فاطمة الكاشف: عيلة الفقري بعد نجاحها هنلف بيها محافظات مصر
إعداد وحوار / دعاء نصر
الفنانة فاطمة الكاشف اهلا بيكي من داخل المسرح الكوميدي في حوار خاص بجريدة عالم النجوم
مسرحية عيلة الفقري حققت نجاح كبير وبناءا عليه لفت محافظات مصر .. كلمينا عنها ؟
أولا اهلا بك يا دعاء إعلامية متميزة
سعيدة بالحوار معاكي احنا بنعمل مسرحية عيلة الفقري المسرحية كلها بندي جرعة تفاؤل للمتفرج إنه ما يتشأمش وإنه مش معنى إن في ظروف وحشة أحنا بنمر بها مش معنى كده انه كل الأيام اللي جاية وحشة لا الأيام اللي جاية هتبقى حلوة والحاجات الوحشة دي بتكون سبب الحاجات الحلوة اللي هي مرال المسرحية كله اللي تخاف منه مفيش أحسن منه أو عسى أن تكرهوا شيئا وهو خير لكم فاحنا بنعملها كلها بونبوناية دمها خفيف بتدي جرعة تفاؤل خصوصا الظروف اللي احنا بنمر بها دي ظروف الكورونا الناس تعبانة ومضايقة وحصلت لنا ظروف وحشة كتير اوي فحبينا ندي التفاؤل وندى بسمة خفيفة وموضوع خفيف ودمه خفيف والحمدلله لقى نجاح كبير أوي واحنا دلوقتي في نهاية الموسم الاولاني له والفترة القادمة هنلف بيها محافظات مصر بناءا على رغبة الجمهور بعد ان حققت هذا النجاح وأن شاء الله نفتحها تاني على العيد بإذن الله.
الفنانة فاطمة الكاشف العائلة كلها فنية من أول الفنان الكبير جمال عبد الناصر وحضرتك ومازن جمال عبد الناصر ..
النجم الشاب مازن كان له الرغبة انه يدخل مجال التمثيل ولا كان ضغط عشان عيلة فنية مامته وباباه نجوم كبار فضغطوا عليه عشان يطلع زيهم؟
لا والله يادعاء انا بصراحة ماكنتش عايزة يدخل الفن لا أنا ولا جمال بدليل اننا دخلناه إعلام انجلش ومرضناش ندخله المعهد بس هو دخل إعلام إنجلش خلصه ودخل المعهد بردوا يعني ده المشكلة بقى يعني هو عايز كمان، هو بدأ إخراج كان مساعد مخرج اول مع بيتر ميمي في الأب الروحي وفي الطوفان مع خيري بشارة ومع محمود كامل في سهام المارقة مساعد مخرج اول بس بعد كده قالك لا أنا همثل بس الحمدلله هو عمل أعمال حلوة في وقت قصير بتنبئ ان شاء الله أن هو هيبقى مميز يعني ان شاء الله.
عيلة الفقري اخر أعمال الفنانة فاطمة الكاشف في أعمال تانية هنشوفها ؟
عندي أن شاء الله عملين في رمضان أنا بقراهم حاليا بس لسه محددتش واحنا خلاص خدنا عهد علي نفسنا ان إحنا منقولش العمل اللي احنا بنشتغل فيه اه لان احنا ممكن نتغير طالما لسه ماتصورناش لحد ما تصوري اوكي خلاص بنقول على طول واول خبر هيبقى لك ان شاء الله ونورتينا في المسرحية وكل سنة وانتي طيبة وسعيدة بحضورك جدا.
كلمة الفنانة فاطمة الكاشف في عيد الأم:
كل سنه وكل أم طيبة وبخير وصحة وسعادة لأن الأم أجمل ما فى الكون هى الحنان والأمان أرجوكم حافظوا على أمهاتكم هم الخير لكم فى الدنيا والآخرة واحب اقول لماما وحشتينى قوى الدنيا ليس لها طعم من غيرك ياغاليه الله يرحمك ويغفرلك ويجعل مثواكى الجنه أن شاء الله.
