فيصل ندا وحوار خاص مع عالم النجوم .. “الجزء الثاني”

فيصل ندا : عجبني الاختيار لأنه كان مسلسل جيد جدا وعجبني 100 وش لانه مسلسل جيد و شوفت كل الأعمال لكن مفيش حاجة شدتني

حوار / دعاء نصر

فيصل ندا كاتب وسيناريست مصري كبير، ولد بحي عابدين بالقاهرة سنة 1940، وهو خريج المدرسة الإبراهيمية بجاردن سيتي، ألتحق بعدها بكلية التجارة جامعة القاهرة قسم المحاسبة، وتخرج منها عام 1963 وكان عضوا في فريق التمثيل بالجامعة، إلى جانب كونه أحد أعضاء فريق التمثيل بالكلية.

عقب تخرجه التحق بوزارة المالية، إلا أنها لم ترض طموحه وأحلامه والتي بدأها منذ كان بالكلية عبر كتابته لمسرحية قام بالتمثيل فيها مع زملائه بالكلية، بينما كان أول مسلسل تليفزيوني له هو (هارب من الأيام)، والذي تمكن عبره من إنشاء أسس وقواعد كتابة المسلسل التليفزيوني، ومن خلاله اشتهر العديد من نجوم الفن

ساهم في دفع عجلة الإنتاج السينمائي منذ عام 1968 بعد تأميم صناعة السينما المصرية وهجرة الفنانين إلى بيروت وتركيا، وفي عام 1974 عاد مجددا للتأليف المسرحي عبر مسرحية (من أجل حفنة نساء) ومسرحية (المتزوجون) عام 1976، وأتبعها بعدة مسرحيات حتى خاض تجربة التأليف الإذاعي أيضا عندما قدم المسلسل الكوميدي (الناجح يرفع إيده)، من أبرز أعماله أيضاً ( قضية سميحة بدران، المغتصبون، الفجالة).

استكمالا لحوار الكاتب الكبير فيصل ندا : “الجزء الثاني”

ايه راي حضرتك في الفنان محمد رمضان والضجة اللي حصله حواليه؟ شايف ان هو فعلا بوظ الذوق العام ولا هو بيواكب العصر الحالي؟

بصي محمد رمضان موجة من الموجات اللي اعترضت حياتنا الفنية فترات طويلة جدا منقدرش نقول ان محمد رمضان اللي بوظ الذوق لا دا احنا اللي بوظنا الذوق، الدراما التي تعرض كلها مش محمد رمضان اللي مسؤل عنها لان حاجات كتيرة جدا بلا مبادئ بلا قيم بلا أخلاقيات، انا بقولك عملت 104 فيلم و 80 مسلسل و11 مسرحية مفيش لفظ نابي لكن اللي بيتعرض علي التليفزيون بيدمروا اخلاقنا ومبادئنا، والقيم بتاعتنا، فا مش محمد رمضان فقط

اللي افسد التليفزيون كلنا مجرمين كلنا شرعنا في تبويظ الدراما التليفزيونية، لكن محمد رمضان ممثل بيجيلوا الدور الذي يناسبه، المنتج بينقلوه اللي بيجيب جماهير والسينما عايشة الدراما عن المخدرات نجح تلاقي كل افلام الموسم عن المخدرات ، فيلم كوميدي نجح تلاقي كل الموسم افلام كوميدية سلملى على البتنجان وسلمي علي مش عارف ايه، هو ده مش تبويظ لأخلاقيات الشعب يعني ما نعطيش لرمضان انه هو اللي بوظ لنا الدراما ولا بوظلنا أخلاقيات المجتمع، والنقاد كمان النفاق بتاع السوشيال ميديا بيقول جاب اعلى نسبة مشاهدة فين ؟

أين مشاكل مصر في الدراما الرمضانية 2020

انا مرة راجع من بيتي متأخر لقيت مراتي نايمة وفاتحة التليفزيون، وعلشان انا كنت رجلي مكسورة قعدت علي الكرسي بقلع لقيت في حتة كده في الجامعة طلبة بيبيعوا مخدرات، والعميد بيقولهم وماله دي حرية شخصية قولت ايه المصيبة اللي احنا فيها دي، وقلعت وقعدت على السرير عاوز اعرف ايه المسلسل ده

طبعا جت فترة الاعلانات واستحملتها بس برده ماقالوش اسم المسلسل اضطريت استحمل جزء تاني بينت جايبة رفيقها ينام معاها، امها موجودة وترحب به ويدخل الاوضة ويقفلوا علي نفسهم ايه ده هل وصلنا لدرجة دي، وبعدين الاقي بيقولوا دا الجار السابع والاقي بيقولوا دا على مستوى عالي اوي، واعلى مسلسل ومسلسل هايل ويعبر عن مشاكل مصر، هيا دي مشاكل مصر وبيع مخدرات في الجامعة من مشاكل مصر ولا الانحراف الخلقي، من مشاكل مصر يعني السوشيال ميديا بوظت الدنيا يعني جملت القبيح.

