كريم سامي مغاوري: في إعدادي كنت بألف مسرحيات وكنت بخرجها
إعداد/ نهى مرسي وحوار / سعيد المسلماني
الفنان كريم سامي مغاوري، ممثل مصري، حاصل على بكالوريوس المعهد العالي للفنون المسرحية بالتمثيل والإخراج عام 2007. وهو نجل الفنان القدير سامي مغاوري، شاب خفيف الظل، طموح، ناجح، مقبل علي الحياة، يتمتع بشعبية كبيرة، يدخل القلب دون أستأذن، دخل مجال التمثيل عن طريق الصدفة، من خلال مسرحية “تكسب يا خيشة”، عام 1994. وكما شارك كريم في عدد من الأعمال الفنية منها مسلسلات احلامك اوامر ستات قادرة، راجل وست ستات، ربع رومي، جوز ماما، بيت العيلة، السيرة العاشورية، مش ألف ليلة وليلة، مش فريندز، فيفا أطاطا، الجماعة2، بخلاف أفلام اوعى وشك، على جنب يا اسطى، وليه خلتني أحبك، حديد.
وفي حوار خاص مع الفنان كريم سامي مغاوري كان هذا اللقاء مع عالم النجوم :
بدايتك الفنية كانت من خلال مسرحية تكسب يا خيشة هل تتذكر كواليس هذا العمل ؟
فعلا بدايتي الفنية كانت في مسرحية تكسب يا خيشه عمري وقتها كان 7 سنين كنت بحضر مع والدي البروفات بشكل مستمر وكان في مشهد من المشاهد كانوا بيرسموا الحركة بتاعته والأستاذ عصام السيد المخرج. فكانوا عاوزين طفل صغير بما ان كنت متواجد دائما مع والدي اقترحوا ان أنا أطلع المشهد ده.
هو مش هيتعدى الدقيقتين علي خشبة المسرح وبس، لكن ليلة الافتتاح الفنان أحمد بدير فاجئني وفاجئ الجميع طبعا الأستاذ أحمد بدير كان بطل العرض. وفاجئ الناس كلها افهاته و انه بيفتح كلام وحوار مباشر معايا أنا، أنا ووالدي كنا لابسين ملابس أطفال.
وبدء المشهد ياخد مساحة أكبر ويكون فيه افهات أكتر والافهات كانت بتطلع بشكل تلقائي على المسرح مكنش في اي تحضير ليها والمشهد أصبح من أنه دقيقتين لأكثر من 15 دقيقة ضحك كتير وافهات كتير أنا كنت بتعامل بعفوية شديدة جدا برد رد الأطفال في المواقف دي وكان في تجاوب كتير مع الجمهور. والحمد لله لكن لحد ما العرض أتصور مكنش التمثيل حلم بالنسبالي أو هدف كنت طفل لسه شايف المسرح زي بيته ممكن يلعب وانا بالفعل من صغري جدا بتواجد مع والدي بشكل مستمر والمسارح دي زي بيتي. وكان في تفاصيل كتير أفتكر الفنان أحمد بدير مرة من المرات خلاني أحيي بعديه هو شخصيًا في نهاية العرض في يوم عملنا ضحك كتير جدا فقال كريم هحيي بعديه هو كان شايف فيا موهبة انا مكنتش متخيلها .
دخولك مجال التمثيل كان سببه والدك الفنان القدير سامي مغاوري أم كان هوية نابعة من داخلك ؟
بحكم إن أنا متواجد على طول مع والدي في المسارح أو في أماكن تصوير فالموضوع كان أسهل إن أنا أمثل .. ولكن في الحقيقة المرة الاولانية كانت صدفة وده كان مع والدي في مسرحية (تكسب يا خيشة). المرة التانية نفس شركة الإنتاج بعتتلي في مسلسل مع الفنان الكبير “نور الشريف” اللي هو (السيرة العاشورية)
وكان عمري ساعتها 12 سنة .. شركة أوسكار للإنتاج الفني للمنتج والمخرج وائل عبد الله وكان هو مخرج العمل جابني أعمل ابن الفنان “نور الشريف”. ودي كانت حاجة بالنسبالي عظيمة جدا .. ولكن لما كنت في المسلسل بعد ما قطعنا مثلا 70% من المسلسل بدأت أحس إن هي دي المهنة اللي أنا عايز أكمل فيها حياتي وحبتها .. أنفتحت أمامي أبواب كتير مكنتش عارفها .. فهمت حاجات كتير .. اتعلمت حاجات كتير جدا من خلال المسلسل ده .. حسيت إن في جوايا حاجة. ومن بعدها بدأوا يجيبوني في مسرحيات حفلة المدرسة ..
