفوني يومياً و بجد فيه ناس تعاطفت جدا مع موضوعي لأنهم بالفعل شايفينني دفعت قبل كده.
إلا مختصة الحجز كل يوم بتكلمني (((أنا هحجز عليكي))).
أنا اول مره أشوف موظف بيتصل ب عميل الساعه ٨ بالليل بعد مواعيد العمل علشان يقوله أنا هحجز عليك
يتم تهديدي يوميا بالحجز علي أموالي
يتم تهديدي يومياً بالضرايب مع اني دفعت كل ضرائبي لحد آخر عمل عملته.
يتم تهديدي يوميا بالضرايب مع اني لا اعمل مع المتحده و لا غيرها.
السيد نقيب المهن التمثيلية
الساده المسئولين عن الإنتاج في مصر، ارحموا الممثل المصري
ارحمونا
و بجد بجد والله ما بطلب شغل أنا أصلا فقدت الشغف كممثلة و مش عايزه أشوف وش الكاميرا دي تاني.
أنا فعلا كل اللي طالباه إنكم تسيبوني في حالي. بس مش اكتر، يا أسيادنا أنا عايزه اكمل حياتي في مصر
وإختتمت “مش عايزه أدور على شغل برا، و لا عايزه أعيش في حته تانيه ليه مصممين تزقونا كلنا ندور على حياتنا في حته تانيه.
أنا قاعده هنا.