بالنسبة للكتاب الشباب شايف ان فيهم كاتب كويس وله مستقبل ولا مفيش ؟

هقول لحضرتك حاجة من ضمن الذي أفشل الدراما الورش اللي انتشرت، هو في طبعا بعض الكتاب الشباب جيدين وبتابعهم في أعمالهم، انا بتابع كل الاعمال لعلمك يعني انا مشاهد جيد لجميع الدراما التليفزيونية في أعمال اللى كتباها الورش انا شايفها اسوأ اعمال ، ليه لان بيتخدوا كل واحد بياخد شخصية ويعملها حدوته ويلذقوا المشاهد جانب بعض، مفيش خط ربطك للمسلسل الا الابطال في الورش دي هيا اللي أفسدت الدراما التليفزيونية فكاتب العمل الدراما ده رؤية، يعني الكاتب أسامة أنور عكاشة له رؤية، جلال عبد القوي له رؤية، المؤلف الواحد له رؤيته له وجهة نظره، لكن هجيب عشرة يقولوا رؤية

حكاية الورش دي وطبعا هما يلجأ لها لانها الخاص، وبعدين احنا لما كنا بندخل مسلسل بيكون مكتوب كاملا دلوقتي مكتوب 3 حلقات بيدخلوا يصوروا، يعني بشوف دلوقتي وانتي بتكلميني حواديت الشانزليزيه مليون شخصية بكل واحد حدوتة اية الرابط اللي بينهم متعرفيش غير رجل مع كل الستات كأن مفيش راجل غيره في المجتمع كله دا إفساد للدراما، فين الكوميدي في العمل الرمضاني غير 100 وش .

انا كنت عاوزة اسأل حضرتك السؤال ده

إيه رأيك في المحتوي اللي بيتقدم حاليا سواء في الدراما أو السينما؟ واية العمل اللي شد حضرتك في دراما رمضان واكتر فنان عاجبك وأكتر فنانة ؟

انا عجبني الاختيار لأنه كان مسلسل جيد جدا وعجبني 100 وش لانه مسلسل جيد و شوفت كل الأعمال لكن مفيش حاجة شدتني ، شوفت عادل إمام طبعا كله، لكن في المسلسلات الكوميديه دي كانت مسخرة الممثلين الكوميديين اللي بيالفوا الكلام الفارغ والألفاظ النابية اللي بيقولها كلام فارغ

كان في فنانة أو فنان عجبوا حضرتك في رمضان؟

عجبوني ايه، دي أعمال كوميديا دي اللي اتقدمت، دا منتهى الاسفاف، شوية ناس ، في ورشة شرف فاكرين الكوميديا تهريج ، والتقليد الفوري وبعدين منكوبين بيهم كل سنة ليه، فين دراما الموقف فين الكوميديا اللي بتعبر عن مشاكل الناس ، فانا اشمئزيت من الكوميديا اللي اتعملت في رمضان كنت فخور بالاختيار طبعا من احسن المسلسلات اللي اتعرضت، فكريني بس مسلسلات اية وانا اقولك، دا دليل علي ان مفيش حاجة علمت معانا ، انتي فاكرة ليالي الحلمية ولا نسياها “اه طبعا”، رأفت الهجان ولا لا، بقولك مفيش حاجة بتعلم حاليا،
السنة دي واللي قبلها واللي قبلها، كل مدي الوضع بيسوء بينا ، اية النكبة اللي احنا فيها دي.

ايه الجديد والحصري للكاتب والسيناريست فيصل ندا في الفترة القادمة ؟

الجديد والحصري إن بعمل مسلسل اسمه الفرس الرابح او لا بيتصور في دبي وباريس واسبانيا، بيلم جميع ممثلي العالم العربي الوجوه جديدة وده بيتعرض علي مشاكل العالم العربي يعني دبي شركة مقاولات وابطالها من كل الدول العربية وكل واحد جاي من دولته العربية شايل مشاكل بلده ف بناقش كل قضايا الدول العربية من خلال المسلسل ده 150 حلقة، وكنا هنصور لولا رجلي اتكسرت ولولا كورونا كنا بدأنا فيه، فان شاء الله ده هيكون البداية بتاعتي.

