كدبة أبريل “أنا هكدب كدبة علي فكرة” .. بقلم / جيهان عكاشة

كدبة أبريل .. هكدب
بس المرة دي بقي كدبة بجد
مش ناوية أخاف قوي من بكرة..
ولا أتألم تاني لفراق حد

كدبة أبريل .. أنا هكدب كدبة علي فكرة ..
بس المرة دي بقي كدبة بجد.
مش ناوية أخاف قوي من بكرة..
ولا أتألم تاني لفراق حد.

ولا عاوزة أمان ولا محتاجة..
ولا ضهري مقطوم ولا حاجة..
وقررت أعيش اللي فاضلي….
حاطة أعصابي في تلاجة.

ولا نفسي أرجع أضفر شعري..
ولا ألبس فستان كرانيش.
والدنيا عادي قوي تهبدني…
وتشبع فيا قسوة وتلطيش.

ولا عاوزة فانوس جواه شمعة…
ولا حتي يكون بابه إزاز.
ولا ألاقي صورة لبيت جدي…
ولا نفسي أعملها برواز.

ولا عاوزة الأبلة ترسملي…
نجمة علي إيدي عشان شاطرة.
ولا نفسي أفهم ليه مشاعرنا …
الحلوة بتبقي مجرد فترة.

ولا نفسي أنام يوم واحد …
من غير ماتعب م التفكير.
ولا نفسي أي سؤال غامض…
ألاقي له إجابه و تفسير.

ولا نفسي أحس إن دماغي…
مافيهاش كراكيب.
ولا حتي أفك قيود قلبي….
جوه السراديب.

ولا نفسي في مرة مابكيش …
لما يغني حليم “سواح”.
ولا أشوف في الغربة خرابيش…
ولا بحلم حتي إني أرتاح..

عادي يادنيا حاسبيني…
وخدي مني كمان البقشيش.
أنا مش عاوزة حاجة بجد…
وخلاص بقي بح مانفسيش.