عنبر: بعتبر نفسي من الفنانات المحظوظة لعملي مع كبار الفنانين
إعداد وحوار / نهى مرسي
الجزء الثاني من اللقاء
الفنانة عنبر ممثلة مصرية، شاركت العديد من الأعمال. وقامت بعدة أدوار مختلفة تركت بصمة قوية وتعلق بها الجمهور لأتقانها في العمل وأحترافها في التمثيل ، عملت مع كبار النجوم منهم الفنان عادل أمام والفنان أحمد زكي والفنان محمد صبحي، من أبرز أعمالها أنا وهؤلاء، السندريلا، حاحا وتفاحة، عفاريت عدلي علام، شطرنج، عفاريت محرز، مملكة الجبل، في إيد أمينة، والعديد من الأعمال الأخرى.
وفي لقاء خاص مع الفنانة عنبر في عالم النجوم أستكملنا معها الحوار:
– على الرغم من ملامحك الجميلة الهادئة أريد ان أسأل حضرك لماذا تعشقين أدوار الشر ؟
والله أنا مش بعشق أدوار الشر ولا حاجة .. بس الظروف يعني إن أنا اتعرض عليا أكتر من دور فطلعت فيهم شريرة شوية فشافوا إن أنا بعمل أدوار الشر حلو أوي ؛ وإلى حد ما عملت أمور من دور بس مش كل أدواري أدوار شر أنا ليا أدوار إنسانية جدا جدا جدا في (الدم والنار) مع دكتور “سمير سيف” رحمة الله عليه و(أولاد عزام) مع استاذ “علي عبد الخالق” .. حاجات كتيرة جدا جدا و(أشباح المدينة ) مع “عمرو عابدين” و(أنا وهؤلاء) مع أستاذ “محمد صبحي” وأستاذ “عصام شعبان”.. في أدوار كتيرة جدا و(ونيس وأيامه) لكن في أدوار عملتها مع استاذ “محمد صبحي” (عايش في الغيبوبة) و(رجل غني فقير جدا). كنت شريرة فيهم لكن كان في دورين طيبة ودورين شريرة ليا أدوار كتيرة جدا إنسانية.
في (ريا وسكينة) هي مكانتش شريرة خالص على فكرة بالعكس بدليل إن هي الضحية اللي الناس كلها زعلت عليها .. لكن علق مع الناس بعض أدوار الشر اللي أنا عملتها جدا .. دكتور”سمير سيف” رحمة الله عليه كان يقولي وشك يدي كل حاجة .. يدي الطيبة أوي ويدي الشر أوي يعني ربنا مديكي ميزة كده إنك تقدري تعملي كل الأدوار. لكن أنا أصلا مكنتش شبطانة في أدوار الشر هي جت بالصدفة البحتة على فكرة.
– علي الرغم من عملك مع كبار الفنانين الا ان هل هناك فنان أو فنانة تتمنين العمل معه ؟
فعلا أنا كنت بعتبر نفسي من الفنانات المحظوظة جدا.. إن أنا فعلا عملت مع كبار الفنانين وكبار المخرجين .الحمد لله اتبناني مخرجين كبار زي دكتور “سمير سيف” رحمة الله عليه.. زي أستاذ “أحمد خضر” رحمة الله عليه ، نجمنا الكبير ربنا يديله الصحة. ويجعله في حياتنا دايما يا رب موجود النجم الكبير “محمد صبحي” لما تبناني وعملت معاه أكتر من دور الحمد لله. ودكتور “سمير سيف” عملت معاه سلسلة أعمال وأستاذ “أحمد خضر” الحمد لله وأستاذ “ضيا فهمي” في ناس كتيرة جدا جدا على فكرة كان ليا الشرف إن هما كانوا بيشوفوا فيا حاجة فكنت بشتغل معاهم كتير جدا في معظم أعمالهم تقريباً. وكنت محظوظة طبعا إن أنا وقفت مع نجوم كبار زي النجمة “ليلى علوي” والنجمة “إلهام شاهين”. والنجمة “يسرا” والراحل الجميل نجمنا الكبير”فاروق الفيشاوي” والنجم “حسين فهمي”.
النجم “خالد صالح” ونجمنا طبعا استاذي واللي كان ليا الشرف إن أنا أقف قدامه النجم الراحل “أحمد زكي”. كان وسام على صدري إن أنا أشتغل مع مثلث جامد جدا ، استاذنا الراحل المؤلف “وحيد حامد” دكتور “سمير سيف” رحمة الله عليه.. استاذ “أحمد زكي” رحمة الله عليهم الثلاثة كانوا ثالوث كده وكنت أنا برده لسة مش بقالي كتير. وكان ليا الشرف إن أنا أشتغل في (معالي الوزير) معاهم هما الثلاثة ومن بعدها تبناني دكتور “سمير سيف” في كل أعماله بجد كان ليه فضل عليا بعد ربنا سبحانه وتعالى، ربنا يجعله في ميزان حسناته كان من الناس اللي وقفت جنبي كتير. وقفت طبعا مع الزعيم النجم الكبير الأستاذ “عادل إمام” والمخرج المحترم أستاذ “رامي إمام” ، وده كان ليا الشرف جدا فأنا فعلا كنت محظوظة وكتير كانوا بيحسدوني إن أنا وقفت قدام نجوم كبار جدا.
أكملت الفنانة عنبر حوارها قائلة
طبعا آسفة لو في ناس كتير لإن أنا وقفت تقريباً قدام نجوم كتير كتير كتير أكتب من كده بكتير كمان .. أنا على فكرة اشتغلت مع النجم الكبير”أحمد مظهر” عملت بطولة مسلسل للأطفال في صوت القاهرة وكان أبويا في المسلسل كان النجم الكبير “أحمد مظهر” .. الأستاذة “سناء جميل” في مسلسل اسمه (سبع صنايع) برده كان ليا الشرف إن أنا وقفت في يوم من الأيام قدامها .. الحمد لله كنت محظوظة ، الأستاذة الكبيرة “سميرة عبد العزيز” والأستاذة الكبيرة “كريمة مختار” يعني الحمد لله وقفت قدام نجمات وقدام نجوم مكنتش أحلم إن أنا أقف قدامهم والحمد لله اشتغلت معاهم وكنت قد الثقة وقد الموضوع.
لكن كان في نجوم طبعا كبار أنا أتمنى أقف قدامهم .. نجمنا الكبير”يحيى الفخراني” من الناس اللي بتمنى فعلا أشتغل معاه ، النجم “أحمد السقا” ، “مصطفى شعبان” ، “عمرو سعد”، “أحمد حلمي” ، “محمد إمام” يعني في ناس كبار وفي ناس كتيرة جدا جدا جدا أتمنى إن أنا إن شاء الله أحوز على حد إن أنا أقف قدامهم في أعمال قادمة بإذن الله .. لكن كل شئ نصيب طبعا وأنا راضية باللي ربنا كاتبه وإن أنا كان ليا الشرف إن أنا وقفت قدام كل النجوم الكبار دول .. كنت محظوظة بأمانة.