بمناسبة كورونا في سؤال هنقول فيه ايه الفرق بين فن زمان ايام ما حضرتك كتبت “غريب يا ولدي” وبين دلوقتي لو حضرتك هتكتب في زمن المهرجانات وكورونا اكيد هتختلف كتير؟

مش هعرف اكتب هفشل ان اكتب حاجة تمشي مع هذه الموجة لان احنا عاوزين مش انا المصلح الاجتماعي، اللي هصلج من الجمهور افسدنا ذوق الجمهور، انا كتبت الفرس الرابح انا كبرت أن أناقش قضايا محلية لان خلصتها كلها، ف بتجهه لقضايا عربية كبيرة بين الانقسام اللي موجود في العالم العربي، صعب اللي بيحصل في سوريا وشوفي اللي بيحصل في العراق صعب عليا كمؤلف، اقعد اتفرج علي اللي بيحصل في الوطن العربي وهو بيسوء بهذا الشكل.

الكاتب فيصل ندا إيه رأي حضرتك في تجميع النجوم من مسلسل لفيلم بنفس الوجوه أو العكس ؟

بصي هو تجميع النجوم لا يضيف شئ المهم الورق، السينما أو التليفزيون أو المسرح بالورق، اولا واخير لكن مش بالنجوم العمل هينجح، ماذا يقول الورق هل هيشد الناس ولا لا، يعني انا فرحتي الم الممثلين اجيب سمير غانم على عادل إمام علشان اقول الفيلم هينجح، ماهو بما ان الفيلم اللي قبليه نجح محسوبة غلط، هقولك حاجة صغيرة انا صانع النجوم انا مبعتمدش ابدا علي نجم في كتاباتي، وان انا اكتب واحط نجم في اختياري انا بعد ما بكتب النجم اللي بيفرض نفسه على كتاباتي ، والنجم ده انا اللي بصنعه انا 80٪ من فنانين مصر انا اللي مكتشفهم عارفة كده ولا مش عارفة، “لا دي أنا عارفاهم كويس جدا” ربنا يخليكي .

حضرتك كنت متوقع أسألك سؤال مسألتوش؟ بمعني كان اية السؤال ايه يعطي لحضرتك فرصة تطلع اللي ف قلبك ؟

لا انتي تقدري تسأليني انت شايف مصر ازاي دلوقتي، ساد علي الشعب المصري الاهمال والاستهتار واللامبالاة، مليان بالكدب والانانية مبقاش الشعب المتكاتف مش زي زمان، يعني انا بقعد جنب الشباك في الشمس الصبح شايف الناس في ازمة كورونا مش ماشين بكمامات، ولا حاجة ف بشوف أخلاقيات الناس اتغيرت مابقتش هيا الناس بتاعة زمان، اختفى الحب في قلوبنا أصبح الكراهية والحقد والتنمر اللي بقينا عايشين فيه

صعبان عليه الشعب المصري في هذه المرحلة اللي وصلنالها واية اللي وصلنا ليها يعني احنا زمان لما كان بيطلعنا حاجة في التلفزيون، صور الافلمة بنقعد نتناقش بالمحبة ونناقد بعضينا، دلوقت فين كل واحد دلوقت عاوز يهدم اللي ادامه محدش بيحب نجاح حد انتي محدش حابب نجاحك انا حابب نجاحك لان انا الجيل القديم اراهنك لو لقيت اتنين زي، “لا مستحيل”

حضرتك تقول ايه لمحبينك بمناسبة عيد الاضحي وبتتمني تحقق أية قبل انتهاء 2020 ؟

هقولك حاجة صغيرة انا الحمدلله حققت كل أحلامي في خلال رحلتي في الحياة عملت مسرح باسمي عملت افلام ناجحة سايب اسم للتاريخ مالوثتش اسمي يعني معملتش عمل بعد العمر الطويل ده عملت مسلسل ولا فيلم فشل حافظت على اسمي وعلى كياني فأنا عاوز واتمنى ان اظل محافظا على تاريخي.

الكاتب الكبير فيصل ندا حضرتك تقول ايه للناس اللي بتحبك ؟

هقولهم كلوا لحمة هههههههههه، هقولهم ربنا يخليكم وعيد سعيد عليكم والسنة الجاية، نكون خلصنا من مأساة كورونا ويكون عاد الحب بينا ونرجع تاني زي زمان شعب متكاتف ناس محبة لبعضها، ناس هدفهم يساندوا بعضهم، دا انا اكتر واحد بتصدم في الناس، انا بتصدم فاقرب الناس اليكي ، والناس اللي انتي كويسة معاهم

يعني الناس تحبيهم وتساعديهم وتعطيهم فلوس وتلاقيهم في الاخر الندالة متناهية، يعني انا عندي تلفزيون 34 بوصة بكلم واحد عملي خدمة قولت اعطهوله مجاش ولا عبرني ولا حتى اتصل اعتذر، كلمت واحد تاني تعال يابني خده بشوف مين اولي بيه انا لا عاوز فلوس ولا عايز حاجة، في نهاية الأمر أنا بشكرك جدا علي هذا الحوار تحياتي .

تهنئة رائد الدراما العربية بعيد الأضحى المبارك ونصيحته بخصوص لحمة العيد