أكمل كريم سامي مغاوري قائلاً:
لما كنت في إعدادي كنت بألف مسرحيات وكنت بخرجها وأنا في سن تانية وتالتة اعدادى .. ولما حتى دخلت ثانوي دخلت مسابقات مسرح على مستوى الجمهورية كمخرج وكممثل وخدنا مراكز وكنت بحاول أنمي موهبتي في مسرح المدرسة بشكل كبير جدا. وحاسس إن مسرح المدرسة لازم يرجع تاني بقوة لإن ده تفريغ لطاقة مهمة و بيظهر مواهب كتير وكان عندي فريق مسرح قوي وأنا في المدرسة الثانوي بنشارك فيه وبنعمل حفلات كبيرة للمدرسة. ووزارة التربية والتعليم كانت بتطلب فرقة المسرح بتاعتنا تحديدا عشان تعرض في مناسبات مختلفة. وكنت هدفي إن أنا أدخل وأدرس في المعهد العالي للفنون المسرحية.. وبعد ما خلصت ثانوي طبعا أنا كنت بشارك في الفترة دي في أعمال كانوا بيطلبوني كطفل وكده وكنت بشارك فيها ..
ولكن كان عندي هدف إن أنا أخشى فنون مسرحية.. وبالفعل دخلت اتدربت في ورشة المسرح القومي على إيد الفنان الكبير “رشدى الشامى”. وبعدها التحقت بالمعهد العالي للفنون المسرحية ونجحت واتخرجت 2007. وخدت بكالوريوس المعهد العالي للفنون المسرحية بتقدير عام جيد جداً واكتسبت خبرات. واتعلمت حاجات كتير جدا من أساتذتي ودكاترتي في المعهد اللي بدين ليهم بفضل كبير أوي عليا إن هما علموني وخرجت بشكل مختلف تماما عن بداية ما دخلت
الكثير يرى فيك والدك في الشكل والأداء .. هل هذا يزعجك ؟
والله يعني ده شرف أنا لا أستحقه.. وحاجة أتمنى إن أنا أبقى في ربع موهبته. أو في قدرته على الأداء والصدق اللي بيقدمه.
بابا خبرة كبيرة جدا في الكوميديا والتراجيديا والمسرح والسينما والتلفزيون، أساتذته أساتذة كبار وهو خد خبرة واسعة أتمنى إن أنا أبقى زيه.. إحنا ظروف جيلنا غير ظروف جيله خالص كل حاجة مختلفة عن الأجيال اللي سبقتنا .. وتحديدا الظروف اللي. والدي مر بيها في حياته والتجربة الإنسانية اللي مر بيها مختلفة تماما .. أنا أتمنى إن أنا أبقى زيه. وأحاول أتفوق عليه كمان .. يعني دي حاجة أنا عارف إنها هتبسطه جدا.
هل هناك فنانة أو فنان تتمنى العمل معه ؟
في فنانين كتير أنا حابب اشتغل معاهم ؛ أنا نفسي أشتغل طبعا مع الزعيم “عادل إمام” مع الفنان “يحيى الفخراني” والفنانة “يسرا” .. في فنانين كتير وبرده من جيل الوسط أقدر أقول “كريم عبد العزيز” و”أحمد عز” و”ياسر جلال” و”أحمد مكي” و”أمير كرارة” و”آسر يس”. وفي مخرجين نفسي أشتغل معاهم زي المخرج “تامر محسن” المخرج “محمد يس” المخرج “خالد مرعي” المخرجة “كاملة أبو ذكري” ، مش عايز أنسى لأن بالفعل في أسماء كبيرة جدا أنا نفسي أشتغل معاهم.. طبعا المخرج “شريف عرفة” في أسماء كتير جدا جدا جدا نفسي اشتغل معاهم وأخوض معاهم التجربة وإن شاء الله يعني ده يحصل في القريب العاجل.
ما هي أخر أعمال الفنان كريم سامي مغاوري ؟
إحنا انتهينا من تصوير فيلم (سقراط ونبيلة) بطولة الفنان “أشرف عبد الباقي” والفنانة “دينا” والفنان “أحمد فتحي”. والفنان “محمد فهيم” إخراج المخرج “هشام الشافعي”.. أنا عامل فيه دور حلو جدا ومختلف وجديد عليا .. إن شاء الله الفيلم ده هينزل في الصيف .. ده رابع عمل مع الفنان “أشرف عبد الباقي”. ودايما الأعمال اللي عملتها مع الفنان “أشرف عبد الباقي” كانت وش الخير عليا ،وكانت نقلة مختلفة في حياتي .